ଟଙ୍କା ପାଇଁ ୩୦ କି.ମି. ଗୁରୁଣ୍ଡିଲେ ଦିବ୍ୟାଙ୍ଗ, ଆଧାର ଲିଙ୍କ୍‌ ହୋଇନି କହି ଫେରାଇ ଦେଲା ବ୍ୟାଙ୍କ...

ଟଙ୍କା ପାଇଁ ୩୦ କି.ମି. ଦୂର ରାସ୍ତା ଗୁରୁଣ୍ଡି ଗୁରୁଣ୍ଡି ଗଲେ ଦିବ୍ୟାଙ୍ଗ ବୃଦ୍ଧା । ରାଜ୍ୟ ସରକାରଙ୍କ ଦୁଆର ମୁହଁରେ ବ୍ୟାଙ୍କିଂ ସେବା ବ୍ୟବସ୍ଥାକୁ ଉପହାସ କଲା ଭଳି ଏ ଚିତ୍ର ସୁନ୍ଦରଗଡ଼ ଜିଲ୍ଲା କୁତ୍ରାରୁ ଆସିଛି ।

ସୂଚନା ଅନୁସାରେ, ବଡ଼ମାଳ ବଜାରପଡ଼ାର ୬୮ ବର୍ଷୀୟା ବୃଦ୍ଧା ଟେରସା ବାର୍ଲା ଟଙ୍କା ଉଠାଇବାକୁ ଗାଁ ପାଖ ଗ୍ରାହକ ସେବା କେନ୍ଦ୍ରକୁ ଯାଇଥିଲେ । ହେଲେ ସେଠାରେ ତାଙ୍କୁ କୁହାଯାଇଥିଲା, ତାଙ୍କ ବ୍ୟାଙ୍କ ଆକାଉଣ୍ଟ ସହ ଆଧାର କାର୍ଡ ଲିଙ୍କ୍‌ ହୋଇନାହିଁ । ତେଣୁ ଟଙ୍କା ଉଠାଇ ହେବନି । ନିରୁପାୟ ହୋଇ ଶେଷରେ ଟେରସା ବୁଧବାର ସକାଳେ ଗାଁରୁ ୩୦ କି.ମି. ଦୂର କୁତ୍ରା ଷ୍ଟେଟ୍‌ ବ୍ୟାଙ୍କ ଅଭିମୁଖେ ଗୁରୁଣ୍ଡି ଗୁରୁଣ୍ଡି ବାହାରି ଥିଲେ । 

ବ୍ୟାଙ୍କ ଯିବା ବାଟରେ ଜଣେ ସମାଜସେବୀଙ୍କ ନଜର ଟେରସାଙ୍କ ଉପରେ ପଡ଼ିବାରୁ ପାଖ ଗ୍ରାହକ ସେବା କେନ୍ଦ୍ରକୁ ତାଙ୍କୁ ନେଇ ସେଠାରେ ତାଙ୍କର ବ୍ୟାଙ୍କ ଆକାଉଣ୍ଟ ଯାଞ୍ଚ କରିଥିଲେ । ଯାଞ୍ଚ ବେଳେ ଜଣାପଡ଼ିଥିଲା, ଟେରସାଙ୍କ ଆକାଉଣ୍ଟ ଆଧାର ଲିଙ୍କ ହୋଇଛି । ଏହାପରେ ଟଙ୍କା ଉଠାଣ କରି ସମ୍ପୃକ୍ତ ସମାଜସେବୀ ଜଣକ ଟେରସାଙ୍କୁ ଘରକୁ ପଠାଇଥିଲେ ।

ଏଠାରେ ପ୍ରଶ୍ନ ଉଠୁଛି, ଦିବ୍ୟାଙ୍ଗଙ୍କ ସୁବିଧା ପାଇଁ କେତେ କ’ଣ ଯୋଜନା କରିଛନ୍ତି ସରକାର । ଦୁଆର ମୁହଁରେ ବ୍ୟାଙ୍କିଂ ସେବା ଯୋଗାଇବାକୁ ବି ବ୍ୟବସ୍ଥା କରିଛନ୍ତି । ମାତ୍ର ଟଙ୍କା ଉଠାଣ ପାଇଁ ଦିବ୍ୟାଙ୍ଗଙ୍କୁ ୩୦ କି.ମି. ବାଟ ଗୁରୁଣ୍ଡି ଗୁରୁଣ୍ଡି ଯିବା ଏସବୁ ଯୋଜନାକୁ ଉପହାସ କରିଲା ଭଳି ଲାଗୁଛି ।