ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ସାଂଘାତିକ ତଥ୍ୟ : ଶହେ ମିଟର ପରିଧିରେ ନିର୍ମାଣ ପାଇଁ ଅନୁମତି ଦେଇନି NMA

ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ଆଉ ଏକ ସାଂଘାତିକ ତଥ୍ୟ । ଶ୍ରୀମନ୍ଦିର ପରିସରର ଶହେ ମିଟର ପରିଧି ଭିତରେ ନିର୍ମାଣ ପାଇଁ ନ୍ୟାସନାଲ ମୋନୁମେଣ୍ଟ ଅଥରିଟି କୌଣସି ଅନୁମତି ଦେଇନଥିଲା । ସୂଚନା ଅଧିକାର ଆଇନରୁ ମିଳିଥିବା ତଥ୍ୟରୁ ଏହା ସ୍ପଷ୍ଟ ହୋଇଛି । ବଲାଙ୍ଗିରର ସୂଚନା ଅଧିକାର କର୍ମୀ ହେମନ୍ତ କୁମାର ପଣ୍ଡା  । ଏ ନେଇ କେନ୍ଦ୍ର ସରକାରଙ୍କ ସଂସ୍କୃତି ମନ୍ତ୍ରାଳୟ ଅଧୀନରେ ଥିବା ନ୍ୟାସନାଲ ମୋନୁମେଣ୍ଟ ଅଥରିଟିରୁ ତଥ୍ୟ ମାଗିଥିଲେ ।

NMA ଉତ୍ତରରେ ସ୍ପଷ୍ଟ ଭାବେ ଉଲ୍ଲେଖ କରିଛି ଯେ, ଶ୍ରୀମନ୍ଦିର ପରିସରର ଶହେ ମିଟର ପରିଧି ଭିତରେ ନିର୍ମାଣ ପାଇଁ NMA କୌଣସି ଏନ୍ଓସି ଦେଇନାହିଁ । ଏବେ ଯେଉଁ ସବୁ କାମ ହେଉଛି, ସେସବୁ NMA ର ବିନା ଅନୁମତିରେ ହେଉଥିବା ଜଣାପଡ଼ୁଛି । ଏହା ସହିତ ବେଆଇନ ଭାବେ ହେଉଥିବା କାମ ପାଇଁ କାର୍ଯ୍ୟାନୁଷ୍ଠାନ ନେବାକୁ NMA ର କ୍ଷମତା ନାହିଁ ବୋଲି ମଧ୍ୟ ଏହି ସଂସ୍ଥା ଉଲ୍ଲେଖ କରିଛି ।

ସେପଟେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିବାଦର ସିବିଆଇ ତଦନ୍ତ ଦାବି କରିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର । ସେ ରାଜ୍ୟ ସରକାର ହୁଅନ୍ତୁ କି ଏଏସ୍ଆଇ ଅଧିକାରୀ, ଯିଏ ଦୋଷୀ, ତା ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ । ସେ ଦିଗରେ କେନ୍ଦ୍ର ସରକାର ପଦକ୍ଷେପ ନିଅନ୍ତୁ ବୋଲି ବିଜୟ ମହାପାତ୍ର କହିଛନ୍ତି ।

ଏକ ସାମ୍ବାଦିକ ସମ୍ମିଳନୀରେ ଉଭୟ ରାଜ୍ୟ ସରକାର ଓ ଏଏସ୍ଆଇକୁ ଟାର୍ଗେଟ କରି ସେ କହିଛନ୍ତି, ଏଏସ୍ଆଇ ଠିକ୍ ଭାବେ ନିଜ ଦାୟିତ୍ୱ ତୁଳାଇ ନାହିଁ ନ ହେଲେ ବିବାଦ ହୋଇନଥାନ୍ତା । ମଠ ଉଚ୍ଛେଦ ମଧ୍ୟ ବେଆଇନ ଥିଲା, ଏହା ଆଇନର ଉଲ୍ଲଂଘନ । ଏବେ ଯେଉଁ ସର୍ଭେ ହେଉଛି, ତାହା ମଧ୍ୟ ଏଏସ୍ଆଇ କରୁନି । ଏହା ଛଡ଼ା ଏବେ ସମସ୍ତେ କେବଳ ରାଜନୈତିକ ବୟାନବାଜି କରୁଥିବାରୁ ତାକୁ ନାପସନ୍ଦ କରିଛନ୍ତି ବିଜୟ ମହାପାତ୍ର । ଶ୍ରୀଜଗନ୍ନାଥଙ୍କୁ ଖେଳନା କରାନଯାଉ ବୋଲି ବୋଲି ସେ କହିଛନ୍ତି ।