ବିନା ମନ୍ତ୍ର ଉଚ୍ଚାରଣ, ବିନା ହୋମ ଅଗ୍ନି, ବିନା ଯୌତୁକରେ ବିବାହ ! ସମ୍ବିଧାନକୁ ସାକ୍ଷୀ ରଖି ବିବାହ ବନ୍ଧନରେ ଆବଦ୍ଧ ହେଲେ ଶ୍ରୁତି ଓ ବିଜୟ

ବ୍ରହ୍ମପୁର (ଜଗନ୍ନାଥ ସାହୁ) : ସମ୍ବିଧାନ ସାଜିଲା ବିବାହର ସାକ୍ଷୀ । ବ୍ରହ୍ମପୁରରେ  ଅନୁଷ୍ଠିତ ହୋଇଯାଇଛି ଏପରି ଏକ ନିଆରା ବିବାହ ।  ଯେଉଁଠି ନା  ବ୍ରାହ୍ମଣ ପୁରୋହିତଙ୍କ ମନ୍ତ୍ର ଉଚ୍ଚାରଣ ନା କର୍ମକାଣ୍ଡ ।  ଏପରିକି ଏହି ବିବାହରେ ଜାନିଯୌତୁକ ଦିଆନିଆ ମଧ୍ୟ ହୋଇଛନି ।  ଏଥିରେ ସ୍ୱାମୀ ସ୍ତ୍ରୀକୁ ବାନ୍ଧି ନ ଥିଲା ମଙ୍ଗଳସୂତ୍ର । କେବଳ ବିବାହରେ ନବଦମ୍ପତି ନେଇଥିଲେ ସମ୍ବିଧାନର ଶପଥ ।  ତା ସହ ରକ୍ତଦାନ ଓ ଶରୀର ଦାନ । ଆଉ ଭୋଜିଭାତ ଖାଇ ସମ୍ପର୍କୀୟ ମାନେ ବିବାହର ମଜା ନେଇଥିଲେ । 

ଏବେ ବିବାହ ଋତୁ ଚାଲିଛି । ପ୍ରତିଦିନ ଗାଁ ଠୁ ସହର ଶହ ଶହ ବାହାଘର ହେଉଛି । ହୋମ ନିଆଁ ଜଳୁଛି, ସାତ ଦ୍ୱୀପ ଆଠକଳସକୁ ସାକ୍ଷୀ ରଖି ହାତ ଗଣ୍ଠି ପଡ଼ୁଛି ।  ବିବାହ ଦୁଇ ମନର ମିଳନ  । ଏଠି ନା ଲୋଡ଼ା କର୍ମକାଣ୍ଡ ନା ଲୋଡ଼ା ଯୌତୁକ  । ଏଭଳି ଏକ ବିବାହ କରି ସମାଜ ପାଇଁ  ଉଦାହରଣ ସୃଷ୍ଟି କରିଛନ୍ତି ନବଦମ୍ପତି ।   ସାଧାରଣତଃ ବିବାହ ବେଳେ ପୁଅ ଓ ଝିଅଙ୍କ ଜାତକ ମେଳକ ହୁଏ ।  ଯୌତୁକ ଦେବା ନେବା ଆଲୋଚନା ସହ ପଣ୍ଡିତ ଆସି ହୋମ ଓ ମନ୍ତ୍ର ଉଚ୍ଚାରଣ କରି ଅଗ୍ନିକୁ ସାକ୍ଷୀ ରଖି ପୁଅ ଓ ଝିଅ ଦୁହେଁ ବିବାହ କରାନ୍ତି ।  

ହେଲେ ବ୍ରହ୍ମପୁରରେ ଅନୁଷ୍ଠିତ ହୋଇଥି ବିବାହ ସମ୍ପୂର୍ଣ୍ଣ ଭିନ୍ନ । ଏଠି ବିବାହ ଅନୁଷ୍ଠିତ ହୋଇଛି ଆଭିଜାତ୍ୟ, ଜାକଜମକରୁ ବହୁ ଦୂରରେ  । ଏକ ନିରାଡ଼ମ୍ବର ପରିବେଶରେ ବିନା ମନ୍ତ୍ର ଉଚ୍ଚାରଣ, ବିନା ହୋମ ଅଗ୍ନି, ବିନା ଯୌତୁକରେ ହୋଇଥିଲା ବିବାହ । ସ୍ୱାମୀ, ସ୍ତ୍ରୀ ବେକରେ ମଙ୍ଗଳସୂତ୍ର ନ ବାନ୍ଧି କେବଳ ଫୁଲମାଳଟିଏ ପକାଇଥିଲ । ପଣ୍ଡିତଙ୍କ ଶାସ୍ତ୍ର ଉଚ୍ଚାରଣ ସ୍ଥାନରେ ରହିଥିଲା ଜଣେ ହେତୁବାଦୀଙ୍କ ସମ୍ବିଧାନ ସଂକଳ୍ପ ।  ଅଗ୍ନି ସାକ୍ଷୀ ନନେଇ  ନେଇଥିଲେ ସମ୍ବିଧାନର ସାକ୍ଷୀ  । ଏଭଳି ଏକ ପରିବେଶରେ ବିବାହ କରିଥିଲେ ଦୁଇ ଯୋଡ଼ି ବିଜୟ କୁମାର ଓ ଶ୍ରୁତି ।   

ବିଜୟ କୁମାରଙ୍କ ଘର ବ୍ରହ୍ମପୁରରେ ହୋଇଥିବା ବେଳେ ଶ୍ରୁତି ସକ୍ସେନାଙ୍କ ଘର ଲକ୍ଷ୍ମୌରେ ।  ଚେନ୍ନାଇରେ ଉଭୟଙ୍କ ମନ ମିଳନ ହୋଇଥିବା ବେଳେ ଉଭୟ ପରିବାରଙ୍କ ସହମତିରେ ବିବାହ ହୋଇଥିଲା । ବିନା ଯୌତୁକ, ଜାତିରେ ଯାହାକି ହିନ୍ଦୁ ପାରମ୍ପରିକ ବିବାହରୁ ଥିଲା ଭିନ୍ନ । ଏହାକୁ ନେଇ କନ୍ୟା ବି ଖୁସ୍ ଥିବା କହିଥିବା ବେଳେ କନ୍ୟା ପିତା ବି ଖୁସ୍ ଥିବା କହିଛନ୍ତି ।

ବିବାହ ଯୋଡ଼େ ରକ୍ତର ସମ୍ପର୍କ । ଏଣୁ ସେହି ଦିନକୁ  ସ୍ମରଣୀୟ କରିବା ପାଇଁ ନବଦମ୍ପତି ରକ୍ତଦାନ କରିବା ସହ ଶରୀର ଦାନ ପାଇଁ ଶପଥ କରିଥିଲେ ।  ଖାଲି ସେତିକି ନୁହେଁ, ସମାଜରେ ବିଧବା ମାନେ ବିବାହରେ ସାମିଲ ହେଲେ ଯେଉଁ ଅଶୁଭ ଲକ୍ଷଣ କୁହାଯାଉଥିଲା ସେଭଳି ଜଣେ ବିଧବା ହିଁ ନବଦମ୍ପତିଙ୍କୁ ଦେଇଥିଲେ ଆଶୀର୍ବାଦ ।  ଜାତି, ଧର୍ମ, ବ୍ରାହ୍ମଣବାଦରୁ ଉପରକୁ ଆସି ନବଦମ୍ପତିଙ୍କ ବାପା, ମାଆ ସହ ବହୁ ହେତୁବାଦୀ,ମାନବବାଦୀ ଆସିଥିଲେ ।  ପୁରୁଷ ଓ ସ୍ତ୍ରୀ ହିଁ ଦୁଇଟି ଜାତି ଅନ୍ୟ କେହି ନୁହଁନ୍ତିଭଳି ମତ ଦେଇଥିଲେ । 

ଏଭଳି ବିବାହକୁ ସାକ୍ଷୀ ରହିଥିଲେ ଶତାଧିକ ମହିଳା ପୁରୁଷ । ପୂର୍ବରୁ ଏଭଳି ନିରାଡ଼ମ୍ବର ବିବାହ କରି ନିଜ ସୁଖ ସଂସାର ଜାରି ରଖିଥିବା ବହୁ ବ୍ୟକ୍ତି ମଧ୍ୟ ନିଜ ମତ ପ୍ରଦାନ କରିଥିଲେ ।  ଭୋଜିଭାତର ଆସର ଭିତରେ ନବଦମ୍ପତିଙ୍କୁ ଆଶିଷ ମଧ୍ୟ ଦେଇଥିଲେ ।