ନିଜେ ନିଜେ ନିଷ୍ପତ୍ତି ନେବା କୁଲାଙ୍ଗେଙ୍କୁ ପଡ଼ିଲା କି ମହଙ୍ଗା ? ବଦଳିଲେ BMC କମିଶନର...

ବଦଳିଲେ ଭୁବନେଶ୍ବର ମହାନଗର ନିଗମ କମିଶନର । ନୂଆ କମିଶନର ହୋଇଛନ୍ତି ୨୦୦୫ ବ୍ୟାଚର ଆଇଏଏସ୍ ରାଜେଶ ପ୍ରଭାକର ପାଟିଲ୍‌ । ନୂଆ ବିଏମ୍‌ସି କମିଶନର ନିଯୁକ୍ତି ନେଇ ଜିଏ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଏପଟେ ମାସେ ଛୁଟିରେ ଯାଉଛନ୍ତି ବର୍ତ୍ତମାନ ଥିବା ବିଏମସି କମିଶନର ବିଜୟ ଅମୃତା କୁଲାଙ୍ଗେ। ତାଙ୍କ ଆବେଦନ ଅନୁସାରେ ମାସେ ଛୁଟିରେ ଯାଉଥିବା ସୂଚନା ଦେଇଛି ଜିଏ । ଛୁଟିରୁ ଫେରିଲା ପରେ କୁଲାଙ୍ଗେଙ୍କୁ ନୂଆ ନିଯୁକ୍ତି ମିଳିବ ବୋଲି  ଜଣାପଡିଛି ।

ନିଜେ ନିଜେ ନିଷ୍ପତ୍ତି ଘୋଷଣା କରିବା ବିଜୟ ଅମୃତା କୁଲାଙ୍ଗେଙ୍କୁ ମହଙ୍ଗା ପଡ଼ିଲା କି ? ବିଏମ୍‌ସି ମେୟର ଓ କର୍ପୋରେଟରଙ୍କ ଭତ୍ତା ବୃଦ୍ଧି ପାଇଁ ସେ ଘୋଷଣା କରିଥିଲେ । କର୍ପୋରେସନର ବୈଠକରେ ଯୋଗ ଦେଲେ କର୍ପୋରେଟରଙ୍କୁ ୧୦ ହଜାର ଟଙ୍କା, ମେୟରଙ୍କୁ ୫୦ ହଜାର ଓ ଡେପୁଟି ମେୟରଙ୍କୁ ୨୫ ହଜାର ଟଙ୍କା ଭତ୍ତା ଦେବାକୁ ସେ ଘୋଷଣା କରିଥିଲେ । ମିଡିଆ ସାମ୍ନାକୁ ଆସି ନିଜେ ଏହା ଘୋଷଣା କରିଥିଲେ କୁଲାଙ୍ଗେ । ଏକବିଂଶ ସାଧାରଣ ପରିଷଦ ବୈଠକ ଏହି ନିଷ୍ପତ୍ତି ନିଆଯାଇଥିବା କୁହାଯାଇଥିଲ।  

ପରେ କିନ୍ତୁ ଡେପୁଟି କମିଶନର ସ୍ପଷ୍ଟୀକରଣ ଦେଇଥିଲେ, ମେୟର, ଡେପୁଟି ମେୟର ଓ କର୍ପୋରେଟରଙ୍କ ଭତ୍ତା ବୃଦ୍ଧି ନିଷ୍ପତ୍ତି ନିଆଯାଇନାହିଁ। ବିଏମ୍‌ସିର ବିବୃତିରେ ତ୍ରୁଟି ଥିଲା । ଭତ୍ତା ବୃଦ୍ଧି ପାଇଁ ବିଏମ୍‌ସି ତରଫରୁ ରାଜ୍ୟ ସରକାରଙ୍କୁ କେବଳ ପ୍ରସ୍ତାବ ଦିଆଯାଇଛି । ରାଜ୍ୟ ସରକାର ଅନୁମୋଦନ କଲେ, ତାହା ଲାଗୁ ହେବ । ଏହାର ପର ଦିନ ହିଁ ବିଜୟ ଅମୃତା କୁଲାଙ୍ଗେକୁ ବିଏମ୍‌ସି କମିଶନର ପଦରୁ ଅବ୍ୟାହତି ଦିଆଯାଇଛି। ସେ ମାସେ ଛୁଟିରେ ଯାଇଛନ୍ତି । ଛୁଟିରୁ ଫେରିବା ପରେ ତାଙ୍କୁ ନୂଆ ପଦରେ ନିଯୁକ୍ତ କରାଯିବ ବୋଲି ସାଧାରଣ ପ୍ରଶାସନ ବିଭାଗ ପକ୍ଷରୁ କୁହାଯାଇଛି । କୁଲାଙ୍ଗେଙ୍କ ସ୍ଥାନରେ ରାଜେଶ ପ୍ରଭାକର ପାଟିଲଙ୍କୁ ନୂଆ ବିଏମ୍‌ସି କମିଶନର ପଦରେ ନିଯୁକ୍ତି କରାଯାଇଛି । ଚର୍ଚ୍ଚା ହେଉଛି, ଗତକାଲିର ଘଟଣା ଆଜିର ନିଯୁକ୍ତି ସହିତ କିଛି ସଂପର୍କ ନାହିଁ ତ ?