ପାଦେ ପାଦେ ବିପଦ, ଶୋଚନୀୟ ରାସ୍ତା, ହେଲେ ଯିବାକୁ ବାଧ୍ୟ...

ରାସ୍ତା ଅବସ୍ଥା ପୂରା ଖରାପ । ରାସ୍ତା ନୁହେଁ ତ ମରଣଯନ୍ତା । କାଦୁଅ ପଚପଚ୍ ଓ ପାଣିରେ ଭର୍ତ୍ତି । ସତେ ଯେମିତି ଅପେକ୍ଷା କରିଛି ଦୁର୍ଘଟଣାକୁ । ପାଦ ପକାଇଲେ ଗୋଟିଏ ସ୍ଥାନରେ ସ୍ଥିର ହେଉନି । ସେ ରାସ୍ତାରେ ଚାଲିବାକୁ ଯେମିତି ସ୍ୱତନ୍ତ୍ର ପ୍ରଶିକ୍ଷଣ ଦରକାର, କାରଣ ଅବସ୍ଥା ଏମିତି, ଟିକିଏ ଏପଟ ସେପଟ ହେଲେ ସିଧା ଯାଇ ରାସ୍ତା ତଳେ । ଦି-ଚକିଆ ଓ ଚାରି ଚକିଆ କଥା ଛାଡ଼ନ୍ତୁ, ସାଇକେଲ ଗଡ଼ିବା ବି କଷ୍ଟକର ।

ସୁନ୍ଦରଗଡ଼ ଜିଲ୍ଲା ନୁଆଗାଁ ବ୍ଲକ ଅଙ୍କୁରପାଲିର ଲାନକୋଇଠାରୁ କେମାଙ୍ଗ କୁମ୍ଭାର ବସ୍ତି ପର୍ଯ୍ୟନ୍ତ ରାସ୍ତାର ଅବସ୍ଥା ପୂରା ସଙ୍ଗୀନ I କାଦୁଅ ରାସ୍ତାରେ ନା ଗାଁକୁ ଆମ୍ବୁଲାନ୍ସ ଆସିପାରେ ନା ପିଲାଏ ସୁରକ୍ଷିତ ସ୍କୁଲ୍ ଯାଇପାରନ୍ତି । ଡାକ୍ତରଖାନା ଯିବା ପାଇଁ ଭାରତରେ ବୁହା ହୁଏ ଗର୍ଭବତୀ । ବର୍ଷା ଦିନେ ଖାଲରେ ପାଣି ଭରିଗଲେ ଯିବା ଆସିବା ସଂପୂର୍ଣ୍ଣ ଠପ୍ l ଢଳେଇ କି ପିଚୁ ରାସ୍ତା ଯେମିତି ସେଠିକାର ଲୋକଙ୍କ ପାଇଁ ସାତ ସପନ । ତଥାପି ଭାଗ୍ୟକୁ ନିନ୍ଦି ଏମିତି କାଦୁଅ ରାସ୍ତାରେ ଚାଲୁଛନ୍ତି ଲୋକେ ।

ସବୁଦିନିଆ ରାସ୍ତା ଖଣ୍ଡେ ପାଇଁ ସମସ୍ତଙ୍କୁ ନେହୁରା ହୋଇଛନ୍ତି ଗାଁ ଲୋକେ । ହେଲେ କେହି ଶୁଣୁନଥିବା ଅଭିଯୋଗ କରିଛନ୍ତି । ଲାନକୋଇ ମୁଣ୍ଡାରି ବସ୍ତିଠାରୁ କେମାଙ୍ଗ କୁମ୍ଭାର ବସ୍ତିକୁ ସଂଯୋଗ କରୁଥିବା ମାଟି ରାସ୍ତାର ଅବସ୍ଥା ଦୀର୍ଘ ବର୍ଷହେଲା ଏମିତି ରହିଛି I ଭୋଟ୍ ଆସିଲେ ନେତାଏ ଗାଁକୁ ଆସନ୍ତି ଆଉ ରାସ୍ତା କରିଦେବୁ ବୋଲି ପ୍ରତିଶୃତି ଦିଅନ୍ତି । ହେଲେ ଭୋଟ୍ ସରିଲେ ଆଉ କାହାରି ଦେଖା ମିଳେନି କହିଛନ୍ତି ଗ୍ରାମବାସୀ । ସ୍ଥାନୀୟ ପ୍ରଶାସନ ବି ରାସ୍ତା ସମସ୍ୟା ପ୍ରତି ଯେମିତି ଆଖି ବୁଝିଦେଇଛି ।

ମାଳମାଳ ଯୋଜନା ସହ ସରକାର ବିକାଶର ଡିଣ୍ଡିମ ପିଟୁଥିବା ବେଳେ ଗରିବ ଆଦିବାସୀଙ୍କ ପାଖରେ ଏବେ ବି ଅପହଞ୍ଚ ମୌଳିକ ସୁବିଧା । ତେବେ ସ୍ଥାନୀୟ ସରପଞ୍ଚ ରାସ୍ତାକାମ ପାଇଁ ଉପରିସ୍ଥ ଅଧିକାରୀଙ୍କୁ ଜଣାଇଛୁ କହିଥିବାବେଳେ ବ୍ଲକ୍ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ ।