Moments After Attack: ସାମନାକୁ ଆସିଲା ଆମେରିକା ବାୟୁସେନା ଘାଟି ଉପରେ ଆକ୍ରମଣ କରିବା ବେଳର ସେହି ଛାତିଥରା ଦୃଶ୍ୟ

ଇସ୍ରାଏଲ ଓ ଇରାନ ମଧ୍ୟରେ ଘନଘନ ମିଜାଇଲ ମାଡ ପରେ ଆମେରିକାର ଏଣ୍ଟ୍ରି ଯୁଦ୍ଧକୁ ଆହୁରି ଘନେଇଥିଲା । ଇସ୍ରାଏଲ ଓ ଇରାନ ଯୁଦ୍ଧ ମଧ୍ୟରେ ଆମେରିକାର ଏଣ୍ଟ୍ରି ପରେ ଆମେରିକା ମଧ୍ୟ ଏହି ଯୁଦ୍ଧର ଏକ ଅଂଶ ହୋଇଥିଲା । ଇରାନର ପରମାଣୁ କେନ୍ଦ୍ର ଉପରେ ଆକ୍ରମଣ କରିବା ପରେ ଆମେରିକା ଉପରେ ପ୍ରତିଶୋଧ ନେଇଥିଲା ଇରାନ । ଆମେରିକାର ବାୟୁସେନା ଘାଟିକୁ ଟାର୍ଗେଟ କରିଥିଲା ଇରାନ । କତାରର ରାଜଧାନୀ ଦୋହାରେ ଥିବା ଅଲ ଉଦେଦ ବାୟୁସେନା ଘାଟି ଉପରେ ଆକ୍ରମଣ ପରେ ଦୋହାରେ ଭୟଙ୍କର ପରିସ୍ଥିତି ସୃଷ୍ଟି ହୋଇଥିଲା । 

ଅଧିକ ପଢନ୍ତୁ: ଆମେରିକାର ଏୟାରବେସ୍ ଉପରେ ଭୟଙ୍କର ମିଜାଇଲ ମାଡ କଲା ଏହି ଦେଶ

ମଧ୍ୟପ୍ରାଚ୍ୟରେ ସବୁଠୁ ବିକଶିତ ସହର ମଧ୍ୟରୁ ଗୋଟିଏ ଦୋହାର ଅନେକ ସ୍ଥାନରେ ବିସ୍ଫୋରଣର ଶବ୍ଦ ହୋଇଥିଲା । ସହରରେ ସାଇରନ ବାଜିଥିଲା, ଏୟାର ଡିଫେନ୍ସ ସିଷ୍ଟମ କାର୍ଯ୍ୟକାରୀ ହୋଇଥିଲା । ଏପରିକି ଦୋହାର ଏକ ମଲରେ ବିସ୍ଫୋରଣର ଶବ୍ଦ ହେବା ପରେ ଲୋକମାନେ ଭୟଭୀତ ହୋଇ ଚିତ୍କାର କରି ଲୋକମାନେ ମଲ୍ ବାହାରକୁ ଦୌଡୁଥିବାର ଭିଡିଓରେ ଦେଖାଦେଇଛି । ମହିଳା ଓ ଶିଶୁଙ୍କ ସମେତ ସମସ୍ତେ ମଲର ପ୍ରସ୍ଥାନ ଦ୍ୱାର ଦେଇ ବାହାରକୁ ଯାଉଥିବାର ଦେଖାଦେଇଛି । 

ଇରାନର ଏହି ଆକ୍ରମଣ ପରେ କତାର ସମେତ କୁଏତ, ବାହାରିନ ଓ ୟୁଏଇ ଭଳି ଦେଶ ନିଜ ବାୟୁସୀମା ବନ୍ଦ କରି ଦେଇଥିଲେ । ‘‘ଇରାନ ଏହି ଆକ୍ରମଣରେ ଏତେ ମିଜାଇଲ ବ୍ୟବହାର କରିଥିଲା ଯେ, ଆମେରିକା ପରମାଣୁ କେନ୍ଦ୍ରକୁ ଟାର୍ଗେଟ କରି ମାରିଥିବା ବୋମା ସଂଖ୍ୟା ସହ ସମାନ ହେବ । କତାରର ସହରାଞ୍ଚଳ ଓ ଆବାସିକ ଅଞ୍ଚଳଠାରୁ ଦୂରରେ ଏହି ଟାର୍ଗେଟ କରାଯାଇଥିଲା । ଯେପରି ସାଧାରଣ ନାଗରିକଙ୍କ କ୍ଷତି ନହୁଏ, ସେଥିପ୍ରତି ଧ୍ୟାନ ଦିଆ ଯାଇଥିଲା’’ ବୋଲି ଇରାନର ସର୍ବୋଚ୍ଚ ଜାତୀୟ ସୁରକ୍ଷା ପରିଷଦର ସଚିବାଳୟ ପକ୍ଷରୁ ଜାରି ବିବୃତ୍ତିରେ କୁହାଯାଇଥିଲା । 

ଇରାନର ସଶସ୍ତ୍ରବାହିନୀର ଜଣେ ଅଧିକାରୀ କହିଛନ୍ତି, ‘‘ରିଭ୍ୟୋଲୁସନାରୀ ଗାର୍ଡ୍ସ କର୍ପସ ଦ୍ୱାରା ଆମେରିକାର ବିମାନ ଘାଟି ଉପରକୁ ଆକ୍ରମଣ ହୋଇଥିଲା । ଆମେ ଆମର ଶତ୍ରୁଙ୍କୁ ଚେତାଇ ଦେଉଛୁ ଯେ, ହିଟ ଆଣ୍ଡ ରନ ଯୁଗ ଶେଷ ହୋଇଯାଇଛି ।’’

ଅଲ୍ ଉଦେଦ ହେଉଛି ମଧ୍ୟପ୍ରାଚ୍ୟରେ ଥିବା ଆମେରିକାର ସବୁଠାରୁ ବଡ ବାୟୁସେନା ଘାଟି । ଏଠାରେ ପ୍ରାୟ ୧୦ ହଜାର ଆମେରିକୀୟ ସୈନିକ ଥିବା ବେଳେ ବ୍ରିଟେନ ସୈନ୍ୟମାନେ ମଧ୍ୟ ପାଳି କରି ଆସନ୍ତି । ଏଠାରେ ଆମେରିକାର ଯୁଦ୍ଧ ଓ ପରିବହନ ବିମାନ ସମେତ ବହୁ ସାମରିକ ଉପକରଣ ଓ ଯୁଦ୍ଧାସ୍ତ୍ର ମହଜୁଦ ରହିଛି । ଏହା ଆମେରିକାର ସେଣ୍ଟ୍ରାଲ କମାଣ୍ଡ (CENTCOM) ର ହେଡକ୍ୱାର୍ଟର ଭାବେ କାର୍ଯ୍ୟ କରେ । 

ଅଧିକ ପଢନ୍ତୁ: ଇସ୍ରାଏଲ-ଇରାନ ମଧ୍ୟରେ ଘମାଘୋଟ ଯୁଦ୍ଧ; ବଡ ଘୋଷଣା କଲେ ଟ୍ରମ୍ପ, ପ୍ରତିକ୍ରିୟା ରଖିଲା ଇରାନ