ମାନବିକତା ଦେଖାଇଲେ ୟୁକ୍ରେନ ଫେରନ୍ତା ଭାରତୀୟ ଛାତ୍ର; ନିଜ ସହ ବିଲେଇ-କୁକୁରକୁ ମଧ୍ୟ ସ୍ୱଦେଶ ଫେରାଇ ଆଣିଲେ

ଅପରେସନ ଗଙ୍ଗାରେ ଆଜି ହିଣ୍ଡନ ଏୟାର ବେସ୍‌ରେ ପହଞ୍ଚିଛି ବାୟୁସେନାର ୨ ଉଦ୍ଧାରକାରୀ C-17 ଗ୍ଲୋବମାଷ୍ଟର ବିମାନ। ଏଥିରେ ହଙ୍ଗେରିର ବୁଦାପେଷ୍ଟରୁ ପ୍ରାୟ ୨୦୦ ଭାରତୀୟଙ୍କୁ ଆଣାଯାଇଥିବା ବେଳେ ରୋମାନିଆର ବୁକାରେଷ୍ଟରୁ ବି ୨୦୦ ଭାରତୀୟଙ୍କୁ ଉଦ୍ଧାର କରାଯାଇଛି । ଉଦ୍ଧାର ସମୟରେ ଏକ ନିଆରା ଦୃଶ୍ୟ ଦେଖିବାକୁ ମିଳିଛି । ଯୁଦ୍ଧରେ ସବୁଠାରୁ ପ୍ରଭାବିତ କିଭ୍ ସହରରୁ କେରଳର ଜଣେ ଛାତ୍ର ନିଜ ସାଙ୍ଗଙ୍କ କୁକୁରକୁ ବିମାନରେ ଆଣିବାକୁ ଭୁଲି ନାହାଁନ୍ତି ।

ବଙ୍କରରେ ରହିବା ଠାରୁ ହଙ୍ଗେରୀର ବୁଦାପେଷ୍ଟ ପର୍ଯ୍ୟନ୍ତ କୁକୁର ତାଙ୍କ ସହ ଥିଲା । ଏହାପରେ ହଙ୍ଗେରୀ ଦୂତାବାସ କର୍ତ୍ତୃପକ୍ଷଙ୍କୁ ଗୁହାରୀ କରିବାରୁ କୁକୁରକୁ ବିମାନରେ ଛାଡ଼ିବା ଲାଗି ଅନୁମତି ମିଳିଥିଲା ।

କେବେଳ ଏତିକି ନୁହେଁ ୟୁକ୍ରେନ୍‌ରେ ମେଡିକାଲ ପଢୁଥିବା ତାମିଲନାଡୁର ଗୌତମ ମଧ୍ୟ ନିଜ ସହ ନିଜ ବିଲେଇକୁ ଆଣିଛନ୍ତି । ବିଲେଇକୁ ବିମାନରେ ଅନୁମତି ନ ମିଳିବାରୁ ସେ ଆସିବା ପାଇଁ ଅନିଚ୍ଛା ପ୍ରକାଶ କରିଥିଲେ । ହେଲେ ପରେ ରୋମାନିଆ ଦୂତାବାସ ଅନୁମତି ଦେବାରୁ ଗୌତମ ବିଲେଇକୁ ସାଙ୍ଗରେ ନେଇ ଆସିଛନ୍ତି ।