ରାତି ଅଧ ଯାଏ ନାଇଟ୍‌ କ୍ଲବ୍‌ ଓ ବାର୍‌ରେ ଚାଲିଥିଲା ଡ୍ୟାନ୍ସ, ହଠାତ୍‌ ପହଞ୍ଚିଗଲା ପୋଲିସ୍‌...

ସବୁ ନିୟମ କାନୁନ୍‌କୁ ଫୁ କରି ବିଳମ୍ବିତ ରାତି ଯାଏ ଚାଲୁଥିଲା ନାଇଟ୍‌ କ୍ଲବ୍‌ ଓ ବାର୍‌। ଲାଉଡ୍‌ ମ୍ୟୁଜିକ୍‌ ସହ ନିଶାସକ୍ତ ଯୁବପିଢ଼ି ନାଚଗୀତରେ ମସ୍‌ଗୁଲ୍‌ ଥିବାବେଳେ ଅଚାନକ ଚଢ଼ାଉ କରିଥିଲା ପୋଲିସ୍‌। ରାଜଧାନୀ ଭୁବନେଶ୍ୱରରେ ନାଇଟ୍‌ କ୍ଲବ୍‌ ଓ ବାର୍ ଉପରେ କମିଶନରେଟ ପୋଲିସ ବିଳମ୍ବିତ ରାତିରେ ଚଢ଼ାଉ କରିଛି। 

ନିର୍ଦ୍ଧାରିତ ସମୟ ଓ ନିର୍ଦ୍ଧାରିତ ଶବ୍ଦ ପ୍ରଦୂଷଣ ସୀମା ସହ ଅନେକ ଅବକାରୀ ନିୟମକୁ ବାର୍‌ ମାଲିକ ଉଲ୍ଲଂଘନ କରୁଥିବା ଜଣାପଡ଼ିଛି। ଗତକାଲି ଭୁବନେଶ୍ୱର ଚନ୍ଦ୍ରଶେଖରପୁର ଓ ଇନ୍‌ଫୋସିଟି ଥାନା ଅଧୀନରେ ଥିବା ନାଇଟ୍‌ କ୍ଲବ୍‌ ଓ ବାର୍‌ ଉପରେ ଚଢ଼ାଉ ବେଳେ ଏହି ନିୟମ ଉଲ୍ଲଂଘନ ହେଉଥିବା ସାମ୍ନାକୁ ଆସିଛି। ସେଫ୍‌ ସିଟି ଡ୍ରାଇଭ ଅଭିଯାନରେ ପୋଲିସ ଏହି ଚଢ଼ାଉ କରିଛି।

୩ ପ୍ଲାଟୁନ ପୋଲିସ ସହ ସ୍ପେଶାଲ ଟିମ୍‌ ଚଢ଼ାଉ କରିଥିଲା। ଏହି ସମୟରେ ନାଇଟ୍‌ କ୍ଲବ୍‌ ଓ ବାର୍‌ରେ ସବୁ ନିୟମ କାନୁନକୁ ଫୁ କରି ବିଳମ୍ବିତ ରାତି ଯାଏ ନାଚଗୀତ ଚାଲିଥିବା ଜଣାପଡ଼ିଥିଲା।