ଏଣିକି ଗୋଟିଏ ଡାଏଲ୍‌ରେ ପାଇପାରିବେ ୩ଟି ସୁବିଧା; ରାଜ୍ୟରେ ଲାଗୁ ହେଲା ERV ସେବା

ରାଜ୍ୟରେ ଜରୁରୀକାଳୀନ ସେବା ଭିତ୍ତିଭୂମିରେ ଉନ୍ନତି ପାଇଁ ରାଜ୍ୟ ସରକାରଙ୍କ ପକ୍ଷରୁ ଓଡିଶା ପୋଲିସର ମିଳିତ ଆନୂକୂଲ୍ୟରେ ERV ସେବାର ଶୁଭାରମ୍ଭ ହୋଇଛି । ପ୍ରଥମ ପର୍ଯ୍ୟାୟରେ ସ୍ପେଶାଲ ଡିଜି ମନୋଜ ଛାବ୍ରା ୧୦୬ଟି ଏମରଜେନସୀ ରେସପନ୍ସ ଭେଇକିଲର ଶୁଭାରମ୍ଭ କରିଛନ୍ତି ।

( ERV ସେବାର ଶୁଭାରମ୍ଭ)

ସୂଚନା ଅନୁସାରେ, କଟକ ଷଷ୍ଠ ବାଟାଲିୟନ ଗ୍ରାଉଣ୍ଡରେ ଏହି ସେବାର ଶୁଭାରମ୍ଭ କରାଯାଇଛି । ସାଧାରଣ ନାଗରିକ ୧୧୨ ନମ୍ବର ଡାଏଲ କରି ଏହି ଇଆରଭି ସେବାର ଲାଭ ନେଇପାରିବେ । ରେସପନ୍ସ ବାହନରେ GIS ଓ GPS ସୁବିଧା ରହିଛି ।

ପ୍ରଥମ ପର୍ଯ୍ୟାୟରେ ଏହି ୧୦୬ଟି ଗାଡି ରାଜ୍ୟର ୩୪ ପୋଲିସ ଜିଲ୍ଲା ମୁଖ୍ୟାଳୟରେ ନିୟୋଜିତ ହେବ । ଏକାଧିକ ସଂଖ୍ୟକ ଜରୁରୀକାଳୀନ ନମ୍ବର ବଦଳରେ ୧୧୨ ଡାଏଲ କରି ପୋଲିସ, ଅଗ୍ନିଶମ ଓ ସ୍ୱାସ୍ଥ୍ୟ ସେବାଗୁଡିକର ସୁବିଧା ଏକତ୍ର ନେଇପାରିବେ ।

ଭୁବନେଶ୍ୱର କଟକ କମିଶନରେଟ ପୋଲିସ ପାଇଁ ମୋଟ ୧୪ ଟି ଗାଡି ପ୍ରଦାନ କରାଯାଇଥିବାବେଳେ ପ୍ରତି ଜିଲ୍ଲାର ପ୍ରମୁଖ ସହରକୁ ୩ଟି ଲେଖାଏଁ ଗାଡି ପ୍ରଦାନ କରାଯାଇଛି ।

ଏନେଇ ସ୍ପେଶାଲ ଡିଜି ଏସ୍ଏପି ମନୋଜ ଛାବ୍ରା କହିଛନ୍ତି ଯେ, ‘ଆମେରିକାରେ ରହିଥିବା ୯୧୧ ସେବା ଦ୍ୱାରା ଅଗ୍ନିଶମ, ଆମ୍ୱୁଲାନ୍ସ ଓ ପୋଲିସ ସମାନ ନମ୍ୱରରେ ଯୋଗାଇଦିଆଯାଉଛି । ଠିକ୍‌ ସେହିପରି ଆମ ଓଡ଼ିଶାରେ ମଧ୍ୟ ଏହି ସେବା ଲାଗୁ କରାଯାଇଛି । ଏହା ରାଜ୍ୟବାସୀଙ୍କୁ ଯଥାଶୀଘ୍ର ସାହାଯ୍ୟ କରିବ । ଆଜି ମୋଟ୍‌ ୧୦୬ଟି ଗାଡିର ଶୁଭାରମ୍ଭ କରାଯାଇଛି । ଦ୍ୱିତୀୟ ପର୍ଯ୍ୟାୟରେ ପୁଣି ୧୫୦ ଗାଡି ଯୋଗାଇଦିଆଯିବ । ଏହା ଦ୍ୱାରା ଲୋକଙ୍କ ଜରୁରୀକାଳିନ ପରସ୍ଥିତିରେ ସହାୟକ ହେବ’ ।

ସେହିପରି ଏନେଇ ଚିକିତ୍ସା ହେଲଥ୍ କେୟାର ସବ୍ୟସାଚୀ ବିଶ୍ୱାଳ କହିଛନ୍ତି, ‘ପ୍ରଥମ ପର୍ଯ୍ୟାୟରେ ମୋଟ ୧୦୬ଟି ଗାଡ଼ି ଶୁଭାରମ୍ଭ ହୋଇଥିବାବେଳେ ଏହି ଗାଡ଼ି ଗୁଡିକର କଣ୍ଟ୍ରୋଲ ରୁମ୍‌ ଭୁବନେଶ୍ୱରରେ ରହିବ । ଖୁବ୍‌ କମ୍‌ ସମୟ ମଧ୍ୟରେ ଜରୁରୀକାଳୀନ ସେବା ଯୋଗାଇବ ଏହି ଗାଡି ’ ।