LIVE TV
ଭୂତ ନେଉଛି ଭତ୍ତା । ବର୍ଷ ବର୍ଷ ଧରି ମୃତ ବ୍ୟକ୍ତିଙ୍କ ନାଁରେ ହଡପ ହେଉଛି ସରକାରୀ ଭତ୍ତା ଟଙ୍କା । ବଞ୍ଚିଥିବା ଯୋଗ୍ୟ ଲୋକକୁ ମିଳୁନି ହେଲେ ମଲା ଲୋକଙ୍କ ନାଁରେ ଉଠୁଛି ଭତ୍ତା ଟଙ୍କା । କଟକ ଅଞ୍ଚଳରୁ ଏପରି ମାଳମାଳ ଅଭିଯୋଗ ଆସିଛି ।
ଟାଙ୍ଗି ବ୍ଲକ ମାଗୁରା ପଞ୍ଚାୟତ ଗଣେଶ୍ୱରପୁର ଗାଁର ମାଳତୀ ବେୱାଙ୍କର ୨୦୧୪ ମସିହା ଜୁନ୍ ୨୦ ତାରିଖରେ ପରଲୋକ ହୋଇଥିଲା । ତାଙ୍କ ମୃତ୍ୟୁ ବେଳେ ଶୁଦ୍ଧିକ୍ରିୟା ପାଇଁ ପରିବାର ଲୋକଙ୍କୁ ମିଳିନି ହରିଶ୍ଚନ୍ଦ୍ର ଯୋଜନାର ସହାୟତା ରାଶି । ଫଳରେ ସେ ଜୀବିତ ଥିବା ପଞ୍ଚାୟତ ରେଜିଷ୍ଟରରେ ଉଲ୍ଲେଖ ରହିଛି ,ତାରିଖ ପଡିଛି ୨୦୧୯ ନଭେମ୍ବର ମାସ, ଅର୍ଥାତ୍ ମାଳତୀଙ୍କ ନାଁରେ ୫ ବର୍ଷର ଟଙ୍କା ଉଠାଣ ହୋଇଛି ।
ସେହିପରି ମାଗୁରା ପଞ୍ଚାୟତ ସାନଦେବିଲ ଗାଁର ବଟକୃଷ୍ଣ ରାଉତ ଏବଂ ତାଙ୍କ ସ୍ତ୍ରୀ ସତୀ ଦେଇଙ୍କ ସହ ମଧ୍ୟ ସମାନ ଘଟଣା ଘଟିଛି । ମୃତ୍ୟୁକୁ ଅନେକ ବର୍ଷ ବିତିଯାଇଥିଲେ ମଧ୍ୟ ସେମାନଙ୍କ ନାଁରେ ଭତ୍ତା ଟଙ୍କା ଉଠିଥିବା ଦସ୍ତାବିଜ୍ କହୁଛି । ବର୍ତ୍ତମାନ ମାଗୁରା ପଞ୍ଚାୟତର ୪୦ରୁ ଅଧିକ ବ୍ୟକ୍ତିଙ୍କ ନାମରେ ଏପରି ଭତ୍ତା ଜାଲିଆତି ହୋଇଥିବା ଜଣାପଡିବା ପରେ ଅଞ୍ଚଳବାସୀ ବିଡିଓ ଓ ଜିଲ୍ଲାପାଳଙ୍କୁ ଜଣାଇଛନ୍ତି । ଅଭିଯୋଗ ବାଟରେ ଅଭିଯୋଗ ହେଉଛି, କିନ୍ତୁ ଶୁଣୁନି ପ୍ରଶାସନ ।
ସେହିପରି ଟାଙ୍ଗୀ ବ୍ଲକର କରଞ୍ଜି ପଞ୍ଚାୟତରେ ମଧ୍ୟ ବାଟବଣା ମଧୁବାବୁ ପେନସନ ଯୋଜନା । କରଞ୍ଜି ପଞ୍ଚାୟତର ଘନ ସୋରେନଙ୍କର ୨୦୧୯ ଅକ୍ଟୋବରରେ ମୃତ୍ୟୁ ହୋଇଛି । ଅଥଚ ୨୦୨୧ ସେପ୍ଟେମ୍ବର ମାସ ପର୍ଯ୍ୟନ୍ତ ତାଙ୍କ ନାଁରେ ଭତ୍ତା ଟଙ୍କା ଆସୁଥିବା ସରକାରୀ ତଥ୍ୟ କହୁଛି । କିନ୍ତୁ ଘନଙ୍କ ପୁଅ ହରି ସୋରେନଙ୍କ ଅଭିଯୋଗ ଅନୁସାରେ ସେ ଟଙ୍କା ପାଉନାହାନ୍ତି । ତାଙ୍କର ଭତ୍ତା ବାବଦ ୫୦୦ ଟଙ୍କାକୁ ପ୍ରତି ମାସରେ ଆଉ କିଏ ହଡପ କରୁଛି ।
ପରିଣତ ବୟସରେ ଥାଇ ମଧ୍ୟ ବହୁ ହିତାଧିକାରୀ ପେନସନ ଯୋଜନାରେ ସାମିଲ ହୋଇନପାରି ସମସ୍ୟା ଭିତରେ କାଳାତିପାତ କରୁଛନ୍ତି । ପଞ୍ଚାୟତ ଅଫିସର ଓ ସରପଞ୍ଚଙ୍କ ମିଲିଭଗତରେ ଲୋକଙ୍କ ଭତ୍ତା ଟଙ୍କା ହଡପ ହେଉଛି । ଆଉ ବ୍ଲକ ପ୍ରଶାସନ ସବୁ ଜାଣି ଏହା ଉପରେ ଗୁରୁତ୍ୱ ଦେଉନଥିବାରୁ ଏ ଘୋଟାଲାରେ ଆଉ କିଛି ବ୍ୟକ୍ତି ବିଶେଷ ମଧ୍ୟ ସାମିଲ ଥିବା ଅଭିଯୋଗ ହୋଇଛି । ସେପଟେ ଟାଙ୍ଗି ବିଡିଓ ଏ ସମ୍ପର୍କରେ ଅବଗତ ନଥିବା ସଫେଇ ଦେବା ସହିତ ଘଟଣାର ତଦନ୍ତ କରିବେ ବୋଲି କହିଛନ୍ତି ।
ଗରିବ ଲୋକଙ୍କର ଭତ୍ତା ଟଙ୍କା ଖାଉଛି କିଏ ? ଲୋକଙ୍କ ମୃତ୍ୟୁ ପରେ ବି ସେମାନଙ୍କ ଟଙ୍କାକୁ ପ୍ରତି ମାସରେ କିଏ ଉଠଉଛି ? ଟାଙ୍ଗି ବ୍ଲକର ସବୁ ପଞ୍ଚାୟତରେ ଗ୍ରାଉଣ୍ଡ ଜିରୋକୁ ଯାଇ ପ୍ରଶାସନ ସତ ପରଖିବା ଦରକାର । ତାହେଲେ ଯାଇ ସରକାରୀ ଟଙ୍କାକୁ ଆତ୍ମସାତ କରୁଥିବା ବାବୁ ମାନଙ୍କ ଅସଲ ମୁଖା ସାମ୍ନାକୁ ଆସିବ ।
ଚୌଦ୍ୱାରରୁ ପ୍ରକାଶ ନାୟକଙ୍କ ରିପୋର୍ଟ
