ମାସ୍କ ନ ପିନ୍ଧିଲେ ସାଙ୍ଗରେ ନେଇଯାଉଛନ୍ତି ଯମରାଜ୍‌

ସହରରେ ବୁଲୁଛନ୍ତି ମୃତ୍ୟୁର ଦେବତା ଯମ । ସାଥିରେ ଅଛନ୍ତି ଚିତ୍ରଗୁପ୍ତ ଏବଂ ନାରଦ । କରୋନା ସଂକ୍ରମଣ ହାରରେ ରୋକ ଲଗାଇବା ପାଇଁ ଦୋକାନ ବଜାର ବୁଲି ବୁଲି ଯମ ବେଶରେ ଲୋକଙ୍କୁ ସଚେତନ କରୁଛନ୍ତି । ବରଗଡ଼ ସହରରେ ଏପରି ଦୃଶ୍ୟ ଦେଖିବାକୁ ମିଳିଛି । ରାଜ୍ୟରେ ଦୈନିକ କରୋନା ସଂକ୍ରମଣ ବୃଦ୍ଧି ହେବା ସହ ବରଗଡ଼ ଜିଲ୍ଲାରେ ମଧ୍ୟ ସଂକ୍ରମଣ କ୍ରମାଗତ ଭାବରେ ବୃଦ୍ଧି ପାଇବାରେ ଲାଗିଛି । ଏହି ସମୟରେ କରୋନା ଏଡ଼ାଇବାକୁ ସହରରେ ଏକ ନିଆରା ପଦକ୍ଷେପ ନେବା ସହ ସହରବାସୀଙ୍କୁ ସଚେତନ କରିବା ପ୍ରୟାସ କରାଯାଉଛି । ଯେଉଁଥିରେ ଯମ ସହର ସାରା ବୁଲି ବୁଲି ଲୋକଙ୍କୁ ସଚେତନ କରୁଛନ୍ତି ।

କରୋନାର ତୃତୀୟ ଲହରକୁ ଦୃଷ୍ଟିରେ ରଖି ବରଗଡ଼ ସୀତାରାମ କଳା ପରିଷଦର କଳାକାର ଗଣ ଯମ, ଚିତ୍ରଗୁପ୍ତ ବାହାରି ସହର ସାରା ସଚେତନତା ସୃଷ୍ଟି କରୁଛନ୍ତି। କିଛି ମାସର ବ୍ୟବଧାନ ପରେ ବରଗଡ ଜିଲ୍ଲାରେ କରୋନା ଗ୍ରାଫ ପୁଣି ବଢିବାରେ ଲାଗିଛି । ଗତ କିଛି ଦିନ ହେବ ଜିଲ୍ଲାରେ କରେନା ସଂକ୍ରମଣ ବୃଦ୍ଧି ଘଟି ସଂଖ୍ୟାଟି ତିନି ଅଙ୍କ ପାଖାପାଖି ହେଲାଣି। ଆଗକୁ ସଂଖ୍ୟା ଅଧିକ ବୃଦ୍ଧି ଘଟିବାର ଆଶଙ୍କା ରହିଛି । ଏଣୁ ଏଥିରେ ରୋକ ଲଗାଇବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ଆରମ୍ଭ ହେବା ସହ ସତେତନତା ଆରମ୍ଭ ହୋଇ ଯାଇଛି। ଏଥିରେ ବିଭିନ୍ନ ସାମାଜିକ ଅନୁଷ୍ଠାନ ମଧ୍ୟ ସାମିଲ ହୋଇଛନ୍ତି ।

ଜିଲ୍ଲାରେ କରୋନା ଟେଷ୍ଟିଙ୍ଗ ସଂଖ୍ୟାକୁ ବୃଦ୍ଧି କରାଯାଇ ଥିବା ବେଳେ ସମସ୍ତଙ୍କୁ ମାକ୍ସ ପିନ୍ଧିବା ବାଧ୍ୟତା ମୂଳକ କରାଯିବା ସହ ସହରର ବିଭିନ୍ନ ଛକରେ ମାକ୍ସ ଚେକିଂ କରାଯାଉଛି । ଏହାସହ ଲୋକଙ୍କ ମଧ୍ୟରେ ସାମାଜିକ ଦୂରତା ରଖିବା ସହ ଗହଲି ନ କରିବା ପାଇଁ ମାଇକ ଯୋଗେ ସମସ୍ତଙ୍କୁ କୁହାଯାଉଛି । ୫୦ ପ୍ରତିଶତ ଲୋକଙ୍କୁ ନେଇ ହୋଟେଲ , ମଲ, ସିନେମା ହଲ ଚଲେଇବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଜାରି ରହିଥିବା ବେଳେ ସମସ୍ତ ଜନ ସାଧାରଣ ଏଥିରେ ସହଯୋଗ କରିବା ପାଇଁ ବରଗଡ଼ ଜିଲ୍ଲାପାଳ ସମସ୍ତଙ୍କୁ ଅନୁରୋଧ କରିଛନ୍ତି ।