ଏ କି ଭଲପାଇବା ? ବାପାଙ୍କ ମୃତଦେହ ସହ ୧୫ ବର୍ଷ, ପଡ଼ୋଶୀ ବି ବାରିପାରିଲେନି ଦୁର୍ଗନ୍ଧ

ବେଳେବେଳେ ଏମିତି କିଛି କାହାଣୀ ସାମ୍ନାକୁ ଆସେ, ଯାହାର କେବେ କଳ୍ପନା ମଧ୍ୟ କରାଯାଇନଥାଏ । ମୃତ୍ୟୁ ହେଉଛି ଜୀବନର ଏପରି ଏକ ସତ୍ୟ, ଯାହାକୁ ଅସ୍ୱୀକାର କରାଯାଇପାରିବ ନାହିଁ । ତଥାପି, କିଛି ଲୋକ ନିଜ ପ୍ରିୟଜନଙ୍କୁ ହରାଇ ଏତେ ପରିମାଣର ଦୁଃଖି ହୁଅନ୍ତି ଯେ, ତାଙ୍କୁ ସହଜରେ ଭୁଲି ପାରନ୍ତି ନାହିଁ । ତାଙ୍କ ଅଚାନକ ମୃତ୍ୟୁକୁ ସେ କେବେ ବି ବିଶ୍ୱାସ କରିପାରନ୍ତି ନାହିଁ । ପ୍ରିୟଜନଙ୍କୁ ହରାଇବା ପରେ ସତେ ଯେମିତି ସେମାନେ ଏକ ପ୍ରକାର ପାଗଳ ପ୍ରାୟ ହୋଇଯାଆନ୍ତି । ଆଉ ଏଭଳି କିଛି କାର୍ଯ୍ୟ କରନ୍ତି ଯାହା ଅନ୍ୟମାନଙ୍କୁ ଚକିତ କରିଥାଏ । ଏଭଳି କାର୍ଯ୍ୟକଳାନ ସେମାନଙ୍କର ମାନସିକସ୍ଥିତି ଠିକ୍ ନଥିବାର ପ୍ରମାଣ ଦେଇଥାଏ ।

ଜଣେ ବୃଦ୍ଧ ନିଜ ପତ୍ନୀଙ୍କ ମୃତଦେହ ସହ ଦୀର୍ଘ ବର୍ଷ ବିତାଇଥିବା ନେଇ କାହାଣି ଆପଣ ନିଶ୍ଚୟ ଶୁଣିଥିବେ । ପର୍ତ୍ତୁଗାଲରୁ ମଧ୍ୟ ସମାନ କାହାଣୀ ଏବେ ସାମ୍ନାକୁ ଆସିଛି । ଦ’ ମିରରର ଏକ ରିପୋର୍ଟ ଅନୁଯାୟୀ, ଜଣେ ମହିଳା ନିଜ ପିତାଙ୍କ ମୃତଦେହ ସହିତ ଗୋଟିଏ ଘରେ ଦୁଇ କି ୪ ନୁହେଁ ଏକାଥରକେ ୧୫ ବର୍ଷ ପର୍ଯ୍ୟନ୍ତ ବିତାଇଛନ୍ତି । ଏହି ବାପ-ଝିଅଙ୍କ ଯୋଡ଼ି ସେତେବେଳେ ଭାଙ୍ଗିଲା ଯେତେବେଳେ ମହିଳାଙ୍କର ମୃତ୍ୟୁ ହେଲା ।

୧୫ ବର୍ଷ ପର୍ଯ୍ୟନ୍ତ ପିତାଙ୍କ ମୃତଦେହ ସହିତ ଥିଲା ଝିଅ

ପଡ଼ୋଶୀଙ୍କ କହିବାନୁସାରେ, ୨୦୦୧ ମସିହାରେ ଜଣେ ବ୍ୟକ୍ତି ନିଜ ଝିଅ ସହ ପର୍ତ୍ତୁଗାଲର ରହିବାକୁ ଆସିଥିଲେ । ସେହି ସମାନ ବିଲ୍ଡିଂରେ ସେ ତାଙ୍କର ପରବର୍ତ୍ତୀ ଜୀବନ ବିତାଇଛନ୍ତି । ପୂର୍ବରୁ ତାଙ୍କ ପତ୍ନୀଙ୍କ ମୃତ୍ୟୁ ହୋଇସାରିଥିଲା । ସେହି ଘରେ କେବଳ ବାପ ଝିଅ ରହୁଥିଲେ । ପଡ଼ୋଶୀଙ୍କ କହିବାନୁସାରେ ଶେଷଥର ପାଇଁ ସେମାନେ ୧୫ ବର୍ଷ ତଳେ ଉକ୍ତ ବ୍ୟକ୍ତିଙ୍କୁ ଦେଖିଥିଲେ ।

ତାଙ୍କର ଡକ୍ୟୁମେଣ୍ଟଗୁଡିକର ଭ୍ୟାଲିଡିଟି ମଧ୍ୟ ୨୦୦୫ରେ ଶେଷ ହୋଇଥିଲା । ହେଲେ ସେହି ଘରେ ତାଙ୍କ ଝିଅ ରହି ଆସୁଥିଲେ । କିନ୍ତୁ ସେ କେବେ ବି କାହା ସହ କଥା ହୁଅନ୍ତି ନାହିଁ । ବହୁ କଷ୍ଟରେ ସେ କେତେବେଳେ କେମିତି କାହା ସହ ଅତି ଜରୁରୀ ଥିଲେ କଥା ହୋଇଥିବେ । ସେ ନିଜ ଦୁନିଆରେ ନିଜେ ରହୁଥିଲେ । କାହା କଥାରେ ମୁଣ୍ଡ ପୁରାଉନଥିଲେ କି କାହା ବିଷୟରେ ଚିନ୍ତା କରୁନଥିଲେ ।

ଘର ଭିତରୁ କେବେ କୌଣସି ଦୁର୍ଗନ୍ଧ ଆସିନଥିଲା

ନିକଟରେ ପଡୋଶୀଙ୍କୁ ସେହି ଘରୁ ଦୁର୍ଗନ୍ଧ ହେଲା । ତେଣୁ ସେମାନେ ପୋଲିସ ନିକଟରେ ଅଭିଯୋଗ କଲେ । ଯେତେବେଳେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ବିଲ୍ଡିଂର କବାଟ ଭାଙ୍ଗି ଭିତରେ ପଶିଲା, ସେତେବେଳେ ଦେଖିଲା ଯେ, ୫୫ ରୁ ୬୫ ବର୍ଷ ବୟସର ଜଣେ ମହିଳାଙ୍କ ମୃତଦେହ ସହ ୮୦ ବର୍ଷର ଜଣେ ବ୍ୟକ୍ତିଙ୍କ ମୃତଦେହ ପଡ଼ିଛି ।

ତେବେ ପ୍ରଥମିକ ତଦନ୍ତ କରି ପୋଲିସ ଯାହା ସୂଚନା ଦେଇଛି, ତାହା ହେଲା କିଛି ଦିନ ପୂର୍ବରୁ ମହିଳାଙ୍କର ମୃତ୍ୟୁ ହୋଇଥିବା ବେଳେ ବୃଦ୍ଧଙ୍କ ଶରୀରର କେବଳ କଙ୍କାଳ ରହିଥିଲା । କିନ୍ତୁ ତାଙ୍କ ଦେହରେ ପୋଷାକ ଥିଲା । ମୃତଦେହଟି ସମ୍ପୂର୍ଣ୍ଣ ଶୁଖିଯାଇଥିବା ସହ ତାଙ୍କ ମୃତ୍ୟୁକୁ ଦୀର୍ଘ ବର୍ଷ ବିତିଯାଇଥିବା ପୋଲିସ ଅନୁମାନ କରିଛି ।

ପୋଲିସର କହିବାନୁଯାୟୀ, ଉଭୟଙ୍କର ମୃତ୍ୟୁ ସମ୍ପୂର୍ଣ୍ଣ ରୂପେ ପ୍ରାକୃତିକ । ଆଶ୍ଚର୍ଯ୍ୟର କଥା ହେଉଛି, ଦୀର୍ଘ ବର୍ଷ ଧରି ଘର ଭିତରେ ମୃତଦେହ ପଡ଼ିଥିଲେ ବି ପଡ଼ୋଶୀଙ୍କୁ ଏହାର ସୁରାଗ୍‌ ବି ମିଳିନି । ଏମିତିକି ମୃତଦେହର କୌଣଓ ପ୍ରକାର ଦୁର୍ଗନ୍ଧ ମଧ୍ୟ ପନୋଶୀ ବାରି ପାରି ନାହାନ୍ତି ।