LIVE TV
ଛତିଶଗଡ଼ର ଯଶପୁର ଜିଲ୍ଲାର ବଗିଚା ବିକାଶଖଣ୍ଡର ଛିପାତାଲା ବାସିନ୍ଦା ସନ୍ତୋଷ ଲକଡାଙ୍କୁ ନେଇ ସମଗ୍ର ରାଜ୍ୟରେ ଚର୍ଚ୍ଚା। ସନ୍ତୋଷ ଲକଡା ଦାବି କରିଛନ୍ତି ଯେ ସେ ଐଶ୍ୱରୀୟ ପ୍ରାର୍ଥନା ଦ୍ୱାରା ଲୋକଙ୍କ ରୋଗ ଏବଂ ଦୁଃଖ-ଯନ୍ତ୍ରଣାକୁ ଦୂର କରନ୍ତି। ସନ୍ତୋଷ ଖ୍ରୀଷ୍ଟିଆନ ଧର୍ମରେ ବିଶ୍ୱାସ କରନ୍ତି ଏବଂ ତାଙ୍କ ଘରର ପୂଜାପାଠରେ ପ୍ରଭୁ ଯୀଶୁଙ୍କ ଅନେକ ପ୍ରତିମୂର୍ତ୍ତି ଏବଂ ଫଟୋ ରଖିଛନ୍ତି। ଏହି କୋଠରୀରେ ବସି ସନ୍ତୋଷ ପ୍ରାର୍ଥନା ମାଧ୍ୟମରେ ଲୋକଙ୍କ ସମସ୍ୟା ଦୂର କରୁଥିବା କୁହନ୍ତି। ଶାରୀରିକ ଏବଂ ଅନ୍ୟାନ୍ୟ ସମସ୍ୟାରେ ପୀଡିତ ଅନେକ ଲୋକଙ୍କ ସମସ୍ୟା ଦୂର କରିଥିବା ସେ ଦାବି କରିଛନ୍ତି।
ସନ୍ତୋଷ ପ୍ରାର୍ଥନା ସମୟରେ ଉଭୟ ଆଣ୍ଠୁ ତଳେ କଠିନ ପଥର ରଖି ଭଗବାନଙ୍କୁ ଉପାସନା କରନ୍ତି। ପ୍ରାର୍ଥନା ପରେ ସେ ଲୋକମାନଙ୍କର ଦୁଃଖ ଓ ଯନ୍ତ୍ରଣାକୁ ଦୂର କରନ୍ତି ବୋଲି ସେ କହିଛନ୍ତି। ଏଥିପାଇଁ ସନ୍ତୋଷ ପଥର ଖଣ୍ଡଗୁଡ଼ିକୁ ଗିଳି ପକାନ୍ତି। ତାଙ୍କ କହିବା କଥା ଏହି କଳା ପଛରେ ଏକ ଐଶ୍ୱରୀୟ ଶକ୍ତି ରହିଛି। ଏହାକୁ ଖାଇବା ଦ୍ୱାରା କୌଣସି ଅସୁବିଧା ହୁଏ ନାହିଁ। ପଥର ଖାଇବା ପରେ ତାଙ୍କୁ ଖାଦ୍ୟ ଖାଇବାକୁ ପଡେ ନାହିଁ। ତାଙ୍କ ପେଟ ଏହି ପଥରରେ ଭରିଯାଏ ଏବଂ ଏଗୁଡିକ ମଧ୍ୟ ସହଜରେ ହଜମ ହୋଇଯାଏ।
Also Read
ସନ୍ତୋଷ କହିଛନ୍ତି ଯେ ସେ ଗତ ୧୨ ବର୍ଷ ଧରି କ୍ରମାଗତ ଭାବରେ ଏପରି ପଥର ଖାଉଛନ୍ତି। ତାଙ୍କର ପଥର ଖାଇବା କଳା ଦ୍ୱାରା ସ୍ଥାନୀୟ ଲୋକ ଏବଂ ସେମାନଙ୍କ ପରିବାର ମଧ୍ୟ ଆଶ୍ଚର୍ଯ୍ୟ ହୁଅନ୍ତି। ସେ ବିଶ୍ୱାସ କରନ୍ତି ଯେ ଆଜି ପର୍ଯ୍ୟନ୍ତ ସେ ଏହିପରି ପଥର ଖାଉଥିବା କାହାକୁ ଦେଖି ନାହାଁନ୍ତି। ତେବେ ତାଙ୍କର ଏଭଳି ଆଶ୍ଚର୍ଯ୍ୟଜନକ କାର୍ଯ୍ୟରେ ପରିବାର ଲୋକ ଭୟ କରନ୍ତି ଯେ କାଳେ କୌଣସି ଅଘଟଣ ଘଟିଯିବ। କିନ୍ତୁ ଆଜିଯାଏ ସେଭଳି କିଛି ହୋଇନି।
ସନ୍ତୋଷଙ୍କ ପତ୍ନୀ ଆଲିଶା ଲକଡା ମଧ୍ୟ କହିଛନ୍ତି ଯେ ଅଦ୍ୟାବଧି ସେ ହଜାର ହଜାର ପଥର ଖାଇସାରିଛନ୍ତି। ସନ୍ତୋଷ ପଥର ଖାଇ କୌଣସି ଅସୁବିଧାର ସମ୍ମୁଖୀନ ହୋଇ ନାହାନ୍ତି କି ଆଜି ପର୍ଯ୍ୟନ୍ତ ତାଙ୍କୁ ଡାକ୍ତରଙ୍କ ନିକଟକୁ ନିଆଯାଇ ନାହିଁ।
ଅବସରପ୍ରାପ୍ତ ସିଏମ୍ଏଚ୍ଓ ଡାକ୍ତର ସିଡି ବାଖଲା ପଥର ଖାଉଥିବା ସନ୍ତୋଷଙ୍କୁ ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଏହା ସାଂଘାତିକ ହୋଇପାରେ ବୋଲି ସେ କହିଛନ୍ତି। କିଛି ଲୋକ କହିଛନ୍ତି ଯେ ପ୍ରଶାସନ ଏହି ପ୍ରସଙ୍ଗରେ ହସ୍ତକ୍ଷେପ କରିବା ଉଚିତ ଏବଂ ଏହାକୁ ବନ୍ଦ କରିବା ଉଚିତ। କାରଣ ଏହାକୁ ଅନ୍ୟ ଲୋକମାନେ ଅନୁସରଣ କରିପାରନ୍ତି ଓ ଏହା ସେମାନଙ୍କ ଜୀବନକୁ ବିପଦରେ ପକାଇପାରେ। ଏହା ମଧ୍ୟ ଅନ୍ଧବିଶ୍ୱାସ ସହ ଜଡିତ ବିଷୟ ହୋଇପାରେ।
