LIVE TV
ତିନି ଛୁଆଙ୍କୁ ଛାଡି ମାଆ ଆରପାରିରେ । କୁନି କୁନି ପିଲାଙ୍କ ସମସ୍ତ ଦାୟିତ୍ୱ ଏବେ ବାପା ଲଇବାନଙ୍କ ଉପରେ । ପିଲାଙ୍କ ପାଇଁ ଘର ଛାଡି ବାହାରକୁ କାମ ଧନ୍ଦା କରି ଯାଇ ପାରୁ ନାହାନ୍ତି । ପିଲାଙ୍କ ଲାଳନପାଳନ ପାଇଁ ସେ ଭିକ ମାଗିବାକୁ ବାଧ୍ୟ ହେଉଛନ୍ତି । ସମସ୍ୟାରେ ଲଇବାନର ଜୀବନ । ନୂଆପଡା ଜିଲ୍ଲା କୋମନା ବ୍ଲକ ତରବୋଡ ଗାଁର ଲଇବାନର କାହାଣୀ ବେଶ୍ ଯନ୍ତ୍ରଣାଦାୟକ ।
ଦିନ ଥିଲା ଲଇବାନଙ୍କ ଛୋଟ ପରିବାର ହସଖୁସିରେ ଫାଟି ପଡ଼ୁଥିଲା । ପତ୍ନୀ ପାର୍ବତୀ, ୩ ଛୁଆ ଓ ଜଣେ ଦିବ୍ୟାଙ୍ଗ ଭଉଣୀଙ୍କୁ ନେଇ ଲଇବାନ ଖୁସୀରେ ଚଳି ଯାଉଥିଲେ । ନୂଆପଡା ଜିଲ୍ଲା ତରବୋଡ ଗାଁରେ ଗୁପଚୁପ ଠେଲା ଲଗାଇ ଯାହା ଦୁଇ ପଇସା ରୋଜଗାର କରୁଥିଲେ, ପରିବାର ଚଳାଇ ନେଉଥିଲେ । ତିନି ସପ୍ତାହ ତଳେ ତାଙ୍କ ପତ୍ନୀ ବେମାରରେ ପଡି ପ୍ରାଣ ହରାଇଛନ୍ତି । ତାଙ୍କ ଚିକିତ୍ସା ପାଇଁ ଯାହା ଧନ ସମ୍ପତ୍ତି ଥିଲା ସବୁ ସାରିଦେଇଛନ୍ତି ଲଇବାନ୍ । ଅନେକ ଚେଷ୍ଟା ପରେ ମଧ୍ୟ ପତ୍ନୀ ତାଙ୍କୁ ଛାଡି ଆର ପାରିକୁ ଚାଲିଗଲେ ।
ଏବେ ୩ ଶିଶୁଙ୍କ ବୋଝ ପଡିଲା ଲଇବାନଙ୍କ ଉପରେ । ଶିଶୁ ମାନଙ୍କ ଯତ୍ନ ନେବାକୁ ଲଇବାନ ଘରୁ ବାହାରି ପାରୁନାହାନ୍ତି । ଦେଢ ବର୍ଷର ସାନ ଝିଅ ପାଇଁ ଦରକାର ପଡୁଛି ଲାକ୍ଟୋଜେନ । ଭିକ ମାଗି ଏଥିପାଇଁ ଅର୍ଥ ଯୋଗାଡ କରିବାକୁ ପଡ଼ୁଛି । ଲଇବାନ ଏବେ ବାପା ଓ ମାଆ ଦୁଇଜଣଙ୍କ ଦାୟିତ୍ୱ ତୁଲାଉଛନ୍ତି ।
ତିନି ଝିଅ ସୃତି, ବବି ଓ ବବିତାଙ୍କୁ ଲାଳନପାଳନ କରିବାରେ ଉପୁଜିଛି ସମସ୍ୟା । ଜଣକୁ ଜଣେ ସଂପର୍କୀୟ ଭଉଣୀଙ୍କୁ ଏବଂ ଅନ୍ୟ ଜଣକୁ ତାଙ୍କ ପତ୍ନୀଙ୍କ ବଡ ଭଉଣୀଙ୍କୁ ଲାଳନ ପାଳ ପାଇଁ ଦେଇଛନ୍ତି ଲଇବାନ । ଘରେ ଦେଢ ବର୍ଷର ବବିତାକୁ ପାଖରେ ରଖିଛନ୍ତି । ଘରେ ତାଙ୍କ ସାଙ୍ଗରେ ରହନ୍ତି ଲଇବାନରଙ୍କ ଭଉଣୀ ମୁଖ । କିନ୍ତୁ ସେ ଭିନ୍ନକ୍ଷମ । ତାଙ୍କ ପାଖରେ ଛୁଆକୁ ଛାଡି କାମ ପାଇଁ ଯିବା ସମ୍ଭବ ନୁହେଁ । ତେଣୁ ସେ କାମ ଧନ୍ଦା କରିବାକୁ ଯାଇ ପାରୁ ନାହାନ୍ତି କି ଆଗ ପରି ଗୁପଚୁପ ବିକି ପାରୁ ନାହାନ୍ତି ।
ପାଖ ପଡୋଶୀ କେବେ କେମିତି ଖାଇବାକୁ ଦିଅନ୍ତି । ତାଙ୍କୁ ସରକାରୀ ସହାୟତା ଦେବାକୁ ଲୋକେ ଅନୁରୋଧ କରିଛନ୍ତି । ଲଇବାନଙ୍କୁ ଅନ୍ନପୂର୍ଣ୍ଣା ଅନ୍ତୋଦୟ ଯୋଜନାରେ ସାମିଲ କରା ଯାଇ ଥିବା ବେଳେ ତାଙ୍କ ଭଉଣୀଙ୍କର ଭତ୍ତା ବ୍ୟବସ୍ଥା କରିବାକୁ ସ୍ଥାନୀୟ ଲୋକମାନେ ଅନୁରୋଧ କରିଛନ୍ତି । କାମ କରି ଚଳିବାକୁ ଚାହୁଁଥିବା ଲଇବାନ ଏବେ ଘରେ । ପିଲାଙ୍କ ଚିନ୍ତା ତାଙ୍କୁ ବିବଶ କରିଦେଇଛି ।
ନୂଆପଡାରୁ ମାୟାଧର ସରାଫଙ୍କ ରିପୋର୍ଟ
