ଅପହୃତ ନାବାଳିକାକୁ ଖୋଜିବାକୁ ଲାଞ୍ଚ ମାଗିଲେ ପୋଲିସ୍‌ ବାବୁ : ୫ ହଜାର ଟଙ୍କା ସହ ୨ କେଜି ମାଛ ଦାବି କଲେ

ଖାକିରେ ଦାଗ । ଅପହରଣ ହୋଇଥିବା ନାବାଳିକା ଝିଅକୁ ଫେରାଇ ଆଣିବାକୁ ଲାଞ୍ଚମାଗିଲେ ପୋଲିସ୍‌ ବାବୁ । ଝିଅକୁ ଖୋଜିବାକୁ ବାପା ବିକଳ ହେଉଥିବା ବେଳେ ପୋଲିସ ଦାବି କରିଥିଲା ଟଙ୍କା ଓ ମାଛ । ଝିଅ ପାଇଁ ୫ ହଜାର ଟଙ୍କା ସହ ୨ କେଜି ମାଛ ନେଇଥିବା ଅଭିଯୋଗ ଆଣିଲେ ନାବାଳିକାଙ୍କ ପରିବାର ଲୋକେ । ଏଭଳି ଘଟଣା ଘଟିଛି ଆନନ୍ଦପୁର ଥାନା କାଠକଟା ପଞ୍ଚାୟରେ ।

ଗତ ୫ ତାରିଖରେ କାଠକଟା ପଞ୍ଚାୟତ ପୁରୁଣା ଘାଟି ଅଞ୍ଚଳରେ ଜଣେ ନାବାଳିକା ଅପହରଣ ହୋଇଥିବା ନେଇ ଆନନ୍ଦପୁର ଥାନାରେ ଅଭିଯୋଗ ହୋଇଥିଲା । ଅଭିଯୋଗ ଅନୁଯାୟୀ ପୁରୁଣାଘାଟି ଗ୍ରାମର ରାଜୁ ପାତ୍ର ସଂପୃକ୍ତ ନାବାଳିକାକୁ ଅପହରଣ କରି ନେଇଥିଲେ । ଅଭିଯୋଗ ପାଇ ପୋଲିସ ପୁରୁଣା ଘାଟିଗ୍ରାମରେ ପହଞ୍ଚି ପ୍ରାଥମିକ ତଦନ୍ତ ଆରମ୍ଭ କରିଥିଲା । ପରବର୍ତ୍ତୀ ସମୟରେ ଥାନାର ଏସଆଇ ମଲ୍ଲିକ ବାବୁ ନାବାଳିକାଙ୍କ ପରିବାର ଲୋକଙ୍କୁ ୫ ହଜାର ଟଙ୍କା ଦେଲେ ୨ ଦିନ ମଧ୍ୟରେ ପୁଅଝିଅଙ୍କୁ ଫେରାଇ ଆଣିବା ପାଇଁ କହିଥିବା ପରିବାର ଲୋକେ ଅଭିଯୋଗ କରିଛନ୍ତି ।

ଏହି କ୍ରମରେ ଗତକାଲି ମଲ୍ଲିକ ବାବୁ ୨କେଜି ମାଛ ନେଇଥିବା ମଧ୍ୟ ପରିବାର ଲୋକେ କରିଛନ୍ତି । ଅନ୍ୟ ପକ୍ଷରେ ଝିଅକୁ ଉଦ୍ଧାର କରାଯାଇଛି ଏବଂ ମାଛ ଟଙ୍କା କଥା ସମ୍ପୂର୍ଣ୍ଣ ଭିତ୍ତିହୀନ ବୋଲି ଆନନ୍ଦପୁର ଏସଡିପିଓ ଅନିଲ ବେଉରିଆ କହିଛନ୍ତି ।

ଆନନ୍ଦପୁରରୁ ମୁନା ସିଂଙ୍କ ରିପୋର୍ଟ