Nobel Peace Prize: ନୋବେଲ ଶାନ୍ତି ପୁରସ୍କାର ପାଇବେ କି ଟ୍ରମ୍ପ? ପାକିସ୍ତାନ ପରେ ସୁପାରିସ୍ କଲେ ନେତାନ୍ୟାହୁ

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଦୃଢ ସମର୍ଥନ କରିଛି ଇସ୍ରାଏଲ । ନୋବେଲ ଶାନ୍ତି ପୁରସ୍କାର ପାଇଁ ଟ୍ରମ୍ପଙ୍କ ନାଁ ସୁପାରିସ୍ କରିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ । ନୋବେଲ ଶାନ୍ତି ପୁରସ୍କାର ପାଇଁ ଟ୍ରମ୍ପଙ୍କୁ ମନୋନୀତ କରାଯାଇଥିବା କହିଛନ୍ତି ନେତାନ୍ୟାହୁ । ସୋମବାର ହ୍ୱାଇଟ ହାଉସରେ ବ୍ୟକ୍ତିଗତ ରାତ୍ରୀଭୋଜନ ପାଇଁ ଯାଇଥିବା ବେଳେ ବୈଠକ ସମୟରେ ଟ୍ରମ୍ପଙ୍କୁ ନୋମିନେସନ ଚିଠି ଦେଇଛନ୍ତି ନେତାନ୍ୟାହୁ । 

ଅଧିକ ପଢନ୍ତୁ: ନୋବେଲ ଶାନ୍ତି ପୁରସ୍କାର ପାଇଁ ଟ୍ରମ୍ପଙ୍କ ନାଁ ସୁପାରିଶ କଲା ପାକିସ୍ତାନ

ନେତାନ୍ୟାହୁ କହିଛନ୍ତି, ନୋବେଲ ପୁରସ୍କାର କମିଟିକୁ ପଠାଇଥିବା ଚିଠିକୁ ଆପଣଙ୍କୁ ପ୍ରଦାନ କରିବାକୁ ଚାହୁଁଛି । ଆପଣଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରାଯାଇଛି । ଯେଉଁଥିପାଇଁ ଆପଣ ଯୋଗ୍ୟ ଓ ଆପଣ ଏହା ପାଇବା ଉଚିତ୍ । ଏହା ପରେ ନେତାନ୍ୟାହୁଙ୍କୁ ଧନ୍ୟବାଦ ଜଣାଇଛନ୍ତି ଟ୍ରମ୍ପ ଓ ଏହାକୁ ବହୁତ ଅର୍ଥପୂର୍ଣ୍ଣ ବୋଲି କହିଛନ୍ତି । 

ଅନେକ ଦେଶରେ ଶାନ୍ତି ଓ ସୁରକ୍ଷା ପାଇଁ ଟ୍ରମ୍ପଙ୍କ ପ୍ରୟାସକୁ ପ୍ରଶଂସା କରିଛନ୍ତି ନେତାନ୍ୟାହୁ । ବିଶେଷକରି ଟ୍ରମ୍ପଙ୍କ ନେତୃତ୍ୱରେ ମଧ୍ୟପ୍ରାଚ୍ୟରେ ଶାନ୍ତି ସ୍ଥାପନ ହୋଇଥିବା ସେ କହିଛନ୍ତି । ଆମେ ଶାନ୍ତି ସ୍ଥାପନ ପାଇଁ କହୁଥିବା ବେଳେ ଟ୍ରମ୍ପ ଗୋଟିଏ ପରେ ଗୋଟିଏ ରାଷ୍ଟ୍ରରେ ଶାନ୍ତି ସ୍ଥାପନ କରିଛନ୍ତି । 

ସୂଚନାଯୋଗ୍ୟ, ଟ୍ରମ୍ପ ଦୀର୍ଘ ସମୟ ଧରି ନିଜକୁ ଶାନ୍ତି ସ୍ଥାପନକାରୀ ବୋଲି କହିବା ସହ ନୋବେଲ ଶାନ୍ତି ପୁରସ୍କାର ପାଇଁ ତାଙ୍କ ଇଚ୍ଛା ଜାହିର କରିଛନ୍ତି । ପୂର୍ବରୁ ପାକିସ୍ତାନ ମଧ୍ୟ ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ସୁପାରିସ୍ କରିଥିଲା । ଟ୍ରମ୍ପଙ୍କ କୂଟନୈତିକ ରଣନୀତିକୁ ପ୍ରଶଂସା କରି ପାକିସ୍ତାନ ନୋବେଲ ଶାନ୍ତି ପୁରସ୍କାର ୨୦୨୬ ପାଇଁ ଟ୍ରମ୍ପଙ୍କ ନାମ ସୁପାରିସ୍ କରିଥିଲା ।

ଅଧିକ ପଢନ୍ତୁ: ଟ୍ରମ୍ପଙ୍କୁ ମନେ ପକାଇଦେଲେ ଥରୁର୍, ଭୁଲିଗଲଣି କି ୨୦୦୧ କଥା ?