ଡିଜେ ପ୍ରତିଯୋଗିତା ବେଳେ ଓଲଟି ପଡ଼ିଲା ଡିଜେ ଗାଡ଼ି, ୨୦ରୁ ୨୫ ଫୁଟ୍ ଯାଏ ଲାଗିଥିଲା ସାଉଣ୍ଡ ବକ୍ସ ଓ ଲାଇଟ

ଡିଜେ ପ୍ରତିଯୋଗିତା ବେଳେ ଓଲଟି ପଡ଼ିଲା ଡିଜେ ଗାଡ଼ି। ଫଳରେ ଗାଡ଼ି ତଳେ ଚାପି ହୋଇ ୧୦ରୁ ଅଧିକ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ମୟୂରଭଞ୍ଜ ଜିଲ୍ଲା ମୋରଡ଼ା ବଜାରରେ ଉଡ଼ା ପର୍ବ ପାଳନ ବେଳେ ଏହି ଅଭାବନୀୟ ଘଟଣା ଘଟିଛି। 

ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଡିଜେ ପ୍ରତିଯୋଗିତାର ଆୟୋଜନ କରାଯାଇଥିଲା। ଉତ୍ସବରେ ୫ ହଜାରରୁ ଅଧିକ ଲୋକଙ୍କ ସମାଗମ ହୋଇଥିଲା। ତେବେ ଡିଜେ ଗାଡ଼ି ଗୁଡ଼ିକୁ ଅଧିକ ସୁନ୍ଦର ଓ ଆକର୍ଷଣୀୟ କରିବାକୁ ୨୦ରୁ ୨୫ ଫୁଟ ଉଚ୍ଚ ଯାଏ ମାଇକ ଓ ଲାଇଟ୍  ବନ୍ଧା ଯାଇଥିଲା। ଏହି କାରଣରୁ ଏକ ଡିଜେ ଗାଡ଼ି ଭାରସାମ୍ୟ ହରାଇ ଲୋକଙ୍କ ଉପରେ ହିଁ ଓଲଟି ପଡ଼ିଥିଲା। ଫଳରେ ଏହା ତଳେ ଚାପି ହୋଇ ୧୦ରୁ ଅଧିକ ଲୋକ ଆହତ ହୋଇଛନ୍ତି।

#ଡିଜେ_ପ୍ରତିଯୋଗିତା_ବେଳେ_ଓଲଟି_ପଡ଼ିଲା_ଡିଜେ_ଗାଡ଼ି
ଗାଡ଼ିରେ ୨୦ରୁ ୨୫ ଫୁଟ୍ ଯାଏ ଲାଗିଥିଲା ସାଉଣ୍ଡ ବକ୍ସ ଓ ଲାଇଟ...#DJVehicleOverturns#Odishapic.twitter.com/esTsemS48e

— ଓଟିଭି (@otvkhabar) April 15, 2022

ଆହତଙ୍କୁ ପ୍ରଥମେ ବାରମାଇଲ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ୩ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ସେମାନଙ୍କୁ ବାରିପଦା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ଘଟଣା ପରେ ପୋଲିସ ପହଞ୍ଚି ଡିଜେ ଗାଡ଼ି ଗୁଡ଼ିକୁ ଜବତ କରିଛି। ସେପଟେ ଦୁର୍ଘଟଣାଗ୍ରସ୍ତ ଡିଜେ ଗାଡ଼ିର ମାଲିକ ଓ କର୍ମଚାରୀ ଫେରାର ଅଛନ୍ତି।