ଖେଳନା ଭାବି ଧରିବା ପରେ ଚୋଟ ମାରିଲା ବିଷାକ୍ତ ସାପ, ଚାଲିଗଲା କୁନି ଝିଅର ଜୀବନ

ମୃତ୍ୟୁ ଏମିତି ବି ଆସେ । କବାଟ କଣରେ ଛକି ବସିଥିଲା ମୃତ୍ୟୁ । ଖେଳୁ ଖେଳୁ କୁନି ଝିଅକୁ କାମୁଡି ଦେଲା ବିଷାକ୍ତ ସାପ । ୨୪ ଘଣ୍ଟା ଭିତରେ ଚାଲିଗଲା ନୀରିହ ନିଷ୍ପାପ ଶିଶୁ ଜୀବନ । ଏଭଳି ଏକ ଦୁଃଖଦ ଘଟଣା ଘଟିଛି ବଲାଙ୍ଗିର ଜିଲ୍ଲା ବଙ୍ଗମୁଣ୍ଡା ବ୍ଲକ ଗଞ୍ଜାବାହାଲ ଗାଁରେ । ଏକମାତ୍ର ଝିଅକୁ ହରାଇବା ପରେ ବାପାମା’ କାନ୍ଦି କାନ୍ଦି ଗଡ଼ି ଯାଉଛନ୍ତି । କାନ୍ଦ ବୋବାଳିରେ ଫାଟି ପଡ଼ୁଛି ପୂରା ଗାଁ ।   

ଗତକାଲି ରାତି ପ୍ରାୟ ଆଠଟା ବେଳେ ଡୋଲାମଣି ସଗରିଆଙ୍କ ତିନି ବର୍ଷର ଝିଅ ରୂପା ଘର ଭିତରେ ଏକା ଏକା ଖେଲୁଥିବା ସମୟରେ ଏହି ଅଘଟଣ ଘଟିଛି । ଛୋଟ ଝିଅ ଜାଣିନଥିଲା, ତା ପାଇଁ କବାଟ କଣରେ ଛକି ବସିଛି ମୃତ୍ୟୁ । କେତେବେଳେ ଯେ, କବାଟ କଣକୁ  ଏକ ଛୋଟ ସାପ ଚାଲିଆସିଥିଲା ସେ ବିଷୟରେ କାହାକୁ ଜଣାନଥିଲା । ସାପକୁ ଖେଳଣା ଭାବି ହାତରେ ଧରିବାକୁ ଚେଷ୍ଟା କରୁ କରୁ ହଠାତ କାମୁଡି ଦେଇଥିଲା ବିଷାକ୍ତ ସାପ ।

ତେବେ ପରିବାର ଲୋକେ ଜାଣିବା ପରେ ତୁରନ୍ତ ତାକୁ ଖଡିଆଲ ହସ୍ପିଟାଲ ଏବଂ ପରେ କଣ୍ଟାବାଞ୍ଜି ହସ୍ପିଟାଲ ନେଇଥିଲେ । ଅବସ୍ଥା ଗୁରୁତର ହେବାରୁ ଡାକ୍ତର ଝିଅକୁ ବଲାଙ୍ଗିର ରେଫର କରିଥିଲେ । ହେଲେ ବଲାଙ୍ଗିର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ କୁନି ଝିଅର ଆଜି ସକାଳେ ମୃତ୍ୟୁ ହୋଇଛି । ଏକମାତ୍ର ଝିଅକୁ ହରାଇଥିବା ଡୋଲାମଣିଙ୍କ ପରିବାରରେ ଶୋକର ଛାୟା ଖେଳିଯାଇଛି । ସେପଟେ ବିଷାକ୍ତ ଚିତି ସାପକୁ ପରିବାର ଲୋକେ ଏକ ପ୍ଲାଷ୍ଟିକ ଡବାରେ ଭର୍ତ୍ତି କରି ରଖିଥିବା ଜଣାପଡିଛି ।

(ରିପୋର୍ଟ- ଘଟେଶ୍ୱର ମିଶ୍ର, ବଲାଙ୍ଗୀର)