ଇତିହାସ ପାଲଟି ଯିବ କି ବଡ଼ ପରଦା ? ଆଉ ଆସୁନାହାନ୍ତି ଦର୍ଶକ, ସିନେମା ହଲ୍ ଆଗରେ ଲାଗିଛି ଟୁ-ଲେଟ୍

ସାଲେପୁର(ମନୋଜ୍ ଆଚାର୍ଯ୍ୟ ) : ହଲରେ ସିନେମା ଦେଖିବାର ମଜା କିଛି ଅଲଗା । ଟିକେ ଫୁରସତର ସମୟ ଆଉ ମନୋରଞ୍ଜନ ପାଇଁ ମନ ହେଲେ ମଣିଷ ହଲ ମୁହାଁ ହୁଏ । ଆଉ ସିନେମା ହଲର ଅନ୍ଧାରିଆ ଘର ଭିତରେ କେମିତି ଦୁଇ ତିନି ଘଣ୍ଟା ବିତିଯାଏ ଜଣାପଡେନା । ଆଉ ରଜ ଦଶହରା ଆସିଲେ ତ ସିନେମା ହଲ ଆଗରେ ଯେପରି ମେଳା ଭଳି ଭିଡ଼ । ହେଲେ କରୋନା କାଳରେ ଆଉ ସେସବୁ ଦେଖିବାକୁ ମିଳୁନି । ସାଲେପୁର ଓ ନିଶ୍ଚିନ୍ତକୋଇଲି ଅଞ୍ଚଳରେ ଏବେ ସମସ୍ତ ସିନେମା ହଲ ବନ୍ଦ ହୋଇପଡ଼ିଛି । ଅନେକ ହଲ୍ ଆଗରେ ତ ଟୁଲେଟ୍ ଲଗାଯାଇଥିବା ଦେଖିବାକୁ ମିଳୁଛି । ଦୀର୍ଘ ୫୦ ବର୍ଷ ଧରି ସଫଳତାର ସହ ଚାଲି ଆସୁଥିବା ଅନେକ ହଲ ଏବେ ବନ୍ଦ ହେବାକୁ ବସିଲାଣି ।

ସାଲେପୁର ସହରରେ ସିନେମାର ବହୁ ଚାହିଦା । ଗାଁ ଗଣ୍ଡାରୁ ଲୋକେ ସିନେମା ଦେଖିବା ପାଇଁ ଆସୁଥିଲେ । ହେଲେ ଏବେ ହଲ ଆଗରେ ଟୁ ଲେଟ ଲେଖା ଯାଇଛି । ଟିକେଟ କାଉଣ୍ଟର ଆଗରେ ଆଉ କେହି ଦେଖାଯାଉ ନାହାଁନ୍ତି । ସୋକାର୍ଡ ବାକ୍ସ ଖାଲି ପଡ଼ିଛି । ସିନେମା ପୋଷ୍ଟର ବି ଆଉ ହଲ ଆଗରେ ଝୁଲୁନି । ଚେୟାର ସବୁ ଭାଙ୍ଗିରୁଜି ଗଲାଣି । ଲକ୍ଷାଧିକ ଟଙ୍କାର ମେସିନ ନଷ୍ଟ ହେଉଛି । ପରଦା ଅଛି ହେଲେ ଆଉ ତାହା ଉପରେ ସିନେମା ଚାଲୁନି । ହଲ ସବୁକୁ ଭଙ୍ଗାଯାଇ ଅଲଗା ବ୍ୟବସାୟିକ ପ୍ରତିଷ୍ଠାନ କରାଯାଉଛି । କାରଣ କରୋନା କଟକଣା ସହ ହଲ ଚଳାଇବା ଆଉ ସମ୍ଭବ ନୁହେଁ । ତେଣୁ ହଲ ବନ୍ଦ କରିବାକୁ ନିଷ୍ପତ୍ତି ନେଇଥିବା ହଲ ମାଲିକମାନେ କହିଛନ୍ତି । ଅନ୍ୟପଟେ ଏହି ସବୁ ଅଞ୍ଚଳର ସିନେମା ପ୍ରେମୀଙ୍କୁ ତାହା ବହୁ ଆଘାତ ଦେଇଛି ।

ତେବେ ହଲ ମାଲିକ ନୁହନ୍ତି। ସିନେମା ହଲ ସହ ସଂପୃକ୍ତ କର୍ମଚାରୀ ଓ ହଲ ବାହାରେ ଥିବା ଛୋଟବଡ଼ ବ୍ୟବସାୟୀଙ୍କ ବ୍ୟବସାୟକୁ କରୋନା ବେଶ୍ ପ୍ରଭାବିତ କରିଛି । ପ୍ରଚାର ଗାଡି ସେଇମିତି ରହି ଖତ ଖାଇଲାଣି। ଏହି ସବୁ ଅଞ୍ଚଳର ବହୁ ପୁରାତନ ସିନେମା ହଲ ଏବେ ମଣ୍ଡପ କିମ୍ବା ଅନ୍ୟାନ୍ୟ ବ୍ୟବସାୟିକ ପ୍ରତିଷ୍ଠାନରେ ରୂପାନ୍ତରିତ ହୋଇସାରିଲାଣି । ଆଉ କିଛି ହଲ ଏବେ ତାର ଅସ୍ଥିତ୍ଵ ହରାଇବାର ଶେଷ ପର୍ଯ୍ୟାୟରେ । ବ୍ୟସ୍ତବହୁଳ ଜୀବନ ଭିତରେ ଟିକିଏ ମନୋରଞ୍ଜନ ଵଂଚାଇ ରଖିବା ପାଇଁ ଏବେ ସମୟ ଆସିଛି ମନୋରଞ୍ଜନର ଏହି ପୁରାତନ ମାଧ୍ୟମକୁ ପୁଣିଥରେ ପରିପୃଷ୍ଟ କରିବା ପାଇଁ । ତେବେ ସରକାର ସହଯୋଗ ନକଲେ ଏହା ଅସମ୍ଭବ ଲାଗୁଛି।