ଜାତୀୟ ଟେନିସ କ୍ରିକେଟ ଦଳରେ ଦିନ ମଜୁରିଆର ଝିଅ, ତଥାପି ଅଣଦେଖା କରୁଛନ୍ତି ସରକାର

ପଙ୍କରୁ ଫୁଟିଲା ପଦ୍ମ । ପ୍ରତିକୂଳ ପରିସ୍ଥିତିକୁ ଆଡ଼େଇ ନାଁ କଲେ ଓଡ଼ିଶାର ଝିଅ । ପଛୁଆ ଅଞ୍ଚଳର ଝିଅ ପ୍ରୀତିଲତା ଏବେ ଭାରତୀୟ ମହିଳା ଟେନିସ କ୍ରିକେଟ ଦଳର ଜଣେ ଉଦୀୟମାନ ଖେଳାଳି । ନିକଟରେ ନେପାଳର ପୋଖ୍ରାଠାରେ ଖେଳାଯାଇଥିବା ପ୍ରଥମ ଦକ୍ଷିଣ ଏସିଆ ଟେନିସ କ୍ରିକେଟ ଚାମ୍ପିୟନସିପରେ ସେ ଭାଗ ନେଇଥିଲେ । ଭାରତ ଓ ନେପାଳ ମଧ୍ୟରେ ଫାଇନାଲ ମ୍ୟାଚ ଅନୁଷ୍ଠିତ ହୋଇଥିଲା । ଏଥିରେ ଭାରତୀୟ ଦଳ ରନର୍ସଅପ୍ ହେବା ସହ ପ୍ରୀତିଲତାଙ୍କୁ ମିଳିଛି ସିଲଭର ମେଡାଲ ।

ବାଲିଗୁଡ଼ାର ସୁନାଝିଅ ପ୍ରୀତିଲତା ନାୟକ । ସେ ଜଣେ ଦିନ ମଜୁରିଆଙ୍କ ଝିଅ । ଅନେକ ସଂଘର୍ଷ କରି ଆଜି ସେ ଜାତୀୟ ସ୍ତରରେ ଖେଳିବାର ସୁଯୋଗ ପାଇଛନ୍ତି । ଆଉ ଏବେ ସେ ଭାରତୀୟ ଦଳରେ ସାମିଲ ହୋଇ ଭାରତ ପାଇଁ ଗୌରବ ଆଣିଛନ୍ତି । ତେବେ ସେ ବାଲିଗୁଡା ଫେରିବା ପରେ ତାଙ୍କୁ ସାହି ପଡିଶାଙ୍କ ତରଫରୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା ।

ହେଲେ ବିଡମ୍ବନାର ବିଷୟ ଯାଏ ବାଲିଗୁଡା ପ୍ରଶାସନ କିମ୍ଭା କନ୍ଧମାଳ ଜିଲ୍ଲା ପ୍ରଶାସନର କୌଣସି ଅଧିକାରୀ ତାଙ୍କୁ ସ୍ୱାଗତ ମଧ୍ୟ ଜଣାଇ ନାହାନ୍ତି । ପ୍ରଶାସନର ଏଭଳି ଅଣଦେଖାକୁ ନେଇ ପ୍ରୀତିଲତା ବେଶ ମର୍ମାହତ ହେବା ସହ ଦୁଃଖ ପ୍ରକାଶ କରିଛନ୍ତି । ଅଭାବ ଅନାଟନରେ ବଢିଥିବା ପ୍ରୀତିଲତା ଆର୍ଥିକ ସମସ୍ୟା ଯୋଗୁଁ କିଭଳି ଆଗକୁ ବଢିବେ ସେ ନେଇ ଏବେ ଚିନ୍ତାରେ ରହିଛନ୍ତି ।

ବାଲିଗୁଡ଼ାରୁ ଅଜିତ୍ ନାୟକଙ୍କ ରିପୋର୍ଟ