LIVE TV
ଆମେରିକାରେ ରାଷ୍ଟ୍ରପତି ନିର୍ବାଚନରେ ଜିତିବା ପରଠାରୁ ଆକ୍ସନ ମୋଡ୍ରେ ଅଛନ୍ତି ଡୋନାଲ୍ଡ ଟ୍ରମ୍ପ। ଶପଥ ନେବା ପୂର୍ବରୁ ଏବେ ଟିମ୍ ଗଢିବାରେ ଲାଗିପଡିଛନ୍ତି। ନିଜ କ୍ୟାବିନେଟ୍ରେ ଅଭିଜ୍ଞ ଓ ନୂଆ ଚେହେରାଙ୍କୁ ବି ସ୍ଥାନ ଦେଇଛନ୍ତି। ଏଲନ ମସ୍କ, ବିବେକ ରାମସ୍ୱାମୀଙ୍କଠାରୁ ଆରମ୍ଭ କରି ତୁଳସୀ ଗାବାର୍ଡଙ୍କ ଯାଏ ଟ୍ରମ୍ପଙ୍କ 2.0 କ୍ୟାବିନେଟ୍ରେ ଅଛନ୍ତି। ବିଶ୍ୱରେ ଚାଲିଥିବା ଯୁଦ୍ଧ ବନ୍ଦ, ଭୂ-ରାଜନୈତିକ ଅସ୍ଥିରତା ହ୍ରାସ ଓ ଅଶୋଧିତ ତୈଳ ଦରରେ ସ୍ଥିରତା ଆଣିବା ନେଇ ସମ୍ଭାବନା ଦେଖାଦେଇଛି। ଯାହାକି ଭାରତ ପାଇଁ ଏକ ଭଲ ସୁଯୋଗ ଆଣିପାରେ। ଏନେଇ ଷ୍ଟକବ୍ରୋକିଂ ଫାର୍ମ ପ୍ରଭୁଦାସ ଲିଲାଧର ଏକ ରିପୋର୍ଟରେ ସୂଚନା ଦେଇଛି ।
ବର୍ତ୍ତମାନ ଚାଲିଥିବା ଯୁଦ୍ଧକୁ ନେଇ ବିଶ୍ୱ ଯୁଦ୍ଧର ଆଶଙ୍କା ବୃଦ୍ଧି ପାଇଛି। ଏପରି ସ୍ଥିତିରେ ଏହାକୁ କିପରି ରୋକାଯାଇ ପାରିବ ସେନେଇ ବିଚାର ବିମର୍ଶ ଚାଲିଛି। ତେବେ ରିପୋର୍ଟରେ ଦର୍ଶାଯାଇଛି ଯେ, ଟ୍ରମ୍ପଙ୍କ ବୈଦେଶିକ ନୀତି ଐତିହାସିକ ଭାବରେ ଦୀର୍ଘକାଳୀନ ସାମରିକ ଯୋଗଦାନ ଅପେକ୍ଷା ବୁଝାମଣା ଉପରେ ଅଧିକ ଗୁରୁତ୍ୱ ଦେଇଛି। ଏହି ଉପାୟ ସମ୍ଭବତଃ ଋଷ - ୟୁକ୍ରେନ ବିବାଦକୁ ସମାପ୍ତ କରିପାରେ। ଆମେରିକାର ସିନେଟ, ଲୋକସଭା ଏବଂ ସୁପ୍ରିମକୋର୍ଟରେ ରକ୍ଷଣଶୀଳ ପ୍ରମୁଖତା ଉପରେ ରିପବ୍ଲିକାନଙ୍କ ଦୃଢ ନିୟନ୍ତ୍ରଣ ଥିବାରୁ ଟ୍ରମ୍ପଙ୍କ ନେତୃତ୍ୱାଧୀନ ପ୍ରଶାସନ ବ୍ୟାପକ ପରିବର୍ତ୍ତନ ଆଣିବାକୁ ନେଇ ଆଶା କରାଯାଉଛି। ଏହି ପରିବର୍ତ୍ତନଗୁଡ଼ିକ ବିଶ୍ୱସ୍ତରରେ ବ୍ୟବସାୟର ଗତିଶୀଳତା, ଭୌଗୋଳିକ ରଣନୀତି ଏବଂ ନିୟାମକ ଢାଞ୍ଚାକୁ ନୂଆ ରୂପ ଦେଇପାରେ ।
Also Read
ରିପୋର୍ଟରେ ସାଉଦି ଆରବ ଏବଂ ୟୁଏଇ ସହିତ ଟ୍ରମ୍ପଙ୍କ ଦୃଢ କୂଟନୈତିକ ସମ୍ପର୍କ ଥିବା ଉଲ୍ଲେଖ ରହିଛି। ୨୦୨୦ରେ ଆବ୍ରାହାମ ଚୁକ୍ତିରେ ତାଙ୍କର ଭୂମିକା ଏବଂ ସାଉଦି କ୍ରାଉନ୍ ପ୍ରିନ୍ସ ମହମ୍ମଦ ବିନ୍ ସଲମାନଙ୍କ ସହ ତାଙ୍କର ଘନିଷ୍ଠ ସମ୍ପର୍କ ସୂଚାଇ ଦେଇଛି ଯେ, ସେ ଗଲ୍ଫ ଅଞ୍ଚଳରେ ସ୍ଥିରତା ବଜାୟ ରଖିପାରିବେ, ଉତ୍ତେଜନା ହ୍ରାସ କରିପାରିବେ । ଯାହା ଫଳରେ ବିଶ୍ୱ ବାଣିଜ୍ୟରେ ଲାଭ ହୋଇପାରେ। ଶକ୍ତି କ୍ଷେତ୍ରରେ ଦୈନିକ ଘରୋଇ ତୈଳ ଉତ୍ପାଦନ ୧୩ ନିୟୁତ ବ୍ୟାରେଲ କରିବାକୁ ଟ୍ରମ୍ପଙ୍କ ନୀତି ତୈଳଦର ଉପରେ OPECର ପ୍ରଭାବକୁ ଚ୍ୟାଲେଞ୍ଜ କରିପାରେ। ଏହି ପଦକ୍ଷେପ ତୈଳ ରପ୍ତାନିକାରୀ ଭାବରେ ଆମେରିକାର ସ୍ଥିତିକୁ ଦୃଢ କରିବା ସହ ମଧ୍ୟ ପୂର୍ବ ପୂର୍ବାଞ୍ଚଳ ତେଲ ଉପରେ ନିର୍ଭରଶୀଳତା ହ୍ରାସ କରିବ ଏବଂ ଦୀର୍ଘକାଳୀନ ଶକ୍ତି ମୂଲ୍ୟ ସ୍ଥିରତା ନେଇ ନିଶ୍ଚିତ କରିବ ।
ଅଧିକ ପଢ଼ନ୍ତୁ: Israel-Hezbollah Ceasefire: ମଧ୍ୟପ୍ରାଚ୍ୟରେ ବନ୍ଦ ହେବ ଯୁଦ୍ଧ! ଲେବାନନ୍ ସହ ଅସ୍ତ୍ରବିରତି ଚୁକ୍ତିନାମାକୁ ଇସ୍ରାଏଲ୍ର ସମର୍ଥନ
ଟ୍ରମ୍ପଙ୍କ ନେତୃତ୍ୱାଧୀନ ହ୍ୱାଇଟ ହାଉସ କିପରି ଭାରତ ସହିତ ବାଣିଜ୍ୟ ଏବଂ ରଣନୀତିକ ସମ୍ପର୍କ ଉପରେ ପ୍ରଭାବ ପକାଇପାରେ ସେ ସମ୍ବନ୍ଧରେ ରିପୋର୍ଟରେ ଦର୍ଶାଯାଇଛି। ଅବଶ୍ୟ, ଏହା ପ୍ରତିରକ୍ଷା, ଆଇଟି ଏବଂ ବିଶ୍ୱ ସାମର୍ଥ୍ୟ (GCC) ଭଳି କ୍ଷେତ୍ରକୁ ଚିହ୍ନଟ କରିଛି ଯେଉଁଠାରେ ଚୀନ୍ +1 ରଣନୀତି ଅନୁଯାୟୀ ଭାରତ ଉପକୃତ ହୋଇପାରିବ। ଭୂ-ରାଜନୈତିକ ଅସ୍ଥିରତା ହ୍ରାସ ଓ ଅଶୋଧିତ ତୈଳ ଦରରେ ସ୍ଥିରତା ଭାରତର ଆର୍ଥିକ ଆଶାକୁ ମଜବୁତ କରିପାରେ। ଟ୍ରମ୍ପଙ୍କ ପୁନଃ ନିର୍ବାଚନ ବିଶ୍ୱର ଗତିଶୀଳତାକୁ ନୂଆ ରୂପ ଦେଇପାରେ। ଯାହା ଭାରତ ଭଳି ଦେଶ ପାଇଁ ମହତ୍ତ୍ୱପୂର୍ଣ୍ଣ ସୁଯୋଗ ପ୍ରଦାନ କରିପାରିବ।
