Modi-Trump Meet: ମୋଦିଙ୍କୁ ବହି ଉପହାର ଦେଲେ ବନ୍ଧୁ ଟ୍ରମ୍ପ, କହିଲେ ମୋଦି ଆପଣ ମହାନ୍...

ପ୍ରଧାନମନ୍ତ୍ରୀ ମୋଦିଙ୍କ ଆମେରିକା ଗସ୍ତ ସମୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ତାଙ୍କର ନିବିଡ ବନ୍ଧୁତା ଦେଖିବାକୁ ମିଳୁଛି । ଏହି ଭେଟଘାଟ ସମୟରେ ପିଏମ୍ ମୋଦିଙ୍କୁ ଏକ ବହି ଉପହାର ଦେଇଛନ୍ତି ରାଷ୍ଟ୍ରପତି ଟ୍ରମ୍ପ । ଏହି ବହିଟିର ନାଁ ରହିଛି 'ଆଓ୍ୱାର ଜର୍ଣ୍ଣି ଟୁଗେଦର୍' ।  ଏହା ଏକ ଫଟୋବୁକ୍ ।  ଏଥିରେ ଦୁଇ ବନ୍ଧୁଙ୍କ ବିଭିନ୍ନ ସମୟର ଫଟୋ ରହିଛି ।  

ଓ୍ୱାସିଂଟନ ଡିସିରେ ମୋଦିଙ୍କୁ ଏହି ପୁସ୍ତକ ପ୍ରଦାନ କରିଛନ୍ତି ଟ୍ରମ୍ପ । ବହିରେ ଟ୍ରମ୍ପଙ୍କ ପୂର୍ବ କାର୍ଯ୍ୟକାଳର ବିବରଣୀ ରହିଛି । ଯେଉଁଥିରେ ମୋଦି ଓ ଟ୍ରମ୍ପଙ୍କ ବିଭିନ୍ନ ସମୟର ଫଟୋ, ୨୦୧୯ରେ ମୋଦିଙ୍କ ଆମେରିକା ଗସ୍ତ ସମୟରେ ଆୟୋଜିତ ହାଓ୍ୱଡି ମୋଦି ଏବଂ ନମସ୍ତେ ଟ୍ରମ୍ପ କାର୍ଯ୍ୟକ୍ରମ ସମୟରେ ଦୁଇ ନେତାଙ୍କର ସ୍ମରଣୀୟ ଫଟୋ ସ୍ଥାନ ପାଇଛି । 

ପଢନ୍ତୁ ଏହି ଖବର: ଭାରତ-ଆମେରିକା ସମ୍ପର୍କ ଅତୁଟ; ବାଣିଜ୍ୟଠୁ ନେଇ ଆତଙ୍କବାଦ ଯାଏ, ଟ୍ରମ୍ପ କଲେ ବଡ ଘୋଷଣା

ଏହାଛଡ଼ା ବହିଟିରେ ନିଜ ହସ୍ତାକ୍ଷର ସହ ଟ୍ରମ୍ପ ମୋଦିଙ୍କ ଉଦ୍ଦେଶ୍ୟରେ ଲେଖିଛନ୍ତି- ମିଷ୍ଟର ପ୍ରାଇମ ମିନିଷ୍ଟର ୟୁ ଆର୍ ଗ୍ରେଟ୍ ।   

ଡୋନାଲ୍ଡ ଟ୍ରମ୍ପ ବହିର ପୃଷ୍ଠା ଲେଉଟାଇ ପ୍ରଧାନମନ୍ତ୍ରୀ ମୋଦିଙ୍କୁ ୨୦୨୦ରେ ନିଜର ଭାରତ ଯାତ୍ରା ସମୟର 'ନମସ୍ତେ ଟ୍ରମ୍ପ ରାଲି'ର ଫଟୋ ଦେଖାଇଛନ୍ତି । ତାଜମହଲ ସାମ୍ନାରେ ଆମେରିକାର ପ୍ରଥମ ମହିଳା ମେଲାନିୟା ଟ୍ରମ୍ପଙ୍କ ସହ ତାଙ୍କର ଫଟୋ ମଧ୍ୟ ଦେଖାଇଛନ୍ତି । 

ଏଥିସହ ରାଷ୍ଟ୍ରପତି ଟ୍ରମ୍ପ ସାମ୍ବାଦିକଙ୍କ ସହ କଥାବର୍ତ୍ତାରେ କହିଛନ୍ତି, ଭାରତର ପ୍ରଧାନମନ୍ତ୍ରୀ ମୋଦି ଏଠାକୁ ଆସିବା ମୋ ପାଇଁ ବଡ ସମ୍ମାନର କଥା । ସେ ମୋର ଜଣେ ଭଲ ବନ୍ଧୁ । ଆମ ଭିତରେ ଭଲ ସମ୍ପର୍କ ରହିଛି ଏବଂ ମୁଁ ନିଜ ୪ ବର୍ଷର କାର୍ଯ୍ୟକାଳରେ ଏହାକୁ ବଜାୟ ରଖିଛି ।  

ଦୁଇ ଦିନିଆ ଆମେରିକା ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ରାତିରେ ହ୍ବାଇଟ୍ ହାଉସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିଥିଲେ । ଦୁଇ ନେତାଙ୍କ ମଧ୍ୟରେ ଭାରତ-ଆମେରିକା ସମ୍ପର୍କ ଠାରୁ ଆରମ୍ଭ କରି ୟୁକ୍ରେନ-ରୁଷ ଯୁଦ୍ଧ, ବାଣିଜ୍ୟ ଶୁଳ୍କ, ବେଆଇନ ଶରଣାର୍ଥୀ ପ୍ରତ୍ୟର୍ପଣ ଆଦି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଥିଲା । ଉଭୟ ଦୁଇ ଦେଶ ମଧ୍ୟରେ ସମ୍ପର୍କ ଆହୁରି ଦୃଢ ପାଇଁ ଆହ୍ୱାନ ଦେଇଥିଲେ  । 

ପଢନ୍ତୁ ଏହି ଖବର: ଆମେରିକାର ଶରଣ ପଶୁଛନ୍ତି ଭାରତୀୟ, ୫ ବର୍ଷରେ ବଢ଼ିଛି ଏତିକି ହଜାର