iPhone: ଚଳନ୍ତା ବସରେ ମହିଳାଙ୍କ ମୃତ୍ୟୁ, ରହସ୍ୟ ଘେରରେ ତାଙ୍କ ଶରୀରରେ ଲାଗିଥିବା ୨୬ ଆଇଫୋନ୍

ବ୍ରାଜିଲରେ ଏକ ବସ୍‌ରେ ଯାତ୍ରା କରୁଥିବା ସମୟରେ ଜଣେ ୨୦ ବର୍ଷୀୟା ମହିଳା ହୃଦ୍‌ରୋଗରେ ମୃତ୍ୟୁବରଣ କରିଥିଲେ। ଡାକ୍ତରମାନେ ପରେ ତାଙ୍କ ଶରୀରରେ ୨୬ଟି ଆଇଫୋନ୍ ଲାଗିଥିବା ଦେଖିବାକୁ ପାଇଥିଲେ। ତେଣୁ ସେ ଆଇଫୋନ୍ ଚୋରା ଚାଲାଣରେ ଲିପ୍ତ ଥିବା ସନ୍ଦେହ ସୃଷ୍ଟି କରିଛି। ଯାହାର ଯାଞ୍ଚ କରୁଛି ପୋଲିସ୍। ଜୁଲାଇ ୨୯ ତାରିଖରେ ତାଙ୍କର ମଅତ୍ୟୁ ହୋଇଥିଲା।

ମହିଳା ଜଣକ ଫୋଜ୍ ଡୋ ଇଗୁଆକୁରୁ ସାଓ ପାଉଲୋ ଯାତ୍ରା ସମୟରେ ମଝି ରାସ୍ତାରେ ଚେତା ହରାଇ ପଡି ଯାଇଥିଲେ, କାରଣ ତାଙ୍କ ଶ୍ୱାସକ୍ରିୟା ନେବାରେ କଷ୍ଟ ହୋଇଥିଲା। ଏହି ଘଟଣା ବ୍ରାଜିଲର ପାରାନ୍ ଅଞ୍ଚଳର ଗୁଆରାପୁଆଭାରେ ଘଟିଥିଲା। ସହଯାତ୍ରୀଙ୍କ ଅନୁଯାୟୀ, ସେ ଚେତାଶୂନ୍ୟ ହେବା ପୂର୍ବରୁ ନିଶ୍ୱାସ ନେବାରେ କଷ୍ଟ ଅନୁଭବ କରିବା ଆରମ୍ଭ କରିଥିଲେ।

ଯେତେବେଳେ ମୋବାଇଲ୍ ଜରୁରୀକାଳୀନ ସେବା (SAMU)ର ଜରୁରୀକାଳୀନ ସହାୟତା କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଲେ, ସେମାନେ ପ୍ରାୟ ୪୫ମିନିଟ୍ ପର୍ଯ୍ୟନ୍ତ ବଞ୍ଚାଇବାକୁ ଚେଷ୍ଟା କରିଥିଲେ। ସେମାନଙ୍କ ପ୍ରୟାସ ସତ୍ତ୍ୱେ, ତାଙ୍କୁ ଘଟଣାସ୍ଥଳରେ ମୃତ ଘୋଷଣା କରାଯାଇଥିଲା।

ସେହି ସମୟରେ, ଡାକ୍ତରମାନେ ତାଙ୍କ ଶରୀର ସହିତ ସଂଲଗ୍ନ ଅନେକ ପ୍ୟାକେଜ୍ ପାଇଥିଲେ। ସେଗୁଡିକ ମଧ୍ୟରୁ ୨୬ଟି ଆଇଫୋନ୍ ମିଳିଥିଲା। କର୍ତ୍ତୃପକ୍ଷ ତାଙ୍କ ଲଗେଜରେ ଅନେକ ମଦ ବୋତଲ ମଧ୍ୟ ପାଇଥିଲେ, ଯାହା ମାମଲାକୁ ଆହୁରି ଜଟିଳ କରିଥିଲା।

ସ୍ଥାନୀୟ ପୋଲିସ ଏହି ମାମଲାକୁ ଏକ ସନ୍ଦେହଜନକ ଚୋରା ଚାଲାଣ ପ୍ରୟାସ ଭାବରେ ବିଚାର କରୁଛି। ପୋଲିସ ଏବେ ପୂର୍ଣ୍ଣାଙ୍ଗ ତଦନ୍ତ ଆରମ୍ଭ କରିଛି। ମୃତ୍ୟୁର କାରଣ ସ୍ପଷ୍ଟ କରିବା ପାଇଁ ଫୋରେନସିକ୍ ରିପୋର୍ଟର ସମାପ୍ତିକୁ ଅପେକ୍ଷା କରିଛି। ମହିଳାଙ୍କ ମୃତଦେହକୁ ଫୋରେନସିକ୍ ମେଡିକାଲ୍ ଇନଷ୍ଟିଚ୍ୟୁଟ୍ ପଠାଯାଇଛି। ଏହି ସମୟରେ, ଜବତ ମୋବାଇଲ୍ ଫୋନ୍ ବ୍ରାଜିଲର ସଂଘୀୟ ରାଜସ୍ୱ ସେବା ପାଖରେ ରହିଛି।

ଅଧିକ ପଢନ୍ତୁ: ବିମାନରେ ଅସରପା, କ୍ଷମା ମାଗିଲା ଏୟାରଇଣ୍ଡିଆ