ସ୍ୱପ୍ନ ଥିଲା ଆର୍ମିରେ ଜଏନ୍‌ କରିବା; ହେଲେ ଜୁଇରେ ମିଶିଗଲା ଯବାନ ହେବାର ଆଶା

କାନ୍ଦ ବୋବାଳିପେ ଫାଟି ପଡ଼ୁଛି ଗାଁ ଦାଣ୍ତ । ଭେଣ୍ଡିଆ ପୁଅର ଶବ ଦାହ ହେବା ପାଇଁ ଯାଉଛି । ଏ ଦୃଶ୍ୟ ଏତେ କଷ୍ଟଦାୟକ ଯେ, ଏହାକୁ ଶବ୍ଦରେ ବର୍ଣ୍ଣନା କରିବା ପାଇଁ କାହା ପାଖରେ ସମ୍ଭବ ନୁହଁ । ଯେଉଁ ପୁଅକୁ ୧୦ ମାସ ୧୦ ଦିନ ଗର୍ଭରେ ରଖି ଦୁନିଆର ଆଲୋକ ଦେଖାଇଥିଲା ସେଇ ପୁଅ ଯେବେ କୋକୋଇରେ ଶୋଇଲା, ସେ ଦୁଃଖକୁ ମାଆ ସହିବ ବା କେମିତି?

ଭେଣ୍ଡିଆ ପୁଅକୁ ହରାଇ ମୁଣ୍ଡ ବାଡ଼େଇ କାନ୍ଦୁଛି ମାଆ । ଛାତି ପିଟି କାନ୍ଦୁଛି ଭଉଣୀ । କାରଣ ପୁଅ ସେନାରେ ଯୋଗ ଦେଇ ଭାରତ ମାତାର ସେବା କରିବା ପାଇଁ ଯେଉଁ ଅକ୍ଲାନ୍ତ ପରିଶ୍ରମ କରିଥିଲା । କିନ୍ତୁ ଆଜି ସେଇ ସେବାରୁ ବଞ୍ଚିତ ହେବାରୁ ଆତ୍ମହତ୍ୟା କରିଦେବାର ଦୁଃଖକୁ କିଏ ବା ସମ୍ଭାଳିପାରିବ?

ବାଲେଶ୍ୱର ଜିଲ୍ଲା ସୋର ଥାନା ଦୟାନିଧିପୁରର ରଜନୀକାନ୍ତ ମହାନ୍ତିଙ୍କ ସାନ ପୁଅ ଧନଞ୍ଜୟ ମହାନ୍ତି । ସେନାରେ ଯୋଗ ଦେବା ପାଇଁ ନିଜକୁ ପ୍ରସ୍ତୁତ କରୁଥିଲେ। କେତବେଳେ ଅଣ୍ଟାରେ ଟାୟାର ବାନ୍ଧି ପଡ଼ିଆ ମଧ୍ୟରେ ଦୌଡ଼ୁଥିଲେ ତ ପୁଣି କେତେବେଲେ ପାଣି ଭିତରେ ପହଁରା ସହ ବ୍ୟାୟାମର ପ୍ରସ୍ତୁତି ବି କରୁଥିଲେ । ଲକ୍ଷ୍ୟ ଗୋଟିଏ ଥିଲା, କେବଳ ଦେଶ ମାତୃକାର ସେବା । ସେଥିପାଇଁ ହାଡ଼ଭଙ୍ଗା ଅକ୍ଲାନ୍ତ ପରିଶ୍ରମ କରୁଥିଲେ ଧନଞ୍ଜୟ।

କିନ୍ତୁ ଯେତେବେଳେ ଜାଣିଲେ କି ସେ ଆର୍ମିରେ ଭର୍ତ୍ତି ହୋଇପାରିବେ ନାହିଁ ସେତେବେଳେ ନିଜ ଶୋଇବା ଘରେ ଆତ୍ମହତ୍ୟା କରିଦେଲେ । ସେନାରେ ଭର୍ତ୍ତି ହେବା ପାଇଁ ଧନଞ୍ଜୟ ଗତବର୍ଷ ମାର୍ଚ୍ଚ ମାସରେ ଫିଜିକାଲ ଏକଜାମ ଦେଇଥିଲେ । ପରୀକ୍ଷାରେ କୃତକାର୍ଯ୍ୟ ହେବା ପରେ ମେଡ଼ିକାଲ ଟେଷ୍ଟରେ ବି ସଫଳ ହେଲେ। ହେଲେ ରିଟିନ୍‌ ଚେଷ୍ଟର ବାରମ୍ବାର ତାରିଖ ବଦଳିଥିବାରୁ ପରୀକ୍ଷା ଦେଇପାରିନଥିଲେ ଧନଞ୍ଜୟ।

ହେଲେ ଏବେ କେନ୍ଦ୍ର ଅଗ୍ନିବୀର ନିୟମ ଲଗାଇବାରୁ ଧନଞ୍ଜୟଙ୍କୁ ଲାଗିଥିଲା ଶକ୍ତ ଧକ୍କା । ୨୧ ବର୍ଷରେ ସେନାରେ ସାମିଲ ହେବା ନିୟମ ରହିଥିବା ବେଳେ ଧନଞ୍ଜୟଙ୍କୁ ୨୨ ବର୍ଷ ହୋଇସାରିଛି । ତେଣୁ ସେ ସେନାରେ ସାମିଲ ହୋଇପାରିବେ ନାହିଁ ବୋଲି ଜାଣିବା ପରେ ଆତ୍ମହତ୍ୟା କରିଛନ୍ତି । ଏମିତି କେନ୍ଦ୍ର ସରକାରଙ୍କ ନୂଆ ନୀତି ପାଇଁ ପୁଅର ପ୍ରାଣ ଗଲା ବୋଲି ଅଭିଯୋଗ ଆଣିଛନ୍ତି ବାପା-ମାଆ ଓ ବନ୍ଧୁବାନ୍ଧବ ।

କେବଳ ଓଡ଼ିଶାରେ ନୁହେଁ ବରଂ ଦେଶର ଅନେକ ସ୍ଥାନରେ ଏଇ ନିୟମକୁ ନେଇ ଦେଖା ଦେଇଛି ତାବ୍ର ଅସନ୍ତୋଷ । ସେପଟେ ଭେଣ୍ଡିଆ ପୁଅକୁ ହରାଇ କୋହ ସମ୍ଭାଳିପାରୁନାହାନ୍ତି ବାପା-ମାଆ। ସେ ଯାହା ବି ହେଉ, ଚାକିରିରୁ ବଞ୍ଚିତ ହେବା ପରେ ଧନଞ୍ଜୟ ଯେ ନିଜ ଜୀବନ ହାରିଦେବେ ଏକଥାକୁ ସହଜରେ ଗ୍ରହଣ କରିପାରୁନି ପରିବାର। ଆଉ ଧନଞ୍ଜୟଙ୍କୁ ହରାଇ ସ୍ତବ୍ଧ ହୋଇଯାଇଛି ମହାନ୍ତି ପରିବାର।

ରିପୋର୍ଟର- କୀରିଟି ଦାସ