LIVE TV
ଖତ ଖାଉଛି ସମବାୟ ବ୍ୟାଙ୍କର ଭ୍ରାମ୍ୟମାଣ ବ୍ୟାଙ୍କ ଶାଖା । ବସ୍ ଭିତରେ ବନ୍ଦ ପଡ଼ିଛି ଟଙ୍କା ନେଣଦେଣ ମେସିନ୍। ଆଉ ପାଣିର ଗାର ପାଲଟିଛି ରାଜ୍ୟ ସରକାରଙ୍କ ସବୁ ଲୋକଙ୍କୁ ବ୍ୟାଙ୍କ ସେବାର ପ୍ରତିଶ୍ରୁତି । ତେବେ ସବୁଠାରୁ ବଡ଼ କଥା ହେଉଛି କୁଆଡ଼େ ଗଲା ସରକାରଙ୍କ ଭ୍ରାମ୍ୟମାଣ ବ୍ୟାଙ୍କ ଶାଖା ପ୍ରତିଶ୍ରୁତି ? କାହିଁକି ଆଉ ଦେଖିବାକୁ ମିଳୁନି ସମବାୟ ବ୍ୟାଙ୍କର ମୋବାଇଲ୍ ଏଟିଏମ୍ ? କାହିଁକି ଫେଲ୍ ମାରିଲା କୋଟି କୋଟି ଟଙ୍କା ଖର୍ଚ୍ଚରେ ଆରମ୍ଭ ହୋଇଥିବା ଏ ବ୍ୟାଙ୍କିଙ୍ଗ ବ୍ୟବସ୍ଥା ?
୨୦୧୯ରେ ଜିଲ୍ଲାର ବାରିପଦା ଓ କରଞ୍ଜିଆ ଶାଖା ପାଇଁ ଦୁଇଟି ଭ୍ରାମ୍ୟମାଣ ଶାଖା ଆରମ୍ଭ ହୋଇଥିଲା । କିଛି ମାସ ଲୋକଙ୍କୁ ସେବା ଯୋଗାଇବା ପରେ ବର୍ଷ ବର୍ଷ ହେଲା ବ୍ୟାଙ୍କ ପରିସରରେ ଖତ ଖାଉଛି ଭ୍ରାମ୍ୟମାଣ ମୋବାଇଲ୍ ଏଟିଏମ୍ । କୋରାପୁଟ ଜିଲ୍ଲାରୁ ଆରମ୍ଭ କରି ଗଞ୍ଜାମ ଜଗନ୍ନାଥପୁର ବ୍ଲକ ଯାଏଁ ରାଜ୍ୟ ପ୍ରାୟ ସ୍ଥାନରେ ଭ୍ରାମ୍ୟମାଣ ବ୍ୟାଙ୍କ ଶାଖାର ସମାନ ଅବସ୍ଥା । ରାଜକୋଷରୁ କୋଟି କୋଟି ଟଙ୍କା ଖର୍ଚ୍ଚ ସତ୍ତ୍ବେ ବ୍ୟାଙ୍କିଙ୍ଗ୍ ସେବା ମିଳୁନଥିବାରୁ ଲୋକଙ୍କ ମଧ୍ୟରେ ତେଜୁଛି ଅସନ୍ତୋଷ । ଅନ୍ୟପକ୍ଷରେ କେନ୍ଦ୍ର ସମବାୟ ବ୍ୟାଙ୍କ ଅଧିକାରୀଙ୍କ କହିବା କଥା, ଭ୍ରାମ୍ୟମାଣ ବ୍ୟାଙ୍କ ଶାଖାର ମେସିନ ବାରମ୍ବାର ଖରାପ ହେଉଛି । ଉପାନ୍ତ ଅଞ୍ଚଳକୁ ବସ୍ ଯାଉଥିବାରୁ ଏହାର ମରାମତି ପାଇଁ ବି ଟଙ୍କା ଦରକାର ପଡ଼ୁଛି । ଉପରିସ୍ଥ ଅଧିକାରୀ ଟଙ୍କା ଅନୁମୋଦନ କଲେ ପୁଣିଥରେ ଗାଁକୁ ଗଡ଼ିବ ଭ୍ରାମ୍ୟମାଣ ବ୍ୟାଙ୍କ ଶାଖା।
Also Read
ବ୍ୟାଙ୍କିଙ୍ଗ ବିଶେଷଜ୍ଞଙ୍କ କହିବା କଥା, ବ୍ୟାଙ୍କ ଶାଖା ଓ ଏଟିଏମ୍ ନଥିବା । ଅଞ୍ଚଳର ଲୋକଙ୍କ ସୁବିଧା ପାଇଁ ଭ୍ରାମ୍ୟମାଣ ବ୍ୟାଙ୍କ ଶାଖା ଖୋଲାଯାଇଥିଲା । ଏହି ଶାଖାଗୁଡ଼ିକ ବିଭିନ୍ନ ଅଞ୍ଚଳକୁ ଯାଇ ଲୋକଙ୍କୁ ବ୍ୟାଙ୍କ ସେବା ଯୋଗାଇଥାନ୍ତି । ତେବେ କେଉଁ କାରଣରୁ ଏ ଭ୍ରାମ୍ୟମାଣ ବ୍ୟାଙ୍କ ଶାଖା ବନ୍ଦ ହୋଇଛି, ତାହା ବ୍ୟାଙ୍କ କର୍ତ୍ତୃପକ୍ଷ ହିଁ କହିପାରିବେ । କିନ୍ତୁ ଯଦି ଗାଡ଼ି ମରାମତି କାରଣରୁ ଭ୍ରାମ୍ୟମାଣ ବ୍ୟାଙ୍କ ସେବା ବନ୍ଦ ରହିଛି, ତାହା ଅତ୍ୟନ୍ତ ଦୁଃଖଦାୟକ।
ଲୋକଙ୍କ ଦୂଆର ମୁହଁରେ ବ୍ୟାଙ୍କ ସେବା ପହଞ୍ଚାଇବାକୁ କୋଟି କୋଟି ଟଙ୍କା ଖର୍ଚ୍ଚ କରି କେନ୍ଦ୍ର ସମବାୟ ବ୍ୟାଙ୍କ ଜରିଆରେ ଆରମ୍ଭ ହୋଇଥିବା ଏ ଭ୍ରାମ୍ୟମାଣ ବ୍ୟାଙ୍କ ଶାଖା ପୁଣିଥରେ ଜୀବନ୍ୟାସ ପାଇବ ନା ଉଭାନ ହୋଇଯିବ, ତାହା ଏବେ ବଡ଼ ପ୍ରଶ୍ନ ।
ରାଜେଶ ପଣ୍ଡା, ମାଣିକ ଲାଲ୍ ପାଣି, ଟି, ଗୌରୀଶଙ୍କର ଓ ନିରଞ୍ଜନ ରେଡ୍ଡୀଙ୍କ ରିପୋର୍ଟ, ଓଟିଭି...
