LIVE TV
ଦକ୍ଷିଣ ପେରୁ (Peru)ର ଏକ ନିର୍ଜନ ଅଞ୍ଚଳରେ ଥିବା ସୁନାଖଣି (gold mine )ରେ ଭୀଷଣ ଅଗ୍ନିକାଣ୍ଡ । ରବିବାର( ମେ ୭)ରେ ଏହି ଅଗ୍ନିକାଣ୍ଡ ଘଟିଛି । ଏହି ଅଘଟଣରେ ୨୭ ଜଣ ଶ୍ରମିକ ଜୀବନ୍ତ ଦଗ୍ଧ ହୋଇଯାଇଛନ୍ତି । ସ୍ଥାନୀୟ ସରକାରୀ ଅଧିକାରୀ ଏସମ୍ପର୍କରେ ସୂଚନା ନେଇଛନ୍ତି । ସେମାନେ ଏହି ଘଟଣାକୁ ପେରୁର ଇତିହାସରେ ସବୁଠାରୁ ଖରାପ ଖଣି ଦୁର୍ଘଟଣା ବୋଲି କହିଛନ୍ତି ।
ସୁନା ଖଣିରେ ନିଆଁ ଲାଗିବା ପରେ ପୀଡିତର ସମ୍ପର୍କୀୟମାନେ ସେମାନଙ୍କ ପ୍ରିୟଜନଙ୍କୁ ଖୋଜିବା ପାଇଁ ଘଟଣାସ୍ଥଳରେ ପହଞ୍ଚିଥିଲେ । ନିଜ ଲୋକଙ୍କ ମୃତ୍ୟୁ ପରେ କାନ୍ଦବୋବାଳିରେ ଫାଟି ପଡ଼ିଥିଲା ଆଖପାଖ ଅଞ୍ଚଳ । କାହାର ବାପା ତ କାହାର ପୁଅ, ପୁଣି କିଏ ସ୍ୱାମୀକୁ ହରାଇ ଛାତିପିଟି କାନ୍ଦୁଥିଲା । ଖଣି ଭିତରେ ୨୭ଜଣଙ୍କର ମୃତ୍ୟୁ ଘଟିଥିବା କଥା ପବ୍ଲିକ୍ ପ୍ରୋସିକ୍ୟୁଟର୍ ଜିଓଭାନି ମାତୋସ୍ ଏକ ଟେଲିଭିଜନ୍ ଚ୍ୟାନେଲକୁ କହିଛନ୍ତି ।
Also Read
ସର୍ଟସର୍କିଟ୍ ଯୋଗୁଁ ଅଗ୍ନିକାଣ୍ଡ...
କଣ୍ଡେସୁୟସ୍ ପ୍ରଦେଶ ଅନ୍ତର୍ଗତ ୟାନାକୱିହୁଆ ନଗରୀରେ ଥିବା ଖଣିରେ ବିସ୍ଫୋରଣ ଘଟିବା ପରେ ନିଆଁ ଲାଗିଛି । ସୁନାଖଣିର ଗୋଟାଏ ସୁଡ଼ଙ୍ଗରେ ସର୍ଟସର୍କିଟ୍ ଯୋଗୁଁ ଏହି ନିଆଁ ବ୍ୟାପିଥିବା କୁହାଯାଉଛି । ବିସ୍ଫୋରଣ ଯୋଗୁଁ ଖଣି ଭିତରେ ଲାଗିଥିବା କାଠ ଖୁଣ୍ଟ ଗୁଡ଼ିକ ହୁ ହୁ ହୋଇ ଜଳି ଉଠିଥିଲା । ଅଗ୍ନିକାଣ୍ଡ ସମୟରେ ଖଣି ଭିତର କିଛି ମିଟର ଭିତରେ ଶ୍ରମିକମାନେ କାମ କରୁଥିଲେ ।
ନିଆଁ ଲାଗିଥିବା ଖଣିର ଗଭୀରତା ୧୦୦ ମିଟର ବୋଲି କୁହାଯାଉଛି । ଅଧିକାଂଶ ଶ୍ରମିକ ଧୂଆଁରେ ଅଣନିଶ୍ୱାସି ହୋଇ ତଥା ପୋଡ଼ି ହୋଇ ମରିଯାଇଥିବା ଗଣମାଧ୍ୟମକୁ ସୂଚନା ମିଳିଛି ।
ତେବେ ମୃତକଙ୍କର ଶବ ଉଦ୍ଧାର କରିବା ପୂର୍ବରୁ ଉଦ୍ଧାରକାରୀ ଦଳ ପ୍ରଥମେ ଖଣିରେ ଲାଗିଥିବା ନିଆଁ ଲିଭାଇଥିଲେ । କାରଣ ଭିତରକୁ ପ୍ରବେଶ କରି ଶବ ଉଦ୍ଧାର କରିବା ନିମନ୍ତେ ତାହାହିଁ ଏକମାତ୍ର ଉପାୟ ଥିଲା । ତେବେ ଅଗ୍ନିକାଣ୍ଡ ସମୟରେ କେତେ ଜଣ ଶ୍ରମିକ କାମ କରୁଥିଲେ ତଥା ଆଉ କିଏ ବଞ୍ଚିଛନ୍ତି କି ନାହିଁ , ସେ ସମ୍ପର୍କରେ କୌଣସି ଖବର ମିଳିନାହିଁ।
