LIVE TV
ନିଷ୍ଠୁର, ବର୍ବର, ବିଭତ୍ସ.. ସୀମା ଟପିଲା ଦାୟିତ୍ୱହୀନତା। ପ୍ରାଣୀ ଚିକିତ୍ସାଳୟର କୁକୁରର ଗୋଡ଼, ବେକକୁ ମାଡ଼ି ବସି ଚାଲିଛି ଷ୍ଟିଜ୍। କୁକୁରଟି କଷ୍ଟ ସହି ନପାରି ଚିତ୍କାର କରୁଛି, ହେଲେ ଯେମିତି କାନ ବୁଜି ଦେଇଛନ୍ତି ଡାକ୍ତର ଓ ହସ୍ପିଟାଲ କର୍ମଚାରୀ। ଗୁରୁତ୍ୱପୂର୍ଣ୍ଣ କଥା ହେଲା, ଅପରେସନ ଥିଏଟର, ବେଡ୍ ଥାଇ ବି କୁକୁରଙ୍କୁ ରଖାଯାଉଥିବା ସ୍ଥାନ କେନେଲ ଓ ସେଇଠି ହିଁ ଚାଲିଛି ସର୍ଜରୀ। ଆହୁରି ସାଂଘାତିକ ଘଟଣା ହେଲା, ଆନାସ୍ଥେସିଆ ନ ଦେଇ ବିନା ଦ୍ୱିଧାରେ ଅପରେସନ କରୁଛନ୍ତି ଡାକ୍ତର। ଭୁବନେଶ୍ୱରରେ ଏଭଳି ଅମାନବୀୟ ଘଟଣା ଦେଖିବାକୁ ମିଳିଛି। ଭୁବନେଶ୍ୱରରେ ବୁଲା କୁକୁରଙ୍କ ବନ୍ଧ୍ୟାକରଣରେ ବ୍ୟାପକ ଅବେହଳା ଓ ଦାୟିତ୍ୱହୀନତା ନେଇ ଅଭିଯୋଗ ହୋଇଛି।
କୁକୁରଙ୍କ ମେଡିସିନ ବାବଦକୁ କୋଟି କୋଟି ଟଙ୍କା ଚଳୁ କରାଯାଇଥିବା ଅଭିଯୋଗ ହୋଇଛି। ଏପରିକି କୁକୁରଙ୍କ ସର୍ଜରୀ ପରେ ମେଡିସିନ ବି ଦିଆଯାଉନି। ଫଳରେ କାହାର ଷ୍ଟିଜ୍ ଖୋଲି ଯାଉଛି ତ କାହାର ଖଣ୍ଡିଆ ଶୁଖୁନି। ଆଉ କିଛି କୁକୁର ଯନ୍ତ୍ରଣା ସହି ନପାରି ମରି ଯାଉଛନ୍ତି। ଏଭଳି ଘଟଣା ସାମ୍ନାକୁ ଆସିବା ପରେ ବିଜେପି ସାଂସଦ ତଥା ପଶୁପ୍ରେମୀ ମେନେକା ଗାନ୍ଧି ଏ ସମ୍ପର୍କରେ ସୋସିଆଲ ମିଡିଆରେ ଉଦ୍ବେଗ ପ୍ରକାଶ କରିଥିଲେ। ଏହାସହ ଘଟଣାରେ ମୁଖ୍ୟମନ୍ତ୍ରୀ ନବୀନ ପଟନାୟକଙ୍କ ହସ୍ତକ୍ଷେପ ସେ ଲୋଡ଼ିଥିଲେ। ଏହାପରେ ନିଜ ଆଡ଼ୁ ତଦନ୍ତ କରି ବିଏମ୍ସି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଭୁବନେଶ୍ୱର ମହାନଗର ନିଗମ ହସ୍ପିଟାଲରେ ୨ ଡାକ୍ତର ଏବଂ ଏସଡିଭିଓ ମନୋଜ ପଟନାୟକଙ୍କୁ ଅନ୍ୟତ୍ର ବଦଳି କରାଯାଇଛି।
ତଥ୍ୟ କହୁଛି, କୁକୁର ବାକରଣ ଯୋଜନାରେ ପ୍ରତି କୁକୁର ପିଛା ୫ ଶହ ଟଙ୍କା ଲେଖାଏ ଖର୍ଚ୍ଚ କରୁଛି ବିଏମ୍ସି। ଆନାସ୍ଥେସିଆ ଏବଂ ମେଡିସିନ ବାବଦକୁ ୩୦୦ ଟଙ୍କା। ଆଉ ଖାଇବା ଓ ଅନ୍ୟାନ୍ୟ ପାଇଁ ୨୦୦ ଟଙ୍କା ଲେଖାଏ ଖର୍ଚ୍ଚ ହେଉଛି। ବିଏମ୍ସି କର୍ତ୍ତୃପକ୍ଷଙ୍କ ସୂଚନା ଅନୁସାରେ, ମାସକୁ ପ୍ରାୟ ୬୦୦ କୁକୁର ପାଇଁ ୩୬ ଲକ୍ଷ ଟଙ୍କା ଖର୍ଚ୍ଚ ହେଉଛି । ହେଲେ କୁକୁରଙ୍କ ଖାଇବା ଦାୟିତ୍ୱରେ ଥିବା ଏନଜିଓ ସଂସ୍ଥାର ଅଭିଯୋଗ, ମାସକୁ ୩୦୦ରୁ ଅଧିକ କୁକୁରଙ୍କର ବାକରଣ ହେଉଛି। ତେବେ ବାକି ୩୦୦ କୁକୁରଙ୍କ ବାକରଣ ଅର୍ଥ ଯାଉଛି କୁଆଡ଼େ ? ଅପରେସନ ବେଳେ ଆନାସ୍ଥେସିଆର ବ୍ୟବହାର କାହିଁକି ଡାକ୍ତର କରୁ ନାହାନ୍ତି ? ଖାଇବା ଦାୟିତ୍ୱରେ ଥିବା ଏନ୍ଜିଓ ସଂସ୍ଥା ଏ ନେଇ ପ୍ରଶ୍ନ କରିବା ସହ ଏସବୁ ବାବଦ ଅର୍ଥ ହରିଲୁଟ୍ ହେଉଥିବା ଅଭିଯୋଗ କରିଛି।
ଅନ୍ୟପକ୍ଷେ, ବିଏମ୍ସି କର୍ତ୍ତୃପକ୍ଷଙ୍କ ସୂଚନା ଅନୁସାରେ, ବିଭାଗ ପକ୍ଷରୁ ଦିଆଯାଇଥିବା ୩୦୦ ଟଙ୍କାରେ ଆନାସ୍ଥେସିଆ ଆଉ ମେଡିସିନ କିଣିବା ସମ୍ଭବ ନୁହେଁ। ଆଉ ସେଥିପାଇଁ ଏ ବାବଦକୁ ୩ ଶହ ବଦଳରେ ୬ ଶହ ଟଙ୍କା କରିବାକୁ ଗତ ମେ’ ୩୧ ତାରିଖରେ ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗକୁ ଟେକ୍ନିକାଲ କମିଟି ସୁପାରିଶ କରିଛି।
(ଭୁବନେଶ୍ୱରରୁ କ୍ୟାମେରାମ୍ୟାନ୍ ଓମ୍କାର୍ ମହାନ୍ତିଙ୍କ ସହ ସୌମ୍ୟ ରଞ୍ଜନ ସାହୁଙ୍କ ରିପୋର୍ଟ)
