LIVE TV
ଆସ୍କା(ମନୋଜ ମୁନୀ) : ଛୁଆଙ୍କ ମୁହଁରେ ଦାନା ଦେବା ପାଇଁ ଭିକ ମାଗୁଛି ମା’ । ଲୋକଙ୍କ ଟାହିଟାପରାକୁ ଆଡ଼େଇ ସକାଳ ହେଲେ ଘରୁ ବାହାରି ଯାଉଛି । କାହା ପ୍ରତି ନଜର ନାହିଁ, ମନରେ ଗୋଟିଏ ଚିନ୍ତା ଆଜି ପିଲାଙ୍କ ମୁହଁରେ କିପରି ଦାନା ମୁଠେ ଦେବି । ଏଭଳି କରୁଣ କାହାଣୀ ଦେଖିବାକୁ ଶେରଗଡ଼ରେ । କୋଳରେ ଛଅ ମାସର ପିଲାଙ୍କୁ ନେଇ ଭିକ ମାଗୁଛନ୍ତି ୪୨ ବର୍ଷୀୟା ଲକ୍ଷ୍ମୀ ସିଦ୍ଧିକୁଲୁ । ମୁଣ୍ଡରେ ତିନି ବିକଳାଙ୍ଗ ପୁଅ ଏବଂ ଚାରି ଝିଅଙ୍କ ବୋଝ ।
ପାଞ୍ଚ ମାସ ତଳେ ସ୍ୱାମୀଙ୍କ ଅକାଳ ବିଯୋଗ ପରେ ଆଠଟି ସନ୍ତାନଙ୍କ ଦାୟିତ୍ୱ ଲକ୍ଷ୍ମୀଙ୍କ ମୁଣ୍ଡ ଉପରେ । ୨୩ ବର୍ଷର ବଡ଼ ପୁଅ ଧର୍ମେନ୍ଦ୍ର ଜନ୍ମରୁ ଭିନ୍ନକ୍ଷମ । ସେହିପରି ଧର୍ମେନ୍ଦ୍ରଙ୍କ ଦୁଇ ଭାଇ ସୁଭମ ଓ ସନିଆ ମଧ୍ୟ ଭିନ୍ନକ୍ଷମ । ଚାରି ଝିଅ ଏବଂ ଚାରି ପୁଅକୁ ନେଇ ଲଷ୍ମୀଙ୍କ ପରିବାର । ପେଟର ଭୋକ ଠାରୁ ବଳି ପଡ଼ୁଛି ମୁଣ୍ଡ ଗୁଞ୍ଜିବାର ଚିନ୍ତା । ଛାତ ଟିଏ ଅଛି ସତ କିନ୍ତୁ ଘରେ ଝରକା ନାହିଁ କି କବାଟ ନାହିଁ । ଖୋଲା ମେଲାରେ ଜୀବନ ବିତୁଥିବାରୁ ପରିବାରକୁ ଜୀବଜନ୍ତୁଙ୍କ ଭୟ ମଧ୍ୟ ରହିଛି ।
ବିଜୁଳି ଓ ପାଣି ସୁବିଧା ସେମାନଙ୍କ ଭାଗ୍ୟରେ ଜୁଟେନି । ସକାଳ ପାହିବା ମାତ୍ରେ ପେଟ ପାଇଁ ଚିନ୍ତା ମାଡ଼ିବସେ । ଆଉ ସେଥିପାଇଁ ପିଲାମାନକୁ ସାଥିରେ ନେଇ ଭିକ୍ଷା ବୃତ୍ତି କରିବାକୁ ସେ ବାଧ୍ୟ ହୁଅନ୍ତି । କେତେବେଳେ ଲକ୍ଷ୍ମୀ ମନ୍ଦିର ଦୁଆରେ ପିଲାଙ୍କୁ ନେଇ ଭିକ୍ଷାବୃତି କରନ୍ତି ତ ଆଉ କେତେବେଳେ ଗାଁ କୁ ଗାଁ ବୁଲନ୍ତି । ଆଖପାଖ ଲୋକେ ଲଷ୍ମୀଙ୍କ ଦୁଃଖରେ ଦୁଃଖୀ ହୁଅନ୍ତି । ସାମର୍ଥ୍ୟ ଅନୁସାରେ ସାହାଯ୍ୟ ବି କରନ୍ତି । ହେଲେ ଯେତେ ସାହାଯ୍ୟ କଲେ ବି ଏତେ ବଡ଼ ପରିବାରକୁ ଅଣ୍ଟୁନି ।
Also Read
ଅଭାବୀ ଲଷ୍ମୀଙ୍କ ପରିବାର ଦୁର୍ଦ୍ଦଶା ସଂପର୍କରେ ପ୍ରଶାସନ ଅବଗତ ଥିବା ସହ ସହଯୋଗ କରିବା ପାଇଁ ଚେଷ୍ଟା କରାଯାଉଛି ବୋଲି କହିଛନ୍ତି ସେରଗଡ଼ CDPO। ସେପଟେ ଲଷ୍ମୀଙ୍କ ଅଭାବୀ ପରିବାର କଥା ବିଳମ୍ବରେ ହେଲେ ମଧ୍ୟ ଶିଶୁମଙ୍ଗଳ କାର୍ଯ୍ୟାଳୟ ପାଖରେ ପହଞ୍ଚିଛି । ପରିବାରର କାହାର ବି ଆଧାର କାର୍ଡ ଓ ଭିନ୍ନକ୍ଷମ ସାର୍ଟିଫିକେଟ ନଥିବା ବିଭାଗକୁ ଅବଗତ କରାଯାଇଛି । ଫଳରେ ପିଲାଙ୍କ ଯତ୍ନ ନେବା ସହ ପାଠ ପଢ଼ାଇବା ପାଇଁ ପ୍ରତିଶ୍ରୁତି ଦେଇଛି ବିଭାଗ ।
