ଉତ୍କଟ ଜଳସମସ୍ୟା : ପାଣି ପାଇଁ ଲାଇନରେ ଗରାବାଲଟି

ଧାଡି ଧାଡି ହୋଇ ଥୁଆ ହୋଇଛି ଗରା। ବାଲଟି, ଡେକେଚି ବି ଟ୍ୟାଙ୍କର ଆଗରେ ଥୁଆ ହୋଇଛି। ଆଉ ପାଣି ନେବା ପାଇଁ ମହିଳାମାନଙ୍କ ମଧ୍ୟରେ ଚାଲିଛି ଟଣାଓଟରା । କୌଣସି ଉପାନ୍ତ ନୁହେଁ ଉପକୂଳ ଅଂଚଳ କଟକ ଜିଲ୍ଲା ଆଠଗଡ ତଳଗଡ ଗାଁରେ ଏପରି ଦୃଶ୍ୟ ଦେଖିବାକୁ ମିଳିଛି । ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହୋଇ ବିଶୁଦ୍ଧ ପାନୀୟ ଜଳ ଯୋଗାଣ ନିମନ୍ତେ ଗ୍ରାମ୍ୟ ଜଳ ଯୋଗାଣ ବିଭାଗ ପକ୍ଷରୁ ଷ୍ଟାଣ୍ଡ ପୋଷ୍ଟ ତିଆରି ହୋଇଛି । ହେଲେ ପାଣି ଆସୁନଥିବାରୁ ନାହିଁନଥିବା ଅବସ୍ଥା ଭୋଗୁଛନ୍ତି ଲୋକେ ।

କେବଳ ତଳଗଡ ଗାଁ ନୁହେଁ ଆଠଗଡ ଉପଖଣ୍ଡର ଅନେକ ଗାଁର ଲୋକେ ପାଣି ପାଇଁ ଡହଳ ବିକଳ ହେଉଛନ୍ତି। ହେଲେ ଯେତେ ଅଭିଯୋଗ କଲେ କେହି ଶୁଣୁନଥିବା ଅଭିଯୋଗ ହେଉଛି। ପିଇବା ପାଣି ପାଇଁ ସରକାର ବଡ ବଡ ପ୍ରୋଜେକ୍ଟ ଘୋଷଣା କରି ବାଃ ବାଃ ନେଉଥିବା ବେଳେ ବାସ୍ତବ ଚିତ୍ର ଏଇଆ। ତଳଗଡ ଗାଁର ପାଣି ସମସ୍ୟା ନେଇ ବିଡିଓଙ୍କ ଦୃଷ୍ଟି ଆକର୍ଷଣ କରାଯିବା ସହ ଖୁବଶୀଘ୍ର କର୍ତ୍ତୃପକ୍ଷଙ୍କ ସହିତ ଆଲୋଚନା କରି ସମସ୍ୟାର ସମାଧାନ କରିବା ଲାଗି ପଦକ୍ଷେପ ନିଆଯିବ ବୋଲି କୁଲାଇଲୋ ସରପଞ୍ଚ କହିଛନ୍ତି।

ଭୂତଳ ଜଳସ୍ତର କମୁଥିବାରୁ କୂଅ ସବୁ ଶୁଖିଲା ପଡ଼ିଛି। ଏବେ ପାଣି ଟ୍ୟାଙ୍କରରୁ ମିଳୁଥିବା ୪ ଗରା ପାଣି ପ୍ରତି ପରିବାର ପାଇଁ ଅମୃତ ଭଳି ହୋଇଛି।

କଟକ ଜିଲ୍ଲା ଆଠଗଡରୁ ନୀଳକଣ୍ଠ ଦୋରାଙ୍କ ରିପୋର୍ଟ