ୟୁକ୍ରେନ୍ ପାଇଁ ଗୁଗୁଲ୍‌ ଏହାର ମ୍ୟାପିଂ ସେବାକୁ ବନ୍ଦ କଲା

ଆଜିର ସମୟରେ, ଗୁଗୁଲ୍ ମ୍ୟାପ୍ ଲୋକଙ୍କ ଜୀବନକୁ ଅତି ସହଜ କରିଦେଇଛି। ଗୁଗୁଲ୍ ମ୍ୟାପ୍ ସାହାଯ୍ୟରେ ସହଜରେ ଦୁନିଆର ଯେକୌଣସି ଜାଗା ବିଷୟରେ ଜାଣିହେଉଛି। ଗୁଗୁଲ୍ ମ୍ୟାପ୍ ଏକ ୱେବ୍ ମ୍ୟାପିଂ ସେବା ହୋଇଥିବା ବେଳେ ଆଜିକାଲି ଦୁନିଆର ଅଧିକାଂଶ ଲୋକ କୌଣସି ଜାଗା ଖୋଜିବା ପାଇଁ ଗୁଗୁଲ୍ ମ୍ୟାପ୍ ବ୍ୟବହାର କରନ୍ତି।

କିନ୍ତୁ ଆଶ୍ଚର୍ଯ୍ୟର କଥା ଯେ ବର୍ତ୍ତମାନ ଗୁଗୁଲ୍ ମ୍ୟାପ୍ସ ସଠିକ୍ ଠିକଣା କହିବା ବ୍ୟତୀତ ଲୋକଙ୍କ ଜୀବନ ମଧ୍ୟ ବଞ୍ଚାଉଛି। ଋଷ୍‌ ଏବଂ ୟୁକ୍ରେନ୍‌ ମଧ୍ୟରେ ଚାଲିଥିବା ଏହି ଯୁଦ୍ଧରେ ଗୁଗୁଲ୍ ମ୍ୟାପ୍ ୟୁକ୍ରେନ୍‌ ନାଗରିକଙ୍କ ପାଇଁ ଏକ ସଂକଟମୋଚକ ଭଳି କାମ କରୁଛି। ଗୁଗୁଲ୍ ମ୍ୟାପ୍ ଏହି ଯୁଦ୍ଧରେ ନିଜର ଗୋଟିଏ ସେବାକୁ ବନ୍ଦ କରିଦେଇଛି। ଏହି ବନ୍ଦ ସେବାଟି କ’ଣ ଆସନ୍ତୁ ଜାଣିବା।

ଋଷ୍‌-ୟୁକ୍ରେନ୍‌ ଯୁଦ୍ଧରେ ଦେଶକୁ ରକ୍ଷା କରିବା ପାଇଁ ଯେତେବେଳେ ୟୁକ୍ରେନ୍‌ ନାଗରିକମାନେ ଅସ୍ତ୍ର ଉଠାଇଛନ୍ତି ଠିକ୍ ସେତିକିବେଳେ ଗୁଗୁଲ୍ ମ୍ୟାପ୍ ମଧ୍ୟ ସେମାନଙ୍କୁ ସାହାଯ୍ୟ କରିବା ଆରମ୍ଭ କରିଛି। ୟୁକ୍ରେନ୍‌ ନାଗରିକମାନଙ୍କୁ ଋଷ୍‌ର ସେନାଠାରୁ ରକ୍ଷା କରିବା ପାଇଁ ଟ୍ରାଫିକ୍ ଅପ୍‌ଡେଟ୍‌କୁ ନେଇ ଗୁଗୁଲ୍ ମ୍ୟାପ୍ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି।

ୟୁକ୍ରେନ୍‌କୁ ବିନାଶରୁ ରକ୍ଷା କରିବା ପାଇଁ ଗୁଗୁଲ ଏହାର ମ୍ୟାପିଂ ସେବାକୁ ନିଷ୍କ୍ରିୟ କରିଦେଇଛି। ଏହି ସେବା ବନ୍ଦ ହେବା ଦ୍ୱାରା ଋଷ୍‌ର ସେନା ୟୁକ୍ରେନ୍‌ ସହର ଏବଂ ସାଧାରଣ ନାଗରିକଙ୍କ ନିକଟରେ ପହଞ୍ଚିବା କଷ୍ଟକର ହୋଇପଡିବ, ଯାହା ଅନେକ ୟୁକ୍ରେନ୍‌ ନାଗରିକଙ୍କ ଜୀବନ ରକ୍ଷା କରିବ।

ଗୁଗୁଲ୍‌ ୟୁକ୍ରେନର ମାନଚିତ୍ରରେ ସେହି ସ୍ଥାନଗୁଡିକ ଦେଖାଇବା ବନ୍ଦ କରିଦେଇଛି, ଯେଉଁଠାରେ ଟ୍ରାଫିକ୍ ଏବଂ ଲୋକଙ୍କ ଅଧିକ ଭିଡ ରହୁଛି। ଏହି ସେବା ଅପସାରଣ ହେତୁ, ୟୁକ୍ରେନ୍‌ର ଅନେକ ସ୍ଥାନ ସ୍ମାର୍ଟଫୋନ୍‌ରେ ଉପଲବ୍ଧ ହେଉନି। ଗୁଗୁଲ୍ ମଧ୍ୟ ଯଥାସମ୍ଭବ ଚେଷ୍ଟା କରୁଛି ଯେ ଋଷ୍‌ ଏପରି ସ୍ଥାନକୁ ଅଧିକ ଟାର୍ଗେଟ୍ କରିବା ଉଚିତ ନୁହେଁ ଯେଉଁଠାରେ ଲୋକଙ୍କ ସଂଖ୍ୟା ଅଧିକ। ଋଷ୍‌ର ସେନାକୁ ବିଭ୍ରାନ୍ତ କରିବା ପାଇଁ ଗୁଗୁଲ ଏଭଳି ପଦକ୍ଷେପ ନେଇଛି।

ତେବେ ଋଷ୍‌ର ସେନାକୁ ବିଭ୍ରାନ୍ତ କରିବା ପାଇଁ ୟୁକ୍ରେନ୍‌ ସରକାର ମଧ୍ୟ ଦେଶର ମୁଖ୍ୟ ରାସ୍ତାରେ ଥିବା ସାଇନ୍ ବୋର୍ଡ ହଟାଇବାକୁ ନିର୍ଦ୍ଦେଶ ଦେଇଛନ୍ତି। ୟୁକ୍ରେନ୍‌ର ନିର୍ମାଣକାରୀ କମ୍ପାନୀ ସରକାରଙ୍କ ଏହି ପଦକ୍ଷେପକୁ ଫେସ୍‌ବୁକ୍‌ରେ ଜଣେଇଛି। ୟୁକ୍ରେନରେ ଏପରି ଅନେକ ସାଇନ୍ ବୋର୍ଡରେ ଲେଖାଯାଇଛି ଯେ, "ଏହି ରାସ୍ତା ନର୍କକୁ ଯାଇଛି।" ୟୁକ୍ରେନ୍‌ ନାଗରିକମାନେ ଋଷ୍‌ର ସେନାଙ୍କୁ ଅପଶବ୍ଦ ବ୍ୟବହାର କରୁଥିବା ବେଳେ ସେମାନଙ୍କୁ ବିଭ୍ରାନ୍ତ କରୁଛନ୍ତି।