ଦିନ ମଜୁରିଆରୁ ଲକ୍ଷପତି ୟୁଟ୍ୟୁବର୍ ଇସାକ୍ ମୁଣ୍ଡା

ସମ୍ବଲପୁର(ସଞ୍ଜୟ କୁମାର ଜେନା): ପରିବାର ଚଳାଇବା ପାଇଁ ଦିନେ ସେ ପର ଘରେ ପାଇଟି କରୁଥିଲେ । କିନ୍ତୁ ଗତ ବର୍ଷ କରୋନା କଟକଣା ତାଙ୍କୁ ଜୀବନ ଜୀଇଁବାର ନୂଆ ରାହା ଦେଖାଇଲା । ମାଟ୍ରିକ ଡେଇଁ ନଥିବା ଅଖ୍ୟାତ ଗାଁର ଜଣେ ମୁଣ୍ଡା ଯୁବକ ଏବେ ରାଜ୍ୟର ଘରେ ଘରେ ପରିଚିତ, ନିଜର ୟୁଟ୍ୟୁବ୍ ଚ୍ୟାନେଲ ପାଇଁ । ବିଭିନ୍ନ ପ୍ରକାର ଗାଉଁଲି ଖାଦ୍ୟ ତିଆରି କରି ୟୁଟ୍ୟୁବରେ ଅପଲୋଡ କରନ୍ତି । କେବଳ ପରିଚୟ ନୁହେଁ ଲକ୍ଷ ଲକ୍ଷ ଟଙ୍କା ବି ରୋଜଗାର କରୁଛନ୍ତି ସମ୍ବଲପୁର ଜିଲ୍ଲା ଯୁଜୁମୁରା ବ୍ଲକର ଇସାକ ମୁଣ୍ଡା ।

କରୋନାର ପ୍ରଥମ ଲହରୀ ପାଇଁ ସାରା ଭାରତରେ ଲକଡାଉନ ଓ ସଟଡାଉନ ଚାଲିଥିଲା , ସେତେବେଳେ ଶ୍ରମିକ ଶ୍ରେଣୀରଙ୍କ ଦୁର୍ଦ୍ଦଶା ବଢ଼ି ଯାଇଥିଲା । ଯେଉଁମାନେ ବାହାର ରାଜ୍ୟରେ କାମ କରୁଥିଲେ , ସେମାନେ କାମଧନ୍ଦା ହରାଇ ଘରକୁ ଫେରୁଥିଲେ । ଆଉ ଯେଉଁମାନେ ଗାଁରେ ରହୁଥିଲେ, ସେମାନେ କାମଧନ୍ଦା ନପାଇ ହାତବାନ୍ଧି ଘରେ ବସିରହିଲେ । ସେମାନଙ୍କ ଭିତରୁ ଜଣେ ହେଲେ ସମ୍ବଲପୁର ଯୁଜୁମୁରା ବାବୁପାଲିର ଇସାକ ମୁଣ୍ଡା । ଶ୍ରମିକ ଭାବେ କାମ କରୁଥିବା ଇସାକ ମୁଣ୍ଡାଙ୍କ ପାଇଁ ଆୟର କୌଣସି ବିକଳ୍ପ ନଥିଲା । ଆଉ ସେହି ସମୟରେ ମୋବାଇଲରେ ୟୁଟ୍ୟୁବରୁ ବିଭିନ୍ନ ଭିଡିଓ ଦେଖୁଥିଲେ । ତେବେ ତାଙ୍କ ଆଗ୍ରହ ଦେଖି କେହି ଜଣେ ତାଙ୍କୁ ମଧ୍ୟ ନିଜେ ଭିଡିଓ ତିଆରି କରି ଅପଲୋଡ଼୍ କରିବାକୁ ପରାମର୍ଶ ଦେଇଥିଲେ ।

Also Read

ହିମାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ବୀରଭଦ୍ର ସିଂଙ୍କ ପରଲୋକ

ଅଶ୍ୱିନୀ ବୈଷ୍ଣବଙ୍କୁ ମିଳିଲା ରେଳ ମନ୍ତ୍ରଣାଳୟ ଦାୟିତ୍ୱ

ଦିଲୀପ ଚାଲିଗଲେ, ଛାଡ଼ିଗଲେ ଅନେକ ସ୍ମୃତି

ଇଚ୍ଛା ଥିଲେ ବି ଅଧିକ ପାଠଶାଠ ପଢି ନଥିବାରୁ ଭିଡିଓ କିପରି କରିବେ ସେ ଜାଣି ପାରିଲେନି । ଅନେକ ଚିନ୍ତା କରିବା ପରେ ଘରେ ଖାଉଥିବା ବାସି ପଖାଳକୁ ମୋବାଇଲ ରେ ରେକର୍ଡିଂ କରି ୨୦୨୦ ମାର୍ଚ୍ଚ ମାସରେ ପ୍ରଥମ ଥର ପାଇଁ ନିଜ ଚ୍ୟାନେଲରେ ଅପଲୋଡ କରିଥିଲେ । ତା ପରେ ବିଭିନ୍ନ ପ୍ରକାର ଗାଉଁଲି ଖାଦ୍ୟ ରୋଷେଇ କରି ଅପଲୋଡ କରିଥିଲେ । ଚାହୁଁ ଚାହୁଁ ସବସ୍କ୍ରାଇବରଙ୍କ ସଂଖ୍ୟା ବଢି ଚାଲିଥିଲା । ୩ ମାସ ପରେ ସେ ୟୁଟ୍ୟୁବରୁ ପ୍ରଥମ ଦରମା ୩୭ ହଜାର ଟଙ୍କା ପାଇଥିଲେ । ଆଉ ସେହି ବର୍ଷ ଅଗଷ୍ଟ ମାସରେ ତାଙ୍କୁ ମିଳିଥିଲା ସର୍ବାଧିକ ୫ ଲକ୍ଷ ଟଙ୍କା । ସେହି ଟଙ୍କାରେ ଇସାକ୍ ତି‌ଆରି କରିଛନ୍ତି ଏକ କୋଠାଘର ।

ଏବେ ଇଶାକଙ୍କର ଧିରେ ଧିରେ ତାଙ୍କର ଭିଉଅର ସଂଖ୍ୟା ବଢିବାରେ ଲାଗିଛି । ଲୋକେ ତାଙ୍କ ଭିଡିଓ ବେଶ୍ ପସନ୍ଦ କରୁଛନ୍ତି । ପ୍ରତିମାସ ରୋଜଗାର ମଧ୍ୟ ବଢୁଛି । ଓଡିଆ କିମ୍ବା ସମ୍ବଲପୁରୀ ବଦଳରେ ସେ ହିନ୍ଦି ଭାଷାରେ କହିଥାନ୍ତି । କାରଣ ହିନ୍ଦି ଭାଷାରେ କହିଲେ ସମସ୍ତେ ବୁଝି ପାରିବେ ବୋଲି ଇସାକ କହନ୍ତି । ଆଗକୁ ସେ ଏମିତି ଭାବେ ନୂଆ ନୂଆ ଖାଦ୍ୟ ପ୍ରସ୍ତୁତ କରି ୟୁଟ୍ୟୁବ୍ ଚାନେଲରେ ଅପଲୋଡ କରିବାର ଲକ୍ଷ ରଖିଛନ୍ତି । ଆଗକୁ ସେ ତାଙ୍କ ଭଳି ଗରିବବ ଲୋକଙ୍କୁ ସାହାଯ୍ୟ କରିବେ ବୋଲି କହିଛନ୍ତି ।