ଚର୍ଚ୍ଚାରେ ହୋଟେଲ୍‌ ସାଉଥ୍ ସିଟି: ଉଡୁଥିଲା ଟଙ୍କା, ଅଧ ରାତି ଯାଏ ଜମୁଥିଲା ନାଚଗୀତର ଆସର

ଭୁବନେଶ୍ୱର: ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗଙ୍କ ମୃତ୍ୟୁ ଘଟଣାରେ ଧିରେ ଧିରେ ଗୁମର ଫିଟୁ ଥିବାବେଳେ ନୂଆ ନୂଆ ତଥ୍ୟ ସାମ୍ନାକୁ ଆସିବାରେ ଲାଗିଛି। ଗତ ଶନିବାର ରାତିରେ ମନୀଷ ସାଙ୍ଗମାନଙ୍କ ସହ ହୋଟେଲ୍‌ ସାଉଥ୍‌ ସିଟିକୁ ଯାଇଥିଲେ। ତେବେ ହୋଟେଲ୍‌ରେ ବିଲ୍ ପେମେଣ୍ଟକୁ ନେଇ ସାଙ୍ଗମାନଙ୍କ ସହ ମନୀଷ ବଚସା ହୋଇଥିଲା ବୋଲି ସୂଚନା ମିଳିଛି। 

ଏସବୁ ଭିତରେ ଏବେ ଚର୍ଚ୍ଚାରେ ଅଛି ଭୁବନେଶ୍ୱର ଉପକଣ୍ଠ ପାତ୍ରପଡ଼ାରେ ଥିବା ହୋଟେଲ ସାଉଥ୍ ସିଟି। ରାତିରେ ରଙ୍ଗୀନ ହେଉଥିଲା ଏହି ବାର୍ କମ୍ ରେଷ୍ଟୁରାଣ୍ଟ। ଉଡୁଥିଲା ଟଙ୍କା। ବିଳମ୍ବିତ ରାତି ଯାଏ ଜମୁଥିଲା ନାଚଗୀତର ଆସର। କରୋନା କଟକଣା ସତ୍ତ୍ୱେ ବିଳମ୍ବିତ ରାତି ଯାଏ ବାର୍ ଚାଲୁଥିଲେ ମଧ୍ୟ କାହିଁକି କିଛି କାର୍ଯ୍ୟାନୁଷ୍ଠାନ ନିଆ ଯାଉନଥିଲା ? ଏହାର କାରଣ କ’ଣ ?  

ସୂଚନା ଅନୁସାରେ, ଏହି ବାର୍‌କୁ ଜଣେ ପୋଲିସ କର୍ମଚାରୀ ଚଳାଉଥିଲେ। ଲିଜ୍‌ରେ ନେଇ ସେ ଏହି ବାର୍‌କୁ ଚଳାଉଥିଲେ ବୋଲି ଚର୍ଚ୍ଚା ହେଉଛି। ଏ ଦିଗରେ ମଧ୍ୟ ବର୍ତ୍ତମାନ କମିଶନରେଟ ପୋଲିସ ଛାନ୍‌ଭିନ୍‌ କରୁଛି। 

Also Read

ମନୀଷ ଅନୁରାଗ ମୃତ୍ୟୁ ମାମଲାରେ ନିଇତି ନୂଆ ନୂଆ ଖିଅ

ଧିରେ ଧିରେ ଫିଟୁଛି ଗୁମର, ପାଣିରେ ବୁଡ଼ିବା ପୂର୍ବରୁ ମନୀଷଙ୍କ ମୃତ୍ୟୁ !

ହଟିବ କି ମନୀଷ ମୃତ୍ୟୁରୁ ପରଦା ? ଆତ୍ମସମର୍ପଣ କରିଥିବା ୨ ଯୁବକଙ୍କୁ ଭୁବନେଶ୍ୱର ଆଣିଲା ପୋଲିସ୍‌

ଅନ୍ୟପକ୍ଷେ, ଗତ ରବିବାର ଭୋର୍‌ ସମୟରେ ମନୀଷଙ୍କ ପାଖକୁ ୨ଟି ପର୍ଯ୍ୟାୟରେ ପରିବାର ଲୋକ ଅନ୍‌ଲାଇନ୍‌ରେ ଟଙ୍କା ପଠାଇ ଥିଲେ। ମାମଲାର ତନାଘନା ଭିତରେ ସାମ୍ନାକୁ ଆସିଛି ଏହି ତଥ୍ୟ। ଅସୁବିଧାରେ ପଡ଼ିଥିବା କହି ରବିବାର ଭୋରରେ ମନୀଷ ଘର ଲୋକଙ୍କୁ ଫୋନ୍ କରି ଜଣାଇଥିଲେ। ଏବାବଦକୁ ସେ ଟଙ୍କା ମାଗିଥିଲେ। କିଛି ଲୋକେ ତାଙ୍କୁ ମାରପିଟ କରିବା ସହ ଟଙ୍କା ମାଗୁଥିବା କହିବା ପରେ ଘର ଲୋକେ ତାଙ୍କୁ ଟଙ୍କା ପଠାଇଥିଲେ।