ସୋଲାର ପାନୀୟ ଜଳ ପ୍ରକଳ୍ପ ଅଚଳ : ପାଣି ଟୋପାଏ ପାଇଁ ଲୋକେ ହନ୍ତସନ୍ତ

ଗ୍ରାମାଞ୍ଚଳର ଲୋକମାନଙ୍କୁ ସୁବିଧାରେ ପିଇବା ପାଣି ଯୋଗାଇ ଦେବା ପାଇଁ ବିଭିନ୍ନ ପଂଚାୟତରେ ସରକାର ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ନିର୍ମାଣ କରିଛନ୍ତି ଏକାଧିକ ସୌର ଚାଳିତ ପାନୀୟ ଜଳ ପ୍ରକଳ୍ପ । ହେଲେ ଏହି ପ୍ରକଳ୍ପ ଗୁଡିକ କିଛି ଦିନ କାର୍ଯ୍ୟକ୍ଷମ ହେବାପରେ ଏବେ ଅଚଳ ଅବସ୍ଥାରେ ପଡିରହିଛି । ପାଣି ଟୋପାଏ ପାଇଁ ପ୍ରକଳ୍ପ ଉପରେ ନିର୍ଭରକରି ଆସୁଥିବା ଲୋକମାନେ ନାହିଁ ନଥିବା ହୀନସ୍ତା ହେଉଛନ୍ତି । ପ୍ରକଳ୍ପ ଗୁଡିକର ମରାମତି ପାଇଁ ଯନ୍ତ୍ରୀଙ୍କ ଠାରୁ ଆରମ୍ଭ କରି ନିର୍ବାହୀ ଯନ୍ତ୍ରୀଙ୍କ ଯାଏଁ ସମସ୍ତଙ୍କୁ ଗୁହାରି କରି ଆସୁଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି ।

କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ ବଇଦସାହି ଗାଁରେ ପାଣି ପାଇଁ ହାହାକାର । ନିର୍ମାଣ ହୋଇଛି ଶୌରଚାଳିତ ପାନୀୟ ଜଳ ପ୍ରକଳ୍ପ।ପାଣି ଟାଙ୍କି ବସିଛି। ସୋଲାର ପ୍ଲେଟଲାଗିଛି। ଆଉ ଟ୍ୟୁବୱେଲ ସହ ପାଇପ ସଂଯୋଗ ହୋଇଛି । ହେଲେ ମଟର ଚାଲୁନି କି ଟାଙ୍କିକୁ ପାଣି ଯାଉନି । ୬ମାସ ହେବ ପ୍ରକଳ୍ପ ଅଚଳ ଯୋଗୁ ପାଣି ଟୋପାଏ ପାଇଁ ଗାଁର ଲୋକ ମାନେ ଅନ୍ୟ ଗାଁର ନଳକୂପ ଉପରେ ନିର୍ଭର କରୁଛନ୍ତି ।

ସେହିପରି ମାଳପାଟଣା ଗାଁରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳୁଛି । ଗାଁ ମୁଣ୍ଡରେ ନିର୍ମାଣ ହୋଇଛି ସୌରଚଳିତ ପାନୀୟ ଜଳ ପ୍ରକଳ୍ପ । ପ୍ରକଳ୍ପଟି ପ୍ରକଳ୍ପର ସୋଲାର ବୋର୍ଡ ଭାଙ୍ଗି ପଡିଛି ତ' ଆଉ କେଉଁଠି ପମ୍ପ ଅଚଳ ଅବସ୍ଥାରେ । ୨ବର୍ଷ ହେବ ପ୍ରକଳ୍ପ କାମ କରୁନ ଥିବାରୁ ପାଣି ପାଇଁ ଗାଁ ଲୋକେ ଡହଳ ବିକଳ ହେଉଛନ୍ତି । ୨ଟି ନଳକୂପ ଉପରେ ୨ହଜାର ଲୋକେ ନିର୍ଭର କରୁଥିବାରୁ ପାଣି ଟୋପାଏ ପାଇଁ ମହିଳା ମାନଙ୍କୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି । ପ୍ରକଳ୍ପ ମରାମତି ପାଇଁ ଦାବି କରି ଆସୁଥିଲେ ମଧ୍ୟ କେହି ଶୁଣୁନଥିବା ଲୋକେ ଅଭିଯୋଗ କରିଛନ୍ତି।

୨୦୧୯-୨୦ଆର୍ଥିକ ବର୍ଷରେ ଆଳି ବ୍ଲକର ମାଳପାଟଣା, ଚଣ୍ଡିଆଗଡ଼ି, ନୂଆପଡା, ପତ୍ରପୁର,ସହିରା, ଅରେହିକଣା, ଆଦି ପଂଚାୟତରେ ପାନୀୟଜଳ ସଙ୍କଟ ଦୂର କରିବା ପାଇଁ ଓରେଡା ପକ୍ଷରୁ ୧୫ଟି ସୋରଚଳିତ ପାନୀୟଜଳ ପ୍ରକଳ୍ପ ନିର୍ମାଣ କରାଯାଇଥିଲା । ଆଉ ପ୍ରତି ପ୍ରକଳ୍ପ ପିଛା ୨ଲକ୍ଷ ୬୨ଟଙ୍କା ମଧ୍ୟ ଖର୍ଚ୍ଚ କରାଯାଇଥିଲା । ହେଲେ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗର ରକ୍ଷଣବେକ୍ଷଣ ଅଭାବରୁ ସମସ୍ତ ପ୍ରକଳ୍ପ ଏବେ ଅଚଳ ହୋଇ ପଡିରହିଛି । ଆଉ ଏବେ ପ୍ରକଳ୍ପ ଗୁଡିକ ଖତ ଖାଇବାକୁ ବସିଲାଣି । ଅନ୍ୟ ପକ୍ଷରେ ବିଭାଗୀୟ ଯନ୍ତ୍ରୀଙ୍କ ସହ ଆଲୋଚନାକରୀ ଅଚଳ ହୋଇପଡିଥିବା ପ୍ରକଳ୍ପ ଗୁଡିକୁ ଖୁବ ଶୀଘ୍ର ମରାମତି କରାଯିବ ବୋଲି ଆଳି ବିଡ଼ିଓ କହିଛନ୍ତି ।

ଆଳି ରୁ ବନମାଳୀ ସାହୁଙ୍କ ରିପୋର୍ଟ ଓଟିଭି