ମାଓବାଦୀଙ୍କ ବିରୋଧରେ ବଡ଼ ଅପରେସନ: ନଳୀକୁମ୍ପା ଜଙ୍ଗଲକୁ ଘେରି ଅଭିଯାନ

ମାଓବାଦୀଙ୍କ ବିରୋଧରେ ବଡ଼ ଧରଣର ଅପରେସନ । ବୌଦ୍ଧ ଜିଲ୍ଲା ମନମୁଣ୍ଡା ଥାନା ଅନ୍ତର୍ଗତ ଶଗଡ଼ା ଫାଣ୍ଡି ଅଞ୍ଚଳ ନଳୀକୁମ୍ପା ଜଙ୍ଗଲରେ SOG ଯବାନ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଛି ।

ଗତକାଲି ଠାରୁ ଚାଲିଥିବା ଅପରେସନକୁ ଆହୁରି ପ୍ରଭାବୀ କରିବାକୁ କନ୍ଧମାଳରୁ ଆଉ ୭ କମ୍ପାନୀ SOG ଯବାନ ଏହି ଅଭିଯାନରେ ସାମିଲ ହୋଇଥିବା ବେଳେ ବୌଦ୍ଧରୁ ୫ କମ୍ପାନୀ SOG ଯବାନଙ୍କୁ ନିୟୋଜିତ କରାଯାଇଛି ।

ଅପରେସନରେ ପ୍ରାୟ ୩ ଶହରୁ ଅଧିକ SOG ଯବାନ ସାମିଲ ହୋଇଛନ୍ତି । ନଳୀକୁମ୍ପା ଜଙ୍ଗଲକୁ ଘେରି ଜୋରଦାର ଅପରେସନ କରାଯାଉଛି । ମାଓବାଦୀ ଜଙ୍ଗଲ ଭିତରେ IED ଓ ଲ୍ୟାଣ୍ଡମାଇନ୍‌ ବିଛାଇଥିବା ସନ୍ଦେହରେ ଅତି ସତର୍କତାର ସହ ସୁରକ୍ଷାକର୍ମୀ ଆଗକୁ ବଢ଼ିଛନ୍ତି ।

ଜଙ୍ଗଲରେ ବିସ୍ଫୋରକ ଠାବ ସହ ନିଷ୍କ୍ରିୟ କରିବା ପାଇଁ ୩ଟି ବୋମା ନିଷ୍କ୍ରିୟକାରୀ ଟିମ୍‌ ଏହି ଅପରେସନରେ ସାମିଲ ହୋଇଛନ୍ତି । ଏଥିପାଇଁ ବୌଦ୍ଧ, ବ୍ରହ୍ମପୁର ଓ କନ୍ଧମାଳରୁ ବମ୍ ସ୍କ୍ୱାଡ୍‌ଙ୍କୁ ସାମିଲ କରାଯାଇଛି । ଗତକାଲି ଠାରୁ ଏବେ ଯାଏ ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଜୋରଦାର ଗୁଳିବିନିମୟ ଜାରି ରହିଛି ।