ଅସୁରକ୍ଷିତ ଅବସ୍ଥାରେ ନଦୀବନ୍ଧ ! ବନ୍ଧର ଅନେକ ସ୍ଥାନରେ ହୋଇନାହିଁ ପଥର ପ୍ୟାକିଂ

ବାଙ୍କି, ଯାଜପୁର ( ସଂଜୀବ ନାୟକ,ଅଭୟ ପତି) : ନଦୀ ବନ୍ଧ ଫାଟି ଆଁ କରିଛି । ନଦୀ ଫୁଲିଲେ ଭୟରେ ଜୀବନ ଅତିବାହିତ କରୁଛନ୍ତି ଲୋକେ । ବନ୍ୟା ରୋକିବାକୁ ତଥା ବନ୍ଧ ମଜଭୁତ କରିବାକୁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ବିଭାଗୀୟ ଅଧିକାରୀଙ୍କ ଅବହେଳା ଯୋଗୁଁ ନିମ୍ନ ମାନର କାମ ହେଉଥିବା ଅଭିଯୋଗ ହେଉଛି । ବାଙ୍କି ଓ ଯାଜପୁରରେ ଅସୁରକ୍ଷିତ ନଦୀବନ୍ଧକୁ ନେଇ ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା ।

ଅସୁରକ୍ଷିତ ନଦୀବନ୍ଧକୁ ନେଇ ବଢୁଛି ଚିନ୍ତା । ନା ଅଛି ପଥର ପ୍ୟାକିଂ ନା କରାଯାଉଛି ବିକଳ୍ପ ବ୍ୟବସ୍ଥା । ଅନେକ ସ୍ଥାନରେ ବନ୍ଧ ଫାଟି ଆଁ କରିଛି । ବଡ଼ ବଡ଼ ଗଛଲତା ମାଡି ଯାଇଥିବାରୁ ନଦୀ ଫୁଲିଲେ ବନ୍ଧରେ ଘଳିଆ ସୃଷ୍ଟି ହେବାର ଆଶଙ୍କା କରୁଛନ୍ତି ଲୋକେ । ବାଙ୍କୀ ଗୋଳାଗଣ୍ଡ ଠାରୁ ଖଣ୍ଡିଆବନ୍ଧ ଯାଏ ନଦୀବନ୍ଧ ଦୁର୍ବଳ ହୋଇପଡିଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ଏନେଇ ଜଳସେଚନ ବିଭାଗର ଅଧିକାରୀ କହିଛନ୍ତି, ଯେଉଁ ସ୍ଥାନରେ ନଦୀବନ୍ଧ ଦୁର୍ବଳ ରହିଛି, ତାଉପରେ ନଜର ରଖାଯାଇଛି । ଖୁବ ଶୀଘ୍ର ମରାମତି ଶେଷ କରାଯିବ ।

Also Read

ମୌସୁମୀର ଲୁଚକାଳି ଖେଳ : ନିଅଣ୍ଟିଆ ବର୍ଷାକୁ ନେଇ ଚିନ୍ତିତ ଚାଷୀ

ଚାଷୀ ‍‍ବେଶରେ ସାର କିଣିଗଲେ, ଦୁର୍ନୀତିଗ୍ରସ୍ତ ଦୋକାନୀକୁ ଧରିଲେ ଆଇଏଏସ୍

ରାଜ୍ୟରେ ପୁଣି ୧,୨୪୩ ସଂକ୍ରମିତ ଚିହ୍ନଟ, ୬୯ ଆଖି ବୁଜିଲେ

ସେଇଭଳି ଯାଜପୁର ଜିଲ୍ଲାର ଅନେକ ନଦୀବନ୍ଧ ଅସୁରକ୍ଷିତ ଅବସ୍ଥାରେ ରହିଛି । କୋରେଇ ବ୍ଲକର ବଡ ତ୍ରିଲୋଚନପୁର, ସାନ ତ୍ରିଲୋଚନପୁର, ସୋତୀ, ହାଟସାହି, ମିର୍ଜାପୁର ଭଳି ଅଂଚଳର ଶହଶହ ଲୋକେ ବନ୍ୟା ଆସିଲେ ଘର ଛାତ ଉପରେ ମାସ ମାସ ଧରି ଆଶ୍ରୟ ନେଇଥାନ୍ତି । ଏକର ଏକର ଚାଷଜମିକୁ ଧୋଇନିଏ ବନ୍ୟାଜଳ । ବନ୍ଧ ନିର୍ମାଣ ସହ ପଥର ପ୍ୟାକିଂ ନେଇ ବାରମ୍ବାର ଜଣାଇଲେବି ପ୍ରତିଶ୍ରୁତି ବାଦ୍ ଆଉ କିଛି ମିଳୁନଥିବା ଅଭିଯୋଗ ହୋଇଛି । ଜିଲ୍ଲାପାଳ କହିଛନ୍ତି, ସଂପୃକ୍ତ ବିଭାଗ ମାନଙ୍କ ସହ ଆଲୋଚନା କରି ସ୍ଥାୟୀ ବ୍ୟବସ୍ଥା କରାଯିବ॥

OTV is now on Whatsapp

Join and get latest news update delivered to you via whatsapp

Join Now