ଘଣ୍ଟା ଘଣ୍ଟା ଧରି ଅନ୍ଧାରରେ କଟକ ବଡ଼ ମେଡିକାଲ୍‌

କଟକ ବଡ଼ ମେଡିକାଲରେ ବିଦ୍ୟୁତ୍‌ ବିଭ୍ରାଟ। ଲାଇନ୍ ନଥିବାରୁ ଘଣ୍ଟା ଘଣ୍ଟା ଧରି ଅନ୍ଧାରରେ ରହିବା ସହ ବିନା ଲାଇଟ୍ ଓ ଫ୍ୟାନରେ ରୋଗୀଙ୍କୁ ହଇରାଣ ହେବାକୁ ପଡ଼ିଛି। ଗତକାଲି ଏସ୍‌ସିବି ମେଡ଼ିକାଲର ଏକାଧିକ ବିଭାଗରେ ଏଭଳି ବିଦ୍ୟୁତ୍ ସମସ୍ୟା ଦେଖା ଦେଇଥିଲା।

ଫଳରେ ରୋଗୀ ଓ ରୋଗୀଙ୍କ ସମ୍ପର୍କୀୟଙ୍କ ପାଇଁ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ଗତକାଲି ସକାଳୁ ମେଡ଼ିସିନ ବିଭାଗ, ସ୍ପାଇନାଲ ଇଞ୍ଜୁରୀ, ଶବ ସଂରକ୍ଷଣ ଗୃହ ଓ ପୋଷ୍ଟମୋର୍ଟମ ବିଭାଗ ଆଦି ସ୍ଥାନରେ ବିଦ୍ୟୁତ୍‌ ନଥିଲା।

ଅପରାହ୍ନ ପରେ ସ୍ଥିତିରେ ସୁଧାର ଆସିଥିଲା। ମେଡିକାଲ୍‌ରେ କାର୍ଯ୍ୟରତ ବିଦ୍ୟୁତ୍‌ ଠିକାଦାରମାନେ ବକେୟା ପ୍ରାପ୍ୟ ପାଇଁ କାର୍ଯ୍ୟବନ୍ଦ କରିଥିବାରୁ ଏଭଳି ସମସ୍ୟା ଦେଖାଦେଇଥିବା କୁହାଯାଉଛି।