ଆଖି ସିନା ନାହିଁ, କିନ୍ତୁ ଦୁନିଆକୁ ରଖୁଛନ୍ତି କ୍ୟାମେରାରେ

କୁହାଯାଏ ଯେ ଯଦି ମନରେ କିଛି କରିବାକୁ ଇଚ୍ଛା ଥାଏ, ତେବେ ଏହାକୁ କେହି ଅଟକାଇ ପାରିବେ ନାହିଁ। ପ୍ରତ୍ୟେକ ଅଭାବ ଓ ଅସୁବିଧା ଇଚ୍ଛା ଓ ଆବେଗ ସାମ୍ନାରେ ତୁଚ୍ଛ ହୋଇଯାଏ। ମନବଳ ଛୋଟାକୁ ବି ପର୍ବତ ଚଢେଇବାରେ ଶକ୍ତି ଦେଇଥାଏ ଆଉ ମୁକକୁ ବି କଥା କହିବାର କ୍ଷମତା। ବର୍ତ୍ତମାନ ଏମିତି ଏକ ଭିଡିଓ ସାମ୍ନାକୁ ଆସିଛି ଯାହା ହାରିଯାଉଥିବା ମନରେ ପ୍ରେରଣା ଭରିଦେବ।

ଇଜିପ୍ଟର କାଇରୋରେ ରହୁଥିବା ଏସାରା ଇସ୍‌ମାଇଲ୍‌ ଫଟୋଗ୍ରାଫୀକୁ ବହୁତ ଭଲ ପାଉଥିଲେ। କିନ୍ତୁ ଏସାରା ଇସ୍‌ମାଇଲ୍‌ ଦେଖିପାରୁ ନଥିଲେ। ଏହି ଅଭାବ ସତ୍ତ୍ୱେ ସେ ନିଜ ସ୍ୱପ୍ନକୁ ପୂରଣ କରି ଦେଖେଇଛନ୍ତି। ଆଜିର ଦୁନିଆରେ ଜଣେ ଫଟୋଗ୍ରାଫର ମାଧ୍ୟମରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବାରେ ଏସାରା ଇସ୍‌ମାଇଲ୍‌ ସଫଳ ହୋଇପାରିଛନ୍ତି। ଏବେ ତାଙ୍କ ଫଟୋଗ୍ରାଫୀକୁ ନେଇ ଖୁବ୍ ଚର୍ଚ୍ଚା ହେଉଛି।

୨୨ ବର୍ଷୀୟ ଏସାରା ଇସ୍‌ମାଇଲ୍‌ ଜଣେ ଅନ୍ଧ ଫଟୋଗ୍ରାଫର। ସେ ଆଲେକ୍ସଜାଣ୍ଡାରିଆ ବିଶ୍ୱବିଦ୍ୟାଳୟର କଳା ବିଭାଗରେ ଆରବୀ ଭାଷା ବିଭାଗରୁ ତାଙ୍କର ପାଠ ପଢା କରିଥିଲେ। ଏହି ସମୟ ଭିତରେ ସେ ଫଟୋଗ୍ରାଫୀକୁ ଖୁବ୍ ଭଲ ପାଉଥିଲେ। ପ୍ରଥମେ ତାଙ୍କୁ ଲାଗିଥିଲା ଯେ ଏହା ତାଙ୍କ ପକ୍ଷେ ଅସମ୍ଭବ ହେବ। କିନ୍ତୁ ତାଙ୍କର ପରିଶ୍ରମ ଓ ନିଷ୍ଠା ତାଙ୍କର ଏହି ଅସମ୍ଭବ ସ୍ୱପ୍ନକୁ ସମ୍ଭବ କରିଦେଲା। ଆଜି ଏସାରା ଇସ୍‌ମାଇଲ୍‌ ମହିଳାମାନଙ୍କ ମଧ୍ୟରେ ପ୍ରଥମ ଅନ୍ଧ ଫଟୋଗ୍ରାଫର ହେବାର ଆଖ୍ୟା ପାଇଛନ୍ତି। ଇଜିପ୍ଟରେ ଅନେକ ଅସୁବିଧା ସତ୍ତ୍ୱେ ସେ ନିଜ ସ୍ୱପ୍ନକୁ ସାକାର କରିବା ପାଇଁ କମ୍ କଷ୍ଟ ସହି ନାହାନ୍ତି।

ଏସାରା ଇସ୍‌ମାଇଲ୍‌ ତାଙ୍କ ଫଟୋଗ୍ରାଫୀ ମାଧ୍ୟମରେ ପ୍ରମାଣ କରିଦେଇଛନ୍ତି ଯେ ଭଲ ଫଟୋ ଉଠାଇବା ନେଇ ଦେଖିବା କୌଣସି ଜରୁରୀ ନୁହେଁ। ସେ ନିଜର କଳ୍ପନା ମାଧ୍ୟମରେ ବହୁତ ଭଲ ଫଟୋ ଉଠେଇବାରେ ସଫଳ ହୋଇଛନ୍ତି। ଏନେଇ ଅନେକ ତାଲିମ ମଧ୍ୟ ନେଇଛନ୍ତି ଏସାରା। ଏଥିପାଇଁ ସେ ପ୍ରଥମେ ଅନ୍ଧ ଫଟୋଗ୍ରାଫୀ ବିଭାଗରେ ଯୋଗ ଦେଇଥିଲେ। ସେଠାରେ ସେ ଭଲ ଫଟୋ ଉଠେଇବା ପାଇଁ ଆବଶ୍ୟକ କୌଶଳ ଶିଖିଲେ। ଏହା ପରେ, ସେ ଅନେକ କୌଶଳ ଶିଖିଲେ, ଯାହା ଦ୍ୱାରା ବିନା ଆଖିରେ ବି ଭଲ ଫଟୋ ଚିତ୍ର ଉଠାଯାଇପାରିବ।

ତେବେ ବିନା ଦେଖିବାରେ କିପରି ଯେ ଫଟୋ ଉଠାଯାଇ ପାରିବ ଏହା ଭାବିଲେ ନିଶ୍ଚିତ ଅଡୁଆ ଅଡୁଆ ଲାଗେ। କିନ୍ତୁ ଏହାକୁ ଏସାରା ହିଁ ପ୍ରମାଣିତ କରିଛନ୍ତି। ବାସ୍ତବରେ ଲୋକଙ୍କ ସହ କଥାବାର୍ତ୍ତା କରିବା ସମୟରେ ଏସାରା ଫଟୋ କ୍ଲିକ୍ କରନ୍ତି। ଶବ୍ଦ ଶୁଣି ସେ କ୍ୟାମେରାର ଆଙ୍ଗେଲ୍ ଠିକ୍ କରନ୍ତି। ଏହା ପରେ, ବ୍ୟକ୍ତିଙ୍କଠାରୁ ଦୁଇ ମିଟର ଦୂରକୁ ଯାଇ ସେ ଫଟୋ ଉଠାଇବା ଆରମ୍ଭ କରନ୍ତି।

ଫଟୋ ଉଠାଇବା ସମୟରେ ଏସାରା କ୍ୟାମେରାକୁ ଅଟୋ ମୋଡ୍‌ରେ ରଖନ୍ତି। ପ୍ରାରମ୍ଭରେ, ଏସାରାଙ୍କ ଫଟୋଗୁଡ଼ିକ ଅସ୍ପଷ୍ଟ ଥିଲା। କିନ୍ତୁ ସମୟ ସହିତ ସେ ତାଙ୍କର କଳାକୁ ଆୟତ୍ତ କରିନେଲେ। ଆଜିର ସମୟରେ, ଏସାରା ଅନେକ ଫଟୋଗ୍ରାଫି ସେମିନାର୍‌ ଓ ପ୍ରଦର୍ଶନୀରେ ନିଜ କଳାର ନମୁନା ଉପସ୍ଥାପନ କରିବାରେ ସେ ସଫଳ ହୋଇଛନ୍ତି। ତାଙ୍କର କଳା ଅନେକ କେନ୍ଦ୍ରରେ ମଧ୍ୟ ପ୍ରଦର୍ଶିତ ହୋଇଛି। ଲୋକମାନେ ବିଶ୍ୱାସ କରିପାରିବେ ନାହିଁ ଯେ ଦୃଷ୍ଟିହୀନ ବ୍ୟକ୍ତି ମଧ୍ୟ ଏପରି ଫଟୋ ଉଠାଇ ପାରନ୍ତି।