କୋମାକୁ ଚାଲିଗଲାଣି କୋରାପୁଟର ସବୁ ଆୟୁର୍ବେଦିକ ସଂସ୍ଥା

ସେମିଳିଗୁଡ଼ା ଆୟୁର୍ବେଦ ଚିକିତ୍ସାଳୟରେ ତାଲା ଝୁଲୁଛି । ମହାଦେଇପୁଟ ଚିକିତ୍ସାଳୟରେ କାଉ କୋଇଲିର ବି ଦେଖାନାହିଁ । ଆଉ ହାଟଗୁଡ଼ା ଚିକିତ୍ସାଳୟରେ ଭୂତକୋଠିର ଭ୍ରମ । ଭାତହାଣ୍ଡିରୁ ଗୋଟିଏ ବାଛିଲା ଭଳି ଏ ସବୁ ହେଉଛି କୋରାପୁଟ ଜିଲ୍ଲାରେ କୋମାରେ ପଡ଼ିଥିବା ଆୟୁର୍ବେଦିକ ମେଡିକାଲର ଅବସ୍ଥା । ନା ଏଠାରେ ଡାକ୍ତର ଅଛନ୍ତି ନା ଅଛି ଆବଶ୍ୟକ ଭିତ୍ତିଭୂମି । ଫଳରେ ମାଟିରେ ମିଶିବାକୁ ଗଲାଣି ଏହି ସବୁ ପ୍ରତିଷ୍ଠାନ । କୋରାପୁଟ ଜିଲ୍ଲା ସେମିଳିଗୁଡ଼ାରେ ଥିବା ଏହି ମେଡିକାଲ ୧୯୭୨ ମସିହାରୁ ସେବା ଯୋଗାଇ ଆସୁଥିଲା । ଏବେ କିନ୍ତୁ ଏହା ପୂରାପୁରି ଅକ୍ଷମ ।

ସେପଟେ ସଦର ମହକୁମାରୁ ମାତ୍ର ୬କିଲୋମିଟର ଦୂରରେ ମହାଦେଇପୁଟ ଠାରେ ଥିବା ଆୟୁର୍ବେଦିକ ମେଡିକାଲର ବି ସମାନ ସ୍ଥିତି । ୧୯୮୯ ମସିହାରୁ ସେବା ଯୋଗାଉଥିବା ଏହି ମେଡିକାଲ ଏବେ ବ୍ୟବହୃତ ନହୋଇ ଖତ ଖାଉଛି ।

ସୀମାନ୍ତ ନନ୍ଦପୁର ବ୍ଲକ ପାନ୍ତଲୁମ ପଂଚାୟତର ହାଟଗୁଡାରେ ଥିବା ମେଡିକାଲର ବି ସମାନ ସ୍ଥିତି । ୧୯୮୯ ମସିହାର ଭଙ୍ଗାଦଦରା ଆଜବେଷ୍ଟ ଘର ଓ ଛପର ଭାଙ୍ଗି ଭିତର ପଟୁ ଦିନରେ ସୂର୍ଯ୍ୟ ଓ ରାତିରେ ଚନ୍ଦ୍ର ଦେଖାଯାଉଛି । ତେବେ ଚିକିତ୍ସାଳୟ ଜରାଜିର୍ଣ୍ଣ ଅବସ୍ଥା ଯୋଗୁଁ ନାଁ ଅଛନ୍ତି ଡାକ୍ତର ନା ସେବା ପାଉଛନ୍ତି ଅଞ୍ଚଳବାସୀ ।

କୋରାପୁଟ ଭଳି ବଣପାହାଡ ଘେରା ଆଦିବାସୀ ବହୁଳ ଉପାନ୍ତ ଅଞ୍ଚଳରେ ସରକାରୀ ଉଦ୍ୟମରେ ଖୋଲାଯାଇଥିବା ଏହି ଅନୁଷ୍ଠାନ କାହିଁକି ଚାଲିପାରୁନି ତାକୁ ନେଇ କିନ୍ତୁ ଉଠୁଛି ପ୍ରତିବାଦର ସ୍ୱର ।

(ରିପୋର୍ଟ- କୋରାପୁଟରୁ ସୂର୍ଯ୍ୟ ନାରାୟଣ ପଣ୍ଡା)