ରାଣୀ ଏଲିଜାବେଥ୍ ଦ୍ୱିତୀୟଙ୍କ ଗୁପ୍ତ ଚିଠି; ୬୩ ବର୍ଷ ପର୍ଯ୍ୟନ୍ତ ଖୋଲିବ ନାହିଁ

ରାଣୀ ଏଲିଜାବେଥ୍ ଦ୍ୱିତୀୟ ଆଉ ଏହି ଦୁନିଆରେ ନାହାଁନ୍ତି, କିନ୍ତୁ ତାଙ୍କ ସହ ଜଡିତ କାହାଣୀ ଲୋକମାନଙ୍କ ମଧ୍ୟରେ ଉତ୍ସାହ ସୃଷ୍ଟି କରୁଛି। ଯେତେବେଳେ ବି ବ୍ରିଟେନର ରାଣୀଙ୍କ କଥା ପଡିବ, ତାଙ୍କ ସହ ଜଡିତ ସବୁ କାହାଣୀ ନିଶ୍ଚିତ ଭାବରେ ସ୍ମରଣ ହେବ। ଏହିପରି ଏକ କାହାଣୀ ହେଲା ଅଷ୍ଟ୍ରେଲିଆକୁ ଲେଖାଯାଇଥିବା ଚିଠି ସହିତ ଜଡିତ। ତେବେ ସବୁଠାରୁ ରୋମାଞ୍ଚକର କଥା ହେଉଛି ସେହି ଚିଠିକୁ ୬୩ ବର୍ଷ ପର୍ଯ୍ୟନ୍ତ ଖୋଲାଯାଇପାରିବ ନାହିଁ।

ସିଡନୀରେ ଥିବା ଏକ ସିନ୍ଦୁକରେ ରହିଛି ଗୁପ୍ତ ଚିଠି:

ସିଡନୀରେ ଥିବା ଏକ ସିନ୍ଦୁକ ଭିତରେ ଏହି ଗୁପ୍ତ ଚିଠି ତାଲା ପଡିଛି। ଅଷ୍ଟ୍ରେଲିଆର ଏକ ସ୍ଥାନୀୟ ଚ୍ୟାନେଲ ଅନୁଯାୟୀ, ସିଡନୀରେ ଥିବା ଏକ ଐତିହାସିକ କୋଠାରେ ଥିବା ଏକ ସିନ୍ଦୁକ ଭିତରେ ଏହି ଚିଠି ଅଛି ଏବଂ ଏହି ଚିଠି ୧୯୮୫ ନଭେମ୍ବରରେ ସିଡନୀବାସୀଙ୍କୁ ସମ୍ବୋଧିତ କରି ତାଙ୍କ ଦ୍ୱାରା ଲେଖାଯାଇଥିଲା।

ଗଣମାଧ୍ୟମ ରିପୋର୍ଟ ଅନୁଯାୟୀ, ଏହା କେହି ଜାଣନ୍ତି ନାହିଁ, ଏପରିକି ରାଣୀଙ୍କ ବ୍ୟକ୍ତିଗତ କର୍ମଚାରୀ ମଧ୍ୟ ଚିଠିରେ କ’ଣ ଲେଖାଯାଇଛି ତାହା ଜାଣନ୍ତି ନାହିଁ। କାରଣ ଏହାକୁ ଏକ ସୁରକ୍ଷିତ ସ୍ଥାନରେ ଏକ କାଚ ବାକ୍ସରେ ଲୁଚାଇ ରଖାଯାଇଛି। କାରଣ ଏହା ୨୦୮୫ ପର୍ଯ୍ୟନ୍ତ ଖୋଲାଯାଇପାରିବ ନାହିଁ।

ସିଡ୍‌ନୀର ଲର୍ଡ ମେୟରଙ୍କୁ ଚିଠି ମାଧ୍ୟମରେ ଏକ ନିର୍ଦ୍ଦେଶ ରହିଛି ଯେ ୨୦୮୫ ଖ୍ରୀଷ୍ଟାବ୍ଦରେ ଆପଣ ଦୟାକରି ଏକ ଉପଯୁକ୍ତ ଦିନ ଠିକ କରି ଏହି ଲଫାପାକୁ ଖୋଲିବେ ଏବଂ ସିଡନୀ ନାଗରିକମାନଙ୍କୁ ମୋ ବାର୍ତ୍ତା ପହଞ୍ଚାଇବେ। "ଏଲିଜାବେଥ ଆର୍‌।"

୧୬ ଥର ଅଷ୍ଟ୍ରେଲିଆ ଗସ୍ତ କରିଥିଲେ ରାଣୀ:

ବ୍ରିଟେନର ରାଣୀ ଏଲିଜାବେଥ୍ ଦ୍ୱିତୀୟ ୧୬ ଥର ଅଷ୍ଟ୍ରେଲିଆ ଗସ୍ତ କରିଥିଲେ। ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ଆନ୍ଥୋନି ଅଲ୍‌ବନୀଜ୍ ଶୁକ୍ରବାର  କହିଛନ୍ତି ଯେ ଅଷ୍ଟ୍ରେଲିଆ ଗସ୍ତରେ ରାଣୀ ତାଙ୍କର ପ୍ରସିଦ୍ଧ ପ୍ରଥମ ଗସ୍ତ ପରଠାରୁ ଏପର୍ଯ୍ୟନ୍ତ ଏତେ ଗସ୍ତ କରିଛନ୍ତି, ଏଥିରୁ ସ୍ପଷ୍ଟ ହୋଇଛି ଯେ ତାଙ୍କ ହୃଦୟରେ ଅଷ୍ଟ୍ରେଲିଆ ପାଇଁ ଏକ ବିଶେଷ ସ୍ଥାନ ରହିଛି।

ରାଣୀଙ୍କୁ ରାଜ୍ୟ ମୁଖ୍ୟ ଭାବରେ ହଟାଇବା ପାଇଁ ୧୯୯୯ରେ ଅଷ୍ଟ୍ରେଲିଆ ଏକ ଉପନିର୍ବାଚନ କରିଥିଲା, କିନ୍ତୁ ସେ ପରାସ୍ତ ହୋଇଥିଲା ବୋଲି ସିଏନ୍ଏନ୍ ରିପୋର୍ଟ କରିଛି। ଶୁକ୍ରବାର ଦିନ ସିଡ୍‌ନୀର ପ୍ରତିଷ୍ଠିତ ଓପେରା ହାଉସରେ ରାଣୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା।