ଚକଡା ଚଡକ.. ଧାନ ପୋକ ନେଲା ଜୀବନ

ଦଶ ଏକର ଜମିରେ ଚାଷ କରିଥିଲେ । ସେଥିରୁ ପାଞ୍ଚ ଏକର ଜମିରେ ଚକଡ଼ା ପୋକ ମାଡ଼ିଗଲା । ଚାଷୀ ରମେଶଙ୍କ ମୁଣ୍ତରେ ପଡ଼ିଲା ଚଡ଼କ । ପୋକ ମାରିବାକୁ ଆଣିଥିବା ବିଷ ପିଇ କଲେ ଆତ୍ମହତ୍ୟା । ବଲାଙ୍ଗିର ଜିଲ୍ଲା ପୁଇଁତଲା ବ୍ଲକ ବୁବେଳ ଗାଁରୁ ଆସିଲା ଚାଷୀ ଆତ୍ମହତ୍ୟାର ଖବର ।

ଅମଳ ସମୟରେ ବିଲରେ ପୋକ.. ପୋକ ମାରିବାକୁ ପକାଇଲେ ବିଷ ..କିନ୍ତୁ, ସ୍ଥିତି ସୁଧୁରିଲାନି .. ପରିଶେଷରେ ଅନ୍ନଦାତା କଲା ଆତ୍ମହତ୍ୟା.. ଏନେଇ ଖବର ପାଉଛନ୍ତି ତ ସରକାର?

ବଲାଙ୍ଗିର ଜିଲ୍ଲା ପୁଇଁତଲା ବ୍ଲକ ବୁବେଳ ଗାଁ । ଚାଷୀ ରମେଶ ଭୋଇ ଦଶ ଏକର ଜମିରେ ଚାଷ କରିଥିଲେ । କିନ୍ତୁ ସୁନାର ଫସଲରେ ଲାଗିଲା ପୋକ । ପାଞ୍ଚ ଏକର ଜମିରେ ଚକଡ଼ା ପୋକ ଲାଗିଲା । ଉଜୁଡ଼ିଗଲା ଗର୍ଭିଣୀ ଫସଲ ।

ଏତେ କଷ୍ଟରେ କରିଥିବା ଫସଲକୁ ନିଜ ଆଖି ସାମ୍ନାରେ ଉଜୁଡ଼ୁଥିବାର ଦେଖି, ସହିପାରିଲେନି ରମେଶ । ପୋକ ମାରିବାକୁ ଆଣିଥିବା ବିଷକୁ ନିଜେ ପିଇ ଦେଲେ । ମେଡ଼ିକାଲରେ ଡାକ୍ତର ତାଙ୍କୁ ମୃତ ଘୋଷଣା କଲେ । ଚାଷ ହିଁ ଚାଷୀକୁ ଖାଇଗଲା । ପୁଣି ଚାଷୀ ଆତ୍ମହତ୍ୟାର ଅପବାଦ ମୁଣ୍ଡାଇଲା ବଲାଙ୍ଗିର ଜିଲ୍ଲା ।

ନିଜ ଚାଷ ଜମିରେ ବିଷ ମାରୁ ମାରୁ ନିଜକୁ ମାରି ଦେଲେ ରମେଶ । ଏକର ଏକର ଜମିରେ ରୋଗ ଓ ପୋକ ସାଲୁ ବାଲୁ । ଖାଲି ଆଖିରେ ବି ଦେଖିଲେ ଦିଶୁଛି ମେଞ୍ଚେ ମେଞ୍ଚେ ପୋକ । ଚାଷୀ ଆତ୍ମହତ୍ୟାର ଖବର ପାଇ ବିଧାୟକ ଆସି ପହଞ୍ଚିଥିଲେ । ପରେ ପରେ ଜିଲ୍ଲା କୃଷି ଅଧିକାରୀ ମଧ୍ୟ ପହଞ୍ଚିଲେ । କିନ୍ତୁ ସେତେବେଳକୁ ସବୁକିଛି ସରି ଯାଇଥିଲା । ରମେଶଙ୍କ ଜୀବନଦୀପ ଲିଭି ଯାଇଥିଲା ।

ଚାଷୀ ଆତ୍ମହତ୍ୟା ପାଇଁ କିଏ ଦାୟୀ ? ପରସ୍ପର ମୁଣ୍ତରେ ଦୋଷ ବୋଳିବାକୁ ପ୍ରସ୍ତୁତ ରହୁଛନ୍ତି ଅଫିସର ଓ ନେତା । ଏପଟେ ଅକାଳରେ ଝଡ଼ି ପଡ଼ୁଛି ଜୀବନ । ପ୍ରତିଶ୍ରୁତି ବନାମ ବାସ୍ତବତା ଭିତରେ ଛନ୍ଦି ହୋଇ ପଡ଼ୁଛି ନୀରିହ ଚାଷୀ । କେବେ ଚେତିବେ ସରକାର .. କେବେ ସୁଧୁରିବ ସମସ୍ୟା .. ଏହା ବର୍ତ୍ତମାନ ବିରାଟ ପ୍ରଶ୍ନ ହୋଇ ଛିଡ଼ା ହୋଇଛି ।