LIVE TV
ବିଦ୍ୟୁତ୍ ବିଭ୍ରାଟ ନେଇ ଟାଟା ପାୱାର ଉପରେ ବର୍ଷିଲେ ବିଜେଡ଼ି ସାଂସଦ ଅମର ପଟ୍ଟନାୟକ । ଲୋଡ଼ ବାଲାନ୍ସିଂ ଠିକ ସେ ହୋଇପାରୁ ନଥିବାରୁ ଲାଇନ କଟୁଥିବା ସେ କହିଛନ୍ତି । ବିଦ୍ୟୁତ ବିତରଣରେ ଗ୍ୟାପ୍ ବା ସଟଫଲ ରହୁଥିବାରୁ ସେଇଟାକୁ ଟାଟା ପାୱାର ଟାଇମ ଟୁ ଟାଇମ ରିଭ୍ୟୁ କରୁନି । ସେହିପରି ସମୟ ଅନୁସାରେ ଅପଗ୍ରେଡ଼ ବି କରାଯାଉନି । ସେଇଟା କରିବାର ଏବେ ସମୟ ଆସିଛି ।
ଛୋଟଠୁ ବଡ଼ ସବୁ ପ୍ରକାର ବିପର୍ଯ୍ୟୟ ସ୍ଥିତିକୁ ନେଇ ଡିଜାଷ୍ଟାର ସିନାରିଓ ପ୍ଲାନ କରାଯାଏ । ହେଲେ ଏଥର ସେସବୁ ଦେଖିବାକୁ ମିଳିଲାନି । ଯଦି ଟାଟା ପାୱାର ସବୁ ପ୍ରକାର ଡିଜାଷ୍ଟର ପ୍ଲାନ କରିପାରିବ, ତେବେ ତାପ୍ରତି ଲୋକଙ୍କ ଆସ୍ଥା ବଢିବ । ଲୋକମାନେ ବି ଜାଣି ପାରିବେ କେତେ ଘଣ୍ଟା ଭିତରେ ତାଙ୍କୁ ବିଜୁଳି ମିଳିବ । ଯେଉଁ କର୍ମଚାରୀ ବି ଅଛନ୍ତି ତାଙ୍କ ଉପରେ ଏକପ୍ରକାର ଚାପ ରହିବ କି ଏତିକି ସମୟ ଭିତରେ ଆମକୁ କାମ ଶେଷ କରିବାକୁ ପଡ଼ିବ ।
Also Read
ରାଜ୍ୟ ସରକାର ଜାତୀୟ ବିପତ୍ତିକୁ ସଫଳତାର ସହ ମୁକାବିଲା କରିପାରୁଛନ୍ତି । ହେଲେ ଟାଟା ପାୱାର ଗୋଟେ ଘରୋଇ ସଂସ୍ଥା ହୋଇ କରିପାରୁନି, ସେଇଟା ସବୁଠୁ ଅଧିକ ଆଶ୍ଚର୍ଯ୍ୟ ଲାଗୁଛି ବୋଲି ଅମର ପଟ୍ଟନାୟକ କହିଛନ୍ତି । ଏହାପୂର୍ବରୁ ବି ବିଭିନ୍ନ ସମୟରେ ବିଦ୍ୟୁତ କାଟ ନେଇ ପ୍ରତିକ୍ରିୟା ରଖିଆସିଛନ୍ତି ଅମର ପଟ୍ଟନାୟକ ।
ସେପଟେ ବିଦ୍ୟୁତ ବିଭ୍ରାଟ ପ୍ରସଙ୍ଗରେ ଶକ୍ତିମନ୍ତ୍ରୀ ପ୍ରତାପ ଦେବ ଯେପରି ମୌନବ୍ରତ କରିଛନ୍ତି । ଶକ୍ତିମନ୍ତ୍ରୀ ଗଣମାଧ୍ୟମର ପ୍ରଶ୍ନକୁ ଆଡେଇ ଯାଇଛନ୍ତି । ଆଜି ଶେଷ ରଥ ସମନ୍ୱୟ ବୈଠକ ଅବସରେ ରଥଯାତ୍ରା ବେଳେ ବିଦ୍ୟୁତ ପରିଚାଳନା ନେଇ ମନ୍ତ୍ରୀଙ୍କୁ ପ୍ରଶ୍ନ ପଚାରିବାରୁ ମୁହଁ ଖୋଲିନଥିଲେ ମନ୍ତ୍ରୀ ।
ଆଗକୁ ବିଶ୍ୱ ପ୍ରସିଦ୍ଧ ରଥଯାତ୍ରା ଥିବା ବେଳେ, ଶ୍ରୀକ୍ଷେତ୍ରରେ ଲକ୍ଷଲକ୍ଷ ଶ୍ରଦ୍ଧାଳୁଙ୍କ ସମାଗମ ହେବ । ତେବେ ଏହି ସମୟରେ କେମିତି ରହିବ ବିଦ୍ୟୁତ ପରିଚାଳନା, କଣ ପଦକ୍ଷେପ ନେଇଛି ଶକ୍ତି ବିଭାଗ ? ଏନେଇ ଗଣମାଧ୍ୟମ ପ୍ରତିନିଧି ପ୍ରଶ୍ନ ପରେ ପ୍ରଶ୍ନ ପଚାରି ଚାଲିଥିବା ବେଳେ, ମନ୍ତ୍ରୀ କିନ୍ତୁ ମୁହଁ ନଖୋଲି ସିଧା ଗାଡ଼ିରେ ବସି ପଳାଇଥିବା ଦେଖିବାକୁ ମିଳିଛି ।..
