ଚାଲିଛି କଡ଼ା ଚେକିଂ; ୩ ଲକ୍ଷ ୭୦ ହଜାର ଟଙ୍କା ଫାଇନ ଭରିଲା ବରଯାତ୍ରୀ ଗାଡି

ବାହାଘରରୁ ଫେରିଲା ବେଳେ ପକେଟ୍‌ରୁ ଗଲା ୩ ଲକ୍ଷ ୭୦ ହଜାର । ଝାଡ଼ଖଣ୍ଡର କୁର୍ଡେଗକୁ ବାହାଘର ପାଇଁ ଯାଇଥିବା ବରଯାତ୍ରୀ ଗାଡ଼ିକୁ ମୋଟା ଅଙ୍କର ଫାଇନ ଲଗାଯାଇଛି । ଚେକିଂ ବେଳେ ବରଯାତ୍ରୀ ଗାଡ଼ିକୁ ୩ ଲକ୍ଷ ୭୦ ହଜାର ଟଙ୍କା ଫାଇନ ଆଦାୟ କରାଯାଇଛି ।

ସୁନ୍ଦରଗଡ ପରିବହନ ବିଭାଗ ଇନ୍ସପେକଟର ଜିତେନ୍ଦ୍ର କୁମାର ମୁର୍ମୁ ତାଙ୍କ ଟିମ୍ ସହିତ ସଦର ଥାନା କରମଡିହି ନିକଟରେ ଯାଞ୍ଚ କରୁଥିବା ସମୟରେ ରାତି ପ୍ରାୟ ୧୧ଟା ବେଳେ ଦେବଗଡ଼ରୁ କୁର୍ଡେଗକୁ ଏକ ବରଯାତ୍ରୀ ଫେରୁଥିଲା । ଏହି ଗାଡ଼ି କ୍ରିଷ୍ଣାଜୀ ନାମକ ଯାତ୍ରୀବାହି ବସକୁ ଅଟକାଇ ଯାଞ୍ଚ କଲା ବେଳକୁ ବସ୍‌ରେ ଇନ୍‌ସୁରାନ୍ସ, ଫିଟ୍‌ନେସ୍‌, ପଲ୍ୟୁସନ୍‌ ଓ ଟ୍ୟାକ୍ସ ଆଦି କିଛି ବି କାଗଜ ପତ୍ର ନଥିବା ଜଣାପଡିଥିଲା । ଯେଉଁଥିପାଇଁ ପରିବହନ ବିଭାଗ ୩ ଲକ୍ଷ ୭୦ ହଜାର ୧୭୨ ଟଙ୍କା ଫାଇନ ସହ ଗାଡ଼ିକୁ ନିଜ ହେପାଜତକୁ ନେଇଛି ।

ଅନ୍ୟପକ୍ଷେ, ଗତ ଗୁରୁବାର ଦିନ ମଧ୍ୟ ଭୁବନେଶ୍ୱରରେ ଏକ ସ୍କୁଲ୍‌ ବସ୍‌କୁ ପରିବହନ ବିଭାଗ ୨ ଲକ୍ଷ ୩୩ ହଜାର ଟଙ୍କା ଜରିମାନା ଆଦାୟ କରିଥିଲା । ଭୁବନେଶ୍ୱର ଡମଣା ଛକରେ ଯାଞ୍ଚ ବେଳେ ଆରଟିଓ-୨ ଏହି ଫାଇନ୍‌ କାଟିଥିଲା। କେବଳ ଏତିକି ନୁହେଁ ପରିବହନ ବିଭାଗ ଏହି ବସ୍‌ଟିକୁ ଜବତ ମଧ୍ୟ କରିଥିଲା ।