ସରକାରକା ମାଲ ଦରିଆ ମେ ଡାଲ : ଯେଉଁଠି ଆବଶ୍ୟକ ନାହିଁ, ସେଠି ତିଆରି ହେଉଛି ରାସ୍ତା

ମନରେଗା ଯୋଜନା ଅନ୍ତର୍ଗତ ରାସ୍ତା କାମରେ ଘୋଟାଲା । କେଉଁଠି ରାସ୍ତାର ଆବଶ୍ୟକତା ନଥାଇ ଟଙ୍କା ଆତ୍ମସାତ୍ ପାଇଁ ରାସ୍ତା କରାଯାଉଛି ଆଉ କେଉଁଠି ରାସ୍ତା ପାଇଁ ଲକ୍ଷ ଲକ୍ଷ ଟଙ୍କା ଆସୁଥିଲେ ବି କାଗଜ କଲମରେ କାମ ସାରି ସବୁ ଟଙ୍କା ପକେଟରେ ପୂରାଇ ଦେଉଛନ୍ତି ଅଧିକାରୀ । ସୁନ୍ଦରଗଡ଼ ଜିଲ୍ଲା ନୂଆଗାଁ ବ୍ଲକ ତେତେରକେଲା ପଞ୍ଚାୟତରେ ହୋଇଥିବା ରାସ୍ତା କାମରେ ଲକ୍ଷାଧିକ ଟଙ୍କା ବାଟମାରଣା ଅଭିଯୋଗ ହୋଇଛି । ସେପଟେ ଗଂଜାମ ସୋରଡ଼ା ବ୍ଲକରେ ମାଟି ଛିଞ୍ଚି ଲକ୍ଷ ଲକ୍ଷ ଟଙ୍କା ହଡପ୍ କରାଯାଇଛି ।

ସୁନ୍ଦରଗଡ଼ ଜିଲ୍ଲା ନୂଆଗାଁ ବ୍ଲକ ତେତେରକେଲା ପଞ୍ଚାୟତ ରାସ୍ତା, ଯେଉଁଥିରେ ଆତ୍ମସାତ୍ ହୋଇଛି ଲକ୍ଷାଧିକ ଟଙ୍କା । ୧୦ ଲକ୍ଷ ଟଙ୍କା ବ୍ୟୟ ଅଟକଳରେ ମୋରମ କାମ ହୋଇଥିବା ଫଳକ ମାରିଛି ସୁନ୍ଦରଗଡ଼ ଡିଆରଡିଏ । ଫୁଲଝର ରେଳ ଫାଟକଠାରୁ ଜଙ୍ଗଲକୁ ରାସ୍ତା କଥା ବୋର୍ଡରେ ଲେଖାଅଛି । ୨୦୧୯ରୁ କାମ ଆରମ୍ଭ ହୋଇ ୨୦୨୧ରେ ସମ୍ପୂର୍ଣ୍ଣ ହୋଇଥିବା ଦର୍ଶାଯାଇଛି । ତେବେ ରାସ୍ତା ଆଡେ ଟିକେ ନଜର ପକାଇଲେ ସବୁ ଜଣାପଡ଼ିଯିବ, ବାବୁ ମାନେ ଫଲ୍ସ ବିଲ୍ କରିବାରେ କେତେ ମାହିର ।

ଫଳକରେ ଲେଖାଅଛି ମୋରମ୍ ରାସ୍ତା, କିନ୍ତୁ ବାସ୍ତବରେ ମାଟି ରାସ୍ତା କରାଯାଇଛି । ପୁଣି ଅଧପନ୍ତରିଆ କାମ କରି ଛାଡି ଦିଆଯାଇଛି । ରାସ୍ତା ମଝିରେ ଏକ କଲଭର୍ଟର ଆବଶ୍ୟକତା ଥିବା ବେଳେ ତାହା ମଧ୍ୟ ହୋଇନି । ତେଣୁ ଏହି ରାସ୍ତା କାମରେ ଦୁର୍ନୀତିର ଗନ୍ଧ ବାରିଛନ୍ତି ଫୁଲଝର ବାସିନ୍ଦା ।

ତେତେରକେଲା ପଞ୍ଚାୟତ ଅଧୀନ ଗାଁ ଗୁଡିକର ଲୋକେ ଏହି ରାସ୍ତା ଦେଇ ଜଙ୍ଗଲକୁ ଯାଇଥାନ୍ତି । କିନ୍ତୁ କାମ ସମ୍ପୂର୍ଣ୍ଣ ନହୋଇ ଟଙ୍କା ହଡପ କରାଯାଇଥିବାରୁ ଲୋକେ ହଇରାଣ ହେଉଛନ୍ତି । ଏ ସମ୍ପର୍କରେ ନବନିର୍ବାଚିତ ଜିଲ୍ଲା ପରିଷଦଙ୍କୁ ପଚାରିବାରୁ ସେ କାମରେ ଦୁର୍ନୀତିର ବାସ୍ନା ବାରିଛନ୍ତି । ନବନିର୍ବାଚିତ ସରପଞ୍ଚ ମଧ୍ୟ ଫାଇଲ୍ ଦେଖିବେ ବୋଲି କହିଛନ୍ତି ।

ଫୁଲଝର ରେଳ ଫାଟକଠାରୁ ଜଙ୍ଗଲକୁ ଯିବା ପାଇଁ ରାସ୍ତାର କଣ ଆବଶ୍ୟକତା ରହିଛି ? ଏ ସମ୍ପର୍କରେ କାମ ହାତକୁ ନେଇଥିବା ସୁନ୍ଦରଗଡ଼ ଡିଆରଡିଏର ପ୍ରକଳ୍ପ ନିର୍ଦ୍ଦେଶକଙ୍କ ପାଖରେ ମଧ୍ୟ ଉତ୍ତର ନାହିଁ, ତଥାପି ଭୁଲ୍ ଭଟକା ହୋଇଥିଲେ ଆକ୍ସନ୍ ନିଆଯିବ ବୋଲି କହିଛନ୍ତି ।

ପବନ ତିୱାରୀ,ସୁନ୍ଦରଗଡ଼