୨୦ ବର୍ଷ ହେଲା ଫଟୋ ପାଉନଥିଲା ଆମେରିକା, ଏବେ ସାମ୍ନାକୁ ଆସିଲା କୁଖ୍ୟାତ ଆତଙ୍କବାଦୀ

ଖୋଜି ଖୋଜି ପାଉନଥିଲା ଆମେରିକା । ୨୦ ବର୍ଷ ପରେ ମିଳିଲା ପତ୍ତା । ସାମନାକୁ ଆସିଲା କୁଖ୍ୟାତ ଆତଙ୍କବାଦୀ ସିରାଜୁଦ୍ଦିନ ହକ୍କାନି । ଯାହାକୁ ଧରିବା ପାଇଁ ଘୋଷଣା ହୋଇଥିଲା ୧୦ ଲକ୍ଷ ଡଲାର ପୁରସ୍କାର । ଆଫଗାନିସ୍ତାନର ଗୃହମନ୍ତ୍ରୀ ତଥା କୁଖ୍ୟାତ ଆତଙ୍କବାଦୀ ସିରାଜୁଦ୍ଦିନ ହକ୍କାନି ପ୍ରଥମ ଥର ପାଇଁ ମିଡିଆ ସାମନାକୁ ଆସିଛି । ଦୀର୍ଘ ୨୦ ବର୍ଷ ହେବ ଆଫଗାନିସ୍ତାନରେ ଆମେରିକା ସେନା ରହିଥିଲେ ବି ସିରାଜୁଦ୍ଦିନର ଟେର ପାଇନଥିଲେ । ତାକୁ ଧରିବା ପାଇଁ ୧୦ ଲକ୍ଷ ଡଲାର ପୁରସ୍କାର ରାଶି ଘୋଷଣା କରିଥିଲେ । ହେଲେ ତାର ପତ୍ତା ମିଳି ନଥିଲା । ଏମିତିକି ହକ୍କାନିର ଫଟୋ ହାସଲ କରିବାରେ ଅସମର୍ଥ ହୋଇଥିଲେ ଆମେରିକା ସେନା । ହେଲେ ଆଫଗାନିସ୍ତାନରେ ହଠାତ ନଜର ଆସିଥିଲେ ସିରାଜୁଦ୍ଦିନ । ଗତ ଶନିବାର କାବୁଲରେ ହେଉଥିବା ଆଫଗାନିସ୍ତାନ ପୁଲିସର ‘ପାସିଂ ଆଉଟ୍ ପରେଡ୍’ରେ ସିରାଜୁଦ୍ଦିନ ନଜର ଆସିଥିଲେ । ମଞ୍ଚ ଉପରକୁ ସିରାଜୁଦ୍ଦିନ ଉଠିବା ମାତ୍ରେ ସାରା ବିଶ୍ୱ ଆଶ୍ଚର୍ଯ୍ୟ ହୋଇଯାଇଥିଲା ।

ଦୀର୍ଘଦିନ ହେବ କାବୁଲକୁ ନିଜ ଅକ୍ତିଆରରେ ରଖିଥିବା ଆମେରିକା ଯେଉଁଦିନ କାବୁଲ ଛାଡିବା ପାଇଁ ଘୋଷଣା କଲା, ସେହିଦିନ ତତ୍ପର ହୋଇ ଉଠିଥିଲା ତାଲିବାନ । କାବୁଲର ବିଭିନ୍ନ ସହରକୁ ନିଜ ହେପାଜତକୁ ନେବା ସହ ଅସରଫ ଘାନି ସରକାରଙ୍କୁ ପରାସ୍ତ କରି ୧୫ ଅଗଷ୍ଟ ୨୦୨୧ରେ କାବୁଲ ଦଖଲ କରିଥିଲା । ପରେ ଆଫଗାନିସ୍ତାନରେ ସରକାର ଗଢ଼ିଲେ ତାଲିବାନମାନେ। ସେହି ସରକାରରେ ପ୍ରାୟ ଆତଙ୍କବାଦୀ ସାମିଲ ହୋଇଛନ୍ତି । ସେମାନଙ୍କ ଭିତରୁ ଅନେକଙ୍କୁ ଧରିବା ପାଇଁ ଆମେରିକା ପୁରସ୍କାର ରାଶି ଘୋଷଣା କରିଛି । ଯେଉଁ ଲିଷ୍ଟରେ ରହିଛି କୁଖ୍ୟାତ ଆତଙ୍କବାଦୀ ସିରାଜୁଦ୍ଦିନ ହକ୍କାନିଙ୍କ ନାଁ । ଜୀବିତ କି ମୃତ ଧରାଇ ଦେଲେ ୧୦ ଲକ୍ଷ ଡଲାର ପୁରସ୍କାର ରାଶି ଘୋଷଣା କରିଥିଲା ଆମେରିକା । ହେଲେ ସିରାଜୁଦ୍ଦିନର ପତ୍ତା ମିଳୁନଥିଲା ।

ଆମେରିକାର ମୋଷ୍ଟ ୱାଣ୍ଟେଡ ଆତଙ୍କବାଦୀ ସିରାଜୁଦ୍ଦିନ ହକ୍କାନି ତାଲିବାନ ସରକାରରେ ଗୃହ ମନ୍ତ୍ରୀ ଅଛନ୍ତି । ସିରାଜୁଦ୍ଦିନ ସହ ମୁଲ୍ଲା ବରାଦର ଓ ହସନ ଅଖୁନ୍ଦଜାଦା ବି ଅଛନ୍ତି । ତେବେ ମୁଲ୍ଲା ଓ ହସନ ଆଗରୁ ମିଡିଆ ସାମନାକୁ ଆସିଯାଇଥିବା ବେଳେ ପ୍ରଥମ ଥର ପାଇଁ ମିଡିଆ ସାମ୍ନାକୁ ଆସିଛନ୍ତି ସିରାଜୁଦ୍ଦିନ । ମଞ୍ଚ ଉପରକୁ ଉଠି ନିଜେ ଭାଷଣ ଦେଇ କହିଛନ୍ତି, ଆପଣଙ୍କ ସନ୍ତୁଷ୍ଟି ଓ ଭରସା ପାଇଁ ମୁଁ ମିଡିଆ ସାମନାକୁ ଆସି ପାରିଛି । କାମ ଦ୍ଵାରା ଆମେ ଲୋକମାନଙ୍କ ବିଶ୍ଵାସ ଜିତିବାକୁ ହେବ । ଏଥିପାଇଁ ଆମେ ଯତ୍ନବାନ ହେବା ଉଚିତ ବୋଲି ସିରାଜୁଦ୍ଦିନ କହିଛନ୍ତି ।

ତେବେ କୁଖ୍ୟାତ ଆତଙ୍କବାଦୀ ସିରାଜୁଦ୍ଦିନ ହକ୍କାନି ମିଡିଆ ଆଗକୁ ଆସି ଏପରି କହିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ହଠାତ କଣ ପାଇଁ ସିରାଜୁଦ୍ଦିନ ଆଗକୁ ଆସିଲା ତାକୁ ନେଇ ବିଶ୍ୱରେ ଆରମ୍ଭ ହୋଇଯାଇଛି ଚର୍ଚ୍ଚା ।