Trump's Cabinet 2025: ଟ୍ରମ୍ପଙ୍କ କ୍ୟାବିନେଟ୍‌ରେ ସାମିଲ୍ ହେଲେ ତୁଳସୀ; ମିଳିଲା ବଡ଼ ପଦବୀ

ଟ୍ରମ୍ପଙ୍କ କ୍ୟାବିନେଟ୍‌ରେ ଆଉ ଜଣେ ଆମେରିକୀୟ ହିନ୍ଦୁଙ୍କୁ ମିଳିଲା ସ୍ଥାନ।  ଗତକାଲି ବିବେକ ରାମସ୍ୱାମୀଙ୍କୁ ନିଜ ଟିମ୍‌ରେ ସାମିଲ କରିଥିବା ବେଳେ ଆଜି କଂଗ୍ରେସର ପୂର୍ବତନ ଡେମୋକ୍ରାଟିକ୍ ସଦସ୍ୟ ତଥା ରାଷ୍ଟ୍ରପତି ପ୍ରାର୍ଥୀ ତୁଳସୀ ଗାବାର୍ଡଙ୍କୁ କ୍ୟାବିନେଟ୍‌ରେ ସ୍ଥାନ ଦେଇଛନ୍ତି। ଟ୍ରମ୍ପ ତାଙ୍କୁ ନ୍ୟାସନାଲ ଇଣ୍ଟେଲିଜେନ୍ସର ନିର୍ଦ୍ଦେଶକ ଭାବରେ ମନୋନୀତ କରିଛନ୍ତି। ତେବେ ଶପଥ ନେବା ପୂର୍ବରୁ ଏବେ ଟିମ୍‌ ଗଢିବାରେ ଲାଗିପଡିଛନ୍ତି ଡୋନାଲ୍ଡ ଟ୍ରମ୍ପ।

ଆମେରିକାର ରାଷ୍ଟ୍ରପତି ଭାବେ ନିର୍ବାଚିତ ହୋଇଥିବା ଡୋନାଲ୍ଡ ଟ୍ରମ୍ପ ତୁଳସୀ ଗାବାର୍ଡଙ୍କୁ ନ୍ୟାସନାଲ ଇଣ୍ଟେଲିଜେନ୍ସର ନିର୍ଦ୍ଦେଶକ ବା ଜାତୀୟ ଗୁପ୍ତଚର ନିର୍ଦ୍ଦେଶକ ଭାବରେ ମନୋନୀତ କରିଛନ୍ତି। ଟ୍ରମ୍ପ ଏକ ବିବୃତ୍ତିରେ କହିଛନ୍ତି ଯେ ପୂର୍ବତନ ଡେମୋକ୍ରାଟିକ୍ ରାଷ୍ଟ୍ରପତି ପ୍ରାର୍ଥୀ ଭାବରେ ସେ ଉଭୟ ଦଳରେ ବ୍ୟାପକ ସମର୍ଥନ ପାଇଛନ୍ତି - ସେ ବର୍ତ୍ତମାନ ଜଣେ ଗର୍ବିତ ରିପବ୍ଲିକାନ୍! "ମୁଁ ଜାଣେ ତୁଳସୀ ଆମର ଇଣ୍ଟେଲିଜେନ୍ସ କମ୍ୟୁନିଟିକୁ ସଠିକ ଭାବରେ ସମ୍ଭାଳି ପାରିବେ। ସେ ନିଶ୍ଚିତ ଭାବରେ ଆମକୁ ଗୌରବାନ୍ୱିତ କରିବେ’’।

ଅଧିକ ପଢ଼ନ୍ତୁ: ହ୍ୱାଇଟ୍ ହାଉସ୍‌ରେ ବାଇଡେନ୍‌ଙ୍କୁ ଭେଟିଲେ Donald Trump; ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କଲେ ଆଲୋଚନା

ଦୁଇ ଦଶନ୍ଧିରୁ ଅଧିକ ସମୟ ଧରି ଆର୍ମି ନ୍ୟାସନାଲ ଗାର୍ଡରେ କାର୍ଯ୍ୟ କରିଥିବା ଗାବାର୍ଡ, ଇରାକ ଏବଂ କୁଏତରେ ନିୟୋଜିତ ହୋଇଥିଲେ। ବର୍ତ୍ତମାନର ନିର୍ଦ୍ଦେଶକ ଅବ୍ରିଲ୍ ହେନ୍ସ ୨୦୨୧ ମସିହାରେ ଜାତୀୟ ସୁରକ୍ଷା ଏବଂ ଗୁପ୍ତଚର ପଦବୀରେ ରହିବା ପରେ ସିନେଟ୍ ଦ୍ୱାରା ମନୋନୀତ ହୋଇଥିଲେ। ତେବେ ଟ୍ରମ୍ପ ତାଙ୍କ ଏଜେନ୍ସିର ନେତୃତ୍ୱ ନେବାକୁ ତୁଳସୀଙ୍କୁ ବାଛିଛନ୍ତି। ସେ ନିର୍ବାଚନ ପୂର୍ବରୁ ଟ୍ରମ୍ପଙ୍କ ପାଇଁ ଜୋରଦାର୍ ପ୍ରଚାର କରିଥିଲେ ଓ ଜନତା ମଧ୍ୟ ତାଙ୍କ କଥାକୁ ଗ୍ରହଣ କରୁଥିଲେ।

ତୁଳସୀ ଗାବାର୍ଡ କିଏ?

ଆମେରିକୀୟ ଜନ୍ମିତ ତୁଳସୀଙ୍କ ମା’ ଇଣ୍ଡିଆର ହୋଇଥିବା ବେଳେ ପିତା ସାମୋଆ ଏବଂ ୟୁରୋପୀୟ ବଂଶର ଅଟନ୍ତି । ହିନ୍ଦୁ ଧର୍ମ ପ୍ରତି ତାଙ୍କର ଆଗ୍ରହ ଥିବାରୁ ସେମାନେ ତାଙ୍କ ନାଁ ତୁଳସୀ ଦେଇଥିଲେ। ତୁଳସୀ ଗାବାର୍ଡଙ୍କ ପ୍ରଥମ ନାମ ହେତୁ ଅନେକ ସମୟରେ ଭାରତୀୟ ବଂଶଧର ବୋଲି ଭାବନ୍ତି। ତାଙ୍କର ପ୍ରଥମ ନାମ ହିନ୍ଦୁ ଧର୍ମ ଅନୁଯାୟୀ ହୋଇଥିବାବେଳେ ଗାବାର୍ଡଙ୍କର ଭାରତ ସହିତ କୌଣସି ପ୍ରତ୍ୟକ୍ଷ ସମ୍ପର୍କ ନାହିଁ। ତାଙ୍କ ମା’ ହିନ୍ଦୁ ଧର୍ମ ଗ୍ରହଣ କରିଥିଲେ ଏବଂ ତାଙ୍କର ସମସ୍ତ ପିଲାମାନଙ୍କୁ ହିନ୍ଦୁ ନାମ ଦେଇଥିଲେ। ଗାବାର୍ଡ ନିଜକୁ ଜଣେ ହିନ୍ଦୁ ବୋଲି ମଧ୍ୟ ଭାବନ୍ତି।

କଂଗ୍ରେସର ପୂର୍ବତନ ସଦସ୍ୟ ତୁଳସୀ ଗାବାର୍ଡ ଆମେରିକାର ପ୍ରଥମ ହିନ୍ଦୁ କଂଗ୍ରେସ ମହିଳା ଭାବରେ ମାନ୍ୟତା ପାଇଛନ୍ତି। ହାୱାଇ ଆର୍ମି ନ୍ୟାସନାଲ ଗାର୍ଡରେ ନାମ ଲେଖାଇବା ପରେ ସେ ଇରାକରେ ମଧ୍ୟ କାର୍ଯ୍ୟ କରିଥିଲେ। ସେ ଆମେରିକାର ରାଷ୍ଟ୍ରପତି ଦୌଡରେ ଥିବା ପ୍ରଥମ ମହିଳା ଭେଟେରାନ ନେତା ଭାବରେ ୨୦୧୯ ରାଷ୍ଟ୍ରପତି ନିର୍ବାଚନ ଅଭିଯାନରେ ବ୍ୟାପକ ଦୃଷ୍ଟି ଆକର୍ଷଣ କରିଥିଲେ।

ତେବେ ସେ ପରେ ରେସ୍‌ରୁ ଓହରି ଯାଇ ଜୋ ବାଇଡେନଙ୍କୁ ସମର୍ଥନ କରିଥିଲେ। ତୁଳସୀ ଗାବାର୍ଡ ୨୦୨୨ ରେ ଡେମୋକ୍ରାଟିକ୍ ପାର୍ଟି ଛାଡିବା ପୂର୍ବରୁ ୨୦୧୩ ରୁ ୨୦୨୧ ପର୍ଯ୍ୟନ୍ତ ହାୱାଇର ଦ୍ୱିତୀୟ କଂଗ୍ରେସ ଜିଲ୍ଲା ପାଇଁ ଗଣତାନ୍ତ୍ରିକ ପ୍ରତିନିଧୀ ଭାବରେ କାର୍ଯ୍ୟ କରିଥିଲେ। ତେବେ ଡେମୋକ୍ରାଟ୍ ପାର୍ଟିରୁ ଅଲଗା ହୋଇ ନିର୍ବାଚନ ସମୟରେ ରିପବ୍ଲିକାନ୍ ପାର୍ଟିରେ ଯୋଗ ଦେଇଥିଲେ। ନିର୍ବାଚନ ବିତର୍କରେ ହାରିସଙ୍କୁ ପରାସ୍ତ କରିବାକୁ ଟ୍ରମ୍ପ ତୁଳସୀଙ୍କ ସହାୟତା ମଧ୍ୟ ଲୋଡ଼ିଥିଲେ।

ଅଧିକ ପଢ଼ନ୍ତୁ: ଟିମ୍‌ ଗଢିବାରେ ବ୍ୟସ୍ତ Donald Trump; ଏଲନ ମସ୍କଙ୍କୁ ଦେଲେ ବଡ଼ ଦାୟିତ୍ୱ