ଜୁଏଲ ଓରାମଙ୍କ ବିରୋଧରେ ଦୁର୍ବ୍ୟବହାର ଅଭିଯୋଗ : ରାଜ୍ୟ ମହିଳା କମିଶନଙ୍କ ଦ୍ୱାରସ୍ଥ ହେଲେ ଗୌରୀ ମୁଣ୍ଡାରୀ

ସାଂସଦ ଜୁଏଲ ଓରାମ ଦୁର୍ବ୍ୟବହାର କରିଥିବା ଅଭିଯୋଗ ନେଇ ରାଜ୍ୟ ମହିଳା କମିଶନଙ୍କ ଦ୍ୱାରସ୍ଥ ହେଲେ ଗୌରୀ ମୁଣ୍ଡାରୀ । ରାଜନୀତି ପାଇଁ ତାଙ୍କର ଆଗ୍ରହ ଥିବାରୁ ପଞ୍ଚାୟତ ନିର୍ବାଚନରେ ସୁଯୋଗ ଦେବାକୁ ସେ ସାଂସଦଙ୍କୁ ଅନୁରୋଧ କରିଥିଲେ । ତାଙ୍କୁ ଉତ୍ସାହିତ କରିବା ବଦଳରେ ଅଶାଳୀନ ଭାଷାରେ ସାଂସଦ ଗାଳି ଗୁଲଜ କରିଥିବା ଗୌରୀ ଅଭିଯୋଗ କରିଛନ୍ତି । ଏନେଇ ପ୍ରଥମେ ସେ ଥାନାରେ ଅଭିଯୋଗ କରିଥିଲେ, କିନ୍ତୁ ଅଭିଯୋଗକୁ ଗୁରୁତ୍ୱ ଦିଆନଯିବାରୁ ବାଧ୍ୟହୋଇ ମହିଳା କମିଶନଙ୍କ ଦ୍ୱାରସ୍ଥ ହୋଇଛନ୍ତି ବୋଲି କହିଛନ୍ତି ।

ଗୌରୀ ଗତ ୨୫ ତାରିଖରେ ଗଣମାଧ୍ୟମରୁ ଖବର ଜାଣିବା ପରେ ମହିଳା କମିଶନ ନିଜ ଆଡୁ ଏକ ମାମଲା ରୁଜୁ କରିଥିବା ସୂଚନା ଦେଇଛନ୍ତି । ଆସନ୍ତା ୧୫ ଦିନ ଭିତରେ ରିପୋର୍ଟ ଦେବାକୁ ଏସପିଙ୍କୁ ନିର୍ଦ୍ଦେଶ ଦେଇଛନ୍ତି ମହିଳା କମିଶନ ଅଧ୍ୟକ୍ଷା । ଆବଶ୍ୟକ ହେଲେ ଅପରପକ୍ଷଙ୍କୁ କମିଶନ ନୋଟିସ କରିପାରନ୍ତି ବୋଲି କହିଛନ୍ତି । ତେବେ ଏନେଇ ଜୁଏଲ ଓରାମଙ୍କ ପ୍ରତିକ୍ରିୟା ମିଳିପାରିନାହିଁ ।

ତେବେ ସଂପୃକ୍ତ ଯୁବତୀ ଗତ ୨୪ ତାରିଖରେ ରାଉରକେଲା ସେକ୍ଟର ୩ ନମ୍ବର ବିଜେପି ଅଫିସରେ ଭଙ୍ଗାରୁଜା କରିଥିବା ନେଇ ବିଜେପି ପକ୍ଷରୁ ଥାନାରେ ଅଭିଯୋଗ କରାଯାଇଥିଲା । କୌଣସି ଏକ ନିର୍ଦ୍ଧିଷ୍ଟ ପାର୍ଟି ଦ୍ୱାରା ଏଭଳି ଆୟୋଜନ କରାଯାଇଥିବା କୁହାଯାଇଥିଲା । ସଂପୃକ୍ତ ଯୁବତୀ ଜୁଏଲଙ୍କୁ ବଦନାମ କରିବାକୁ ଏଭଳି କରୁଛନ୍ତି ବୋଲି ପୂର୍ବରୁ କହିଥିଲା ବିଜେପି । ଯୁବତୀଙ୍କ କହିବା ଅନୁସାରେ ସରପଞ୍ଚ ପ୍ରାର୍ଥୀ ଭାବେ ସେ ଛିଡ଼ା ହେଉଥିବାରୁ ସମର୍ଥନ ପାଇଁ ଜୁଏଲ୍‌ଙ୍କୁ କହିଥିଲେ । ତେବେ ଜୁଏଲ୍ ତାଙ୍କୁ ସହଯୋଗ ବଦଳରେ ଫୋନ୍‌ରେ ଗାଳିଗୁଲଜ କରିଥିଲେ ।