ପଞ୍ଚମ ଭିଡିଓ ଛାଡ଼ିଲେ ଅନୁଭବ : ବନ୍ଧୁଙ୍କୁ ସାକ୍ଷୀ ବନାଇଲେ, ଏଥର ଟାର୍ଗେଟରେ କିଏ ?

ଅନୁଭବ ଛାଡ଼ିଲେ ପଞ୍ଚମ ଭିଡିଓ । ଭିଡିଓ ପୋଷ୍ଟ କରି ଟାର୍ଗେଟ କରିବା ଅଭ୍ୟାସକୁ ସହଜରେ ଛାଡ଼ି ପାରୁନାହାନ୍ତି କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି । ନିଜ ୟୁ-ଟ୍ୟୁବ୍ ଚ୍ୟାନେଲରେ ଅନୁଭବ ମହାନ୍ତିଙ୍କ ଆଉ ଏକ ଭିଡିଓ ପୋଷ୍ଟକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି । ଯେଉଁଥିରେ ଅନୁଭବ ଦୀପୁ ନାମକ ଜଣେ ବନ୍ଧୁଙ୍କ ସହ ସାମ୍ନାକୁ ଆସିଛନ୍ତି । ଭିଡିଓରେ ଜଣେ ଭଦ୍ର ମହିଳା ଏବଂ ଅଭିନେତ୍ରୀଙ୍କ ସଂପର୍କରେ କଥା ହେଉଛନ୍ତି ।

ଯାଜପୁର ଜିଲ୍ଲା କତରାପୁର ଗାଁକୁ ଯାଇଥିବା ବେଳେ ସେଠାକୁ ଯାଇଥିବା ଅଭିନେତ୍ରୀ ଜଣଙ୍କ ସେଠାରେ ଥିବା ଲୋକଙ୍କ ପ୍ରତି କିଭଳି ଅଭଦ୍ରୋଚିତ ବ୍ୟବହାର କରିଥିଲେ ଏବଂ ଅନୁଭବ କିଭଳି ସଂପୃକ୍ତ ଅଭିନେତ୍ରୀଙ୍କ ଆଚରଣକୁ ବିରୋଧ କରିଥିଲେ ସେନେଇ ଉଭୟେ ଆଲୋଚନା କରୁଛନ୍ତି । ହେଲେ ସଂପୃକ୍ତ ଅଭିନେତ୍ରୀ ବା ଭଦ୍ର ମହିଳା ଜଣକ କିଏ ତାକୁ ନେଇ ଚର୍ଚ୍ଚା ହେଉଛି । କାରଣ ପୂରା ଭିଡିଓରେ ଉଭୟ ଅନୁଭବ କିମ୍ବା ଦୀପୁ କେହି ବି ସଂପୃକ୍ତ ଅଭିନେତ୍ରୀଙ୍କ ନାଁ ନେଇ ନାହାନ୍ତି ।

ପୂର୍ବରୁ ପତ୍ନୀ ବର୍ଷାଙ୍କ ବିରୋଧରେ ସୋସିଆଲ୍ ମିଡିଆରେ ଅନୁଭବ ଲଗାତର ଭିଡିଓ ପୋଷ୍ଟ କରୁଥିଲେ । ହେଲେ ବର୍ଷା ଏନେଇ ହାଇକୋର୍ଟକୁ ଯିବା ପରେ କେହି କାହା ବିରୋଧରେ ଉଦ୍ଦେଶ୍ୟମୂଳକ ଭାବେ ମନ୍ତବ୍ୟ ଦେଇ ପାରିବେନି କି ଆପତ୍ତିଜନକ ଆକ୍ଷେପ କରିବେ ନାହିଁ ବୋଲି ମାନ୍ୟବର କୋର୍ଟ ତାଗିଦ୍ କରିଥିଲେ । ଏପରିକି ପତ୍ନୀ ବର୍ଷାଙ୍କ ବିରୋଧରେ ସୋସିଆଲ୍ ମିଡିଆରେ ଭିଡିଓ ପୋଷ୍ଟ ନକରିବାକୁ ମଧ୍ୟ ଅନୁଭବଙ୍କୁ ନିର୍ଦ୍ଦେଶ ଦେଇଥିଲେ ମାନ୍ୟବର ହାଇକୋର୍ଟ । ହେଲେ ଏହା ସତ୍ତ୍ୱେ ମଧ୍ୟ ଅନୁଭବଙ୍କ ଏ ସଦ୍ୟ ଭିଡିଓ ବାହାରକୁ ଆସିବା ପରେ ବିଭିନ୍ନ ମହଲରେ ଚର୍ଚ୍ଚା ଆରମ୍ଭ ହୋଇଛି।