LIVE TV
ଡୁମୁରିପୁଟର ଏକ ଛୋଟ ଘରେ ଗାଜର ,ବିଟ ରୁଟ ଓ ଶାଗ କଟା ଚାଲିଛି ଏବଂ ଗେଣ୍ଡୁ ଫୁଲ କୁ ଗୁଣ୍ଡ କରିଦିଆ ହେଉଛି । ସେସବୁକୁ ପୁଣି ଗ୍ରାଇଣ୍ଡରରେ ବାଟି ଦିଆଯାଉଛି । ଆଜି ଗାଁରେ କାହାରି ଭୋଜିଭାତ ପାଇଁ ଏହା କୌଣସି ପ୍ରସ୍ତୁତି ନୁହେଁ । ବରଂ ଶୈଳବାଳା ମହିଳା ସ୍ଵୟଂ ସହାୟକ ଗୋଷ୍ଠୀ ଦ୍ଵାରା ପ୍ରାକୃତିକ ରଙ୍ଗରେ ପ୍ରସ୍ତୁତ ହେଉଛି ଭଳିକି ଭଳି ରଙ୍ଗର ଫଗୁ ।
ସ୍ଥାନୀୟ ବାଡ଼ି ବଗିଚାରୁ ସଂଗୃହିତ ଏହି ପନିପରିବା ଓ ଫୁଲକୁ ଗ୍ରାଇଣ୍ଡରରେ ବାଟି ଦିଆଯିବା ପରେ ଏହାର ରସକୁ ନିଗାଡି ଦେଇ ମଇଦାରେ ଗୋଳାଇ ଦିଆଯାଏ । ଭଲଭାବେ ମଇଦାର ଧଳା ରଙ୍ଗ ବଦଳି ଯାଇ ରଙ୍ଗ ବେରଙ୍ଗର ଫଗୁ ବନି ଗଲା ପରେ ତାକୁ ବାହାରେ ଶୁଖାଇଦିଆଯାଉଥିବା ମହିଳା ଗୋଷ୍ଠୀ ର ସଦସ୍ୟ ଜଣାଇଛନ୍ତି ।
Also Read
ଓଡ଼ିଶା ଜୀବିକା ମିଶନର ସହାୟତାରେ ଚଳିତ ବର୍ଷ ଆରମ୍ଭ କରିଥିବା ଏହି ବ୍ୟବସାୟ ରେ ଲାଭ କ୍ଷତିର ବିଚାର ନ କରି ଲୋକଙ୍କୁ ଏକ ସୁରକ୍ଷିତ ଫଗୁରେ ହୋଲି ଖେଳିବାର ସୁଯୋଗ ଦେଇପାରିଥିବା ଯୋଗୁଁ ଆତ୍ମସନ୍ତୋଷ ଲାଭ କରିଛନ୍ତି ଏହି ମହିଳା ମାନେ । ତେବେ ଏହି ଫଗୁର ଗୁଣାତ୍ମକ ମୂଲ୍ୟ ଯୋଗୁଁ ଜୀବିକା ମିଶନ ତରଫରୁ ଏହି ଫଗୁକୁ କୋରାପୁଟ ଜିଲ୍ଲାର ବିଭିନ୍ନ ସହର ବଜାରରେ ବିକ୍ରି କରାଯାଉଥିବା ବେଳେ ଭୁବନେଶ୍ୱର କୁ ମଧ୍ୟ ପଠାଯାଇଥିବା ଜୀବିକା ମିଶନର ସ୍ଥାନୀୟ ସଂଯୋଜିକା ସିପ୍ରା ରାଉତ ସୂଚନା ଦେଇଛନ୍ତି ।
ଚଳିତ ବର୍ଷ ମହିଳା ଦିବସ ଦିନ ଆରମ୍ଭ କରିଥିବା ଏହି ପ୍ରକ୍ରିୟା ରେ ମହିଳା ଗୋଷ୍ଠୀ ଏକ କ୍ଵିଣ୍ଟାଲ ଫଗୁ ପ୍ରସ୍ତୁତ କରିଥିବା ବେଳେ ଆସନ୍ତା ବର୍ଷ ଆହୁରି ଅଧିକା ଫଗୁ ପ୍ରସ୍ତୁତ କରିବାର ଲକ୍ଷ୍ୟ ରଖିଥିବା ସେ ଜଣାଇଛନ୍ତି । ବଜାରରେ ମିଳୁଥିବା କେମିକାଲ ଯୁକ୍ତ ଫଗୁ ଅପେକ୍ଷା ଏହି ଫଗୁ ସୁରକ୍ଷିତ ଓ ଶସ୍ତା ହୋଇଥିବା ଯୋଗୁଁ ଗ୍ରାହକଙ୍କ ମଧ୍ୟରେ ଏହାପ୍ରତି ଆଗ୍ରହ ବଢ଼ିଥିବା ବ୍ୟବସାୟୀ ଜଣାଇଛନ୍ତି ।
