ସାରା ବିଶ୍ୱରେ ଖାଦ୍ୟ ସଂକଟ ! ୟୁକ୍ରେନ୍‌ରେ ଗଚ୍ଛିତ ଅଛି ଗହମ, ହେଲେ ବାଟ ବନ୍ଦ କରିଛି ଋଷ

ଗତ ୯୩ ଦିନ ଧରି ଲାଗି ରହିଥିବା ୟୁକ୍ରେନ୍-ରୁଷିଆ ଯୁଦ୍ଧର ସାଇଡ୍ ଇଫେକ୍ଟ ସାମ୍ନାକୁ ଆସିଛି । ଉତ୍କଟ ଖାଦ୍ୟ ସଂକଟ ମୁହାଁ ହୋଇଛି ସାରା ବିଶ୍ୱ । ବିତ୍ତଶାଳୀ ୟୁରୋପୀୟ ରାଷ୍ଟ୍ର ହୁଅନ୍ତୁ କି ପାକିସ୍ତାନ, ଶ୍ରୀଲଙ୍କା ଭଳି ଗରିବ ରାଷ୍ଟ୍ର । ସବୁଠି ଖାଦ୍ୟ ପାଇଁ ହାହାକାର । କାରଣ ବିଶ୍ୱର ଦୁଇ ପ୍ରମୁଖ ଗହମ ରପ୍ତାନୀକାରୀ ରାଷ୍ଟ୍ର ଋଷିଆ ଓ ୟୁକ୍ରେନରୁ ଆସିପାରୁନି ଗହମ । ଯୁକ୍ରେନ ଓ ଋଷିଆର ଶସ୍ୟାଗାର ଗହମରେ ଭର୍ତ୍ତି ହୋଇ ରହିଛି । କେବଳ ୟୁକ୍ରେନ ନିକଟରେ ୨୦ ମିଲିୟନ ଟନ୍ ଗହମ ରହିଛି । ସେହିପରି ଲକ୍ଷ ଲକ୍ଷ ହେକ୍ଟର ଚାଷ ଜମିରେ ବି ଠିଆ ହୋଇଛି ପାଚିଲା ଗହମ ।

ତେବେ ଋଷିଆ କୃଷ୍ଣ ସାଗର ସ୍ଥିତ ୟୁକ୍ରେନର ବନ୍ଦରକୁ କବ୍‌ଜା କରି ରଖିଛି । ଫଳରେ ୟୁକ୍ରେନ ଗହମ ରତ୍ପାନୀ କରିପାରୁନି । ତେଣେ ୟୁକ୍ରେନ ଉପରେ ଆକ୍ରମଣକୁ ନେଇ ଋଷିଆ ବିରୁଦ୍ଧରେ କଠୋର ଆର୍ଥିକ କଟକଣା ଲଗାଇଛନ୍ତି । ଆମେରିକା ଓ ୟୁରୋପୀୟ ଦେଶ ଫଳରେ ଋଷରୁ ଗହମ ରପ୍ତାନୀ ହ୍ରାସ ପାଇଛି । ଏହାକୁ ନେଇ ଏହି ଦୁଇ ଦେଶ ଉପରେ ନିର୍ଭର କରୁଥିବା ରାଷ୍ଟ୍ରରେ ଅଟା ଓ ଅନ୍ୟାନ୍ୟ ଗହମଜାତ ସାମଗ୍ରୀର ଦର ଆକାଶଛୁଆଁ ହୋଇଛି ।

Also Read

ମ୍ୟାରେଜ୍ ବେଳକୁ ପ୍ରେମିକା ହୋଇଗଲା ପୁଅ

Read More

ମାନିବାକୁ ପଡ଼ିବ କୁନି ଝିଅର ଉପସ୍ଥିତ ବୁଦ୍ଧି, ଆଖିବୁଜା ଗୁଳି ପୁଟୁଥିବା ବେଳେ ବଞ୍ଚାଇଲା ନିଜ ଜୀବନ

Read More

ପିଠିରେ ମମତା ହାତରେ ଝାଡୁ

Read More

ଋଷିଆ ବିଶ୍ୱକୁ ୧୩ ପ୍ରତିଶତ ଗହମ ଯୋଗାଉଥିବା ବେଳେ ୟୁକ୍ରେନର ଭାଗ ହେଉଛି ୯ ପ୍ରତିଶତ । ୟୁରୋପୀୟ ଦେଶଙ୍କ ସମେତ କାତାର, ଲେବାନନ୍, ଟ୍ୟୁନିସିଆ, ଲିବ୍ୟା, ଇଣ୍ଡୋନେସିଆ, ମାଲେସିଆ, ପାକିସ୍ତାନ, ବାଂଲାଦେଶ, ଇଜିପ୍ଟ ଭଳି ଏସୀୟ ଓ ଆଫ୍ରିକୀୟ ଦେଶ ୟୁକ୍ରେନ ଗହମ ଉପରେ ବିଶେଷ ଭାବେ ନିର୍ଭରଶୀଳ । ଅତି ଗରୀବ ରାଷ୍ଟ୍ରଙ୍କୁ ଖାଦ୍ୟ ଯୋଗାଣ କରୁଥିବା ଜାତିସଂଘ ଓ୍ୱାଲ୍ଡ ଫୁଡ୍ ପ୍ରୋଗ୍ରାମ ଏହାର ଆବଶ୍ୟକତାର ୪୦ ପ୍ରତିଶତ ଗହମ ୟୁକ୍ରେନରୁ ନିଏ । ତେବେ ୟୁକ୍ରେନ ବନ୍ଦର ବନ୍ଦ ରହିବା ଯୋଗୁଁ ଇଥିଓପିଆ ଓ ସୋମାଲିଆ ଭଳି ଦେଶରେ ଲୋକେ ଭୋକରେ ମରିବା ଆଶଙ୍କା ବଢିଯାଇଛି ।

କେବଳ ଋଷିଆ ୟୁକ୍ରେନ ଯୁଦ୍ଧ ନୁହେଁ ଜଳବାୟୁ ପରିବର୍ତ୍ତନ ଓ ଆର୍ଥିକ ସଂକଟକୁ ନେଇ ଯୁଦ୍ଧ ପୂର୍ବରୁ ବି ଅନେକ ରାଷ୍ଟ୍ର ଉତ୍କଟ ଖାଦ୍ୟଭାବ ସ୍ଥିତିର ସମ୍ମୁଖୀନ ହୋଇଛନ୍ତି । ମରୁଡି କାରଣରୁ କାନାଡାରେ ଗହମ ଓ ତୈଳବୀଜ ଏବଂ ଦକ୍ଷିଣ ଆମେରିକୀୟ ଦେଶରେ ସୋୟାବିନ୍ ଉତ୍ପାଦନ ହ୍ରାସ ପାଇଛି । ଏଣେ କୋଭିଡ୍ ଯୋଗୁଁ ଇଣ୍ଡୋନେସିଆ ଓ ମ୍ୟାଲେସିଆରେ ପାମ୍ ଅଏଲ ଉତ୍ପାଦନ ଅତି ମାତ୍ରାରେ ହ୍ରାସ ପାଇଛି । ପ୍ରବଳ ଖରା କାରଣରୁ ଭାରତରେ ଗହମ ଉତ୍ପାଦନ କମିଛି, ଯାହାକୁ ନେଇ କେନ୍ଦ୍ର ସରକାର ରପ୍ତାନୀ ଉପରେ କଟକଣା ଲଗାଇବାକୁ ବାଧ୍ୟ ହୋଇଛନ୍ତି । ଏଣେ ଆର୍ଥିକ ସଂକଟକୁ ନେଇ ଶ୍ରୀଲଙ୍କା ଓ ପାକିସ୍ତାନ ଖାଦ୍ୟଶସ୍ୟ ଉତ୍ପାଦନ କରିପାରୁନାହାନ୍ତି । ଫଳରେ ବିଶ୍ୱବ୍ୟାପୀ ଖାଦ୍ୟ ସାମଗ୍ରୀର ଦର ଆକାଶଛୁଆ ହୋଇଛି ।

ପଶ୍ଚିମ ଦେଶ ଆର୍ଥିକ କଟକଣା ପ୍ରତ୍ୟାହାର କଲେ ଋଷିଆ ବିଶ୍ୱ ଖାଦ୍ୟ ସଂକଟ ଦୂର ଲାଗି ସହଯୋଗ କରିବ ବୋଲି ଇଟାଲୀ ପ୍ରଧାନମନ୍ତ୍ରୀ ମ୍ୟାରିଓ ଦ୍ରାଘୀଙ୍କ ସହ ଫୋନ୍‌ରେ କଥାହେବା ବେଳେ କହିଛନ୍ତି ଭ୍ଲାଦିମିର ପୁତିନ୍ । ତେବେ ଆମେରିକା ଓ ଏହାର ସହଯୋଗୀ ଏହାକୁ ଗ୍ରହଣ କରୁଛନ୍ତି ନା ନାହିଁ ତାହା ଦେଖିବା କଥା ।