LIVE TV
କର୍ମଚାରୀଙ୍କୁ ଚାକରିରୁ ବିଦା କରିବା ପରେ ଜୀବନ ହାରିଲେ ମୁଖ୍ୟ ଆର୍ଥିକ ଅଧିକାରୀ( CFO )। ଏତେ ଲୋକଙ୍କ ଦୁଃଖର କାରଣ ହୋଇଥିବା ଚିନ୍ତା କରି ସେ ଆତ୍ମହତ୍ୟା ପରି ଚରମ ରାସ୍ତା ବାଛି ନେଇଛନ୍ତି । କରୋନା ପର ଠାରୁ କମ୍ପାନୀ ଗୁଡ଼ିକରେ ମାନ୍ଦାବସ୍ଥା ଲାଗି ରହିଥିବାରୁ ଅନେକ ଲୋକଙ୍କୁ ଚାକିରି ହରାଇବାକୁ ପଡ଼ୁଛି । ପୂର୍ବରୁ ଛଟେଇ ହେଉଥିଲେ ହେଁ ମହାମାରୀ ପରେ ଏହି ସଂଖ୍ୟା ବଢ଼ି ବଢ଼ି ଚାଲିଛି । ଏହି କ୍ରମରେ ନିକଟରେ ବେଡ୍ ବାଥ ଆଣ୍ଡ ବିୟଣ୍ଡ( Bed Bath & Beyond) କମ୍ପାନୀ ନିଜର ଅନେକ ଷ୍ଟୋର ବନ୍ଦ କରିବା ପରେ ଶତାଧିକ କର୍ମଚାରୀଙ୍କୁ ଛଟେଇ କରିଛି । ଏତେ ଲୋକ କିଛି କ୍ଷଣ ମଧ୍ୟରେ ଚାକିରି ହରାଇବା ପରେ କମ୍ପାନୀର CFO ୧୮ ମହଲା ଛାତ ଉପରୁ ଡେଇଁ ଆତ୍ମହତ୍ୟା କରିଛନ୍ତି ।
ଆମେରିକାର ‘ବେଡ୍ ବାଥ ଆଣ୍ଡ ବିୟଣ୍ଡ’ କମ୍ପାନୀର CFO ଗୁସ୍ତାଭୋ ଅର୍ଣ୍ଣେଲ (Gustavo Arnal ) । ସେ ଶୁକ୍ରବାର ଦିନ ଜେଙ୍ଗା ଟାୱାରର ୧୮ ମହଲା ଉପରୁ ଡେଇଁ ଜୀବନ ହାରି ଦେଇଛନ୍ତି । ନିଜ କମ୍ପାନୀର କିଛି ଷ୍ଟୋର ବନ୍ଦ ହେବା ସହ କର୍ମଚାରୀଙ୍କୁ ହଟାଇବା ପାଇଁ ଘୋଷଣା କରିବା ପରେ ସେ ଚାପରେ ରହୁଥିଲେ । କର୍ମଚାରୀଙ୍କ ଚାକିରି ଯିବା ପଛରେ ନିଜକୁ କେଉଁଠି ନା କେଉଁଠି ସେ ଦାୟୀ କରୁଥିଲେ । ତେଣୁ ସେ କର୍ମଚାରୀଙ୍କ ପାଇଁ ଏଭଳି ଚରମ ନିଷ୍ପତ୍ତି ନେଇଥିବା କୁହାଯାଉଛି । କିନ୍ତୁ ପ୍ରକୃତ କାରଣ କ’ଣ ତାହା ଏଯାଏଁ ସ୍ପଷ୍ଟ ହୋଇନି।
୫୨ ବର୍ଷୀୟ ଗୁସ୍ତାଭୋ ଟାୱାର୍ ନିକଟରୁ ଅଚେତ ଅବସ୍ଥାରେ ଉଦ୍ଧାର ହୋଇଥିବା ପୋଲିସ୍ କହିଛି । ଆଉ ସେହି ସମୟରେ ସେ କିଛି କହିବା ଅବସ୍ଥାରେ ନଥିଲେ । ୧୮ ମହଲାରୁ ତଳକୁ ଡେଇଁବା ପରେ ଗୁରୁତର ଆହତ ହୋଇଥିଲେ ଗୁସ୍ତାଭୋ । ଏହାପରେ ସେଠାରେ ତୁରନ୍ତ ପହଞ୍ଚିଥିଲେ ଜରୁରୀକାଳୀନ ସେବା କର୍ମଚାରୀ । ହେଲେ ସେଠାରେ ଗୁସ୍ତାଭୋଙ୍କୁ ମୃତ ଘୋଷଣା କରାଯାଇଥିଲା । ତେବେ କାହିଁକି ଆତ୍ମହତ୍ୟା କରିଛନ୍ତି ସେ ନେଇ ପୁଲିସ ତଦନ୍ତ ଜାରି ରଖିଛି।
Bed Bath & Beyond ବୋର୍ଡର ଡାଇରେକ୍ଟର, ଗୁସ୍ତାଭୋଙ୍କ ପରିବାରକୁ ସମବେଦନା ଜଣାଇଛନ୍ତି । ଗୁସ୍ତାଭୋଙ୍କ ପରିବାରର ଏହି କଷ୍ଟଦାୟକ ସମୟରେ କମ୍ପାନୀର ପୂରା ଟିମ୍ ସହଯୋଗ କରିବ ବୋଲି ସେ କହିଛନ୍ତି। ସେହିପରି ପରିବାରର ଗୋପନୀୟତାକୁ ସମ୍ମାନ ଦେବାପାଇଁ ଅନୁରୋଧ ମଧ୍ୟ କରିଛନ୍ତି ।
ସୂଚନାଯୋଗ୍ୟ ୨୦୨୦ରେ ଗୁସ୍ତାଭୋ ‘ବେଡ୍ ବାଇ ଆଣ୍ଡ ବିୟଣ୍ଡ’ କମ୍ପାନୀରେ ଯୋଗ ଦେଇଥିଲେ । ଏହା ପୂର୍ବରୁ ସେ କସମେଟିକ ବ୍ରାଣ୍ଡ ‘ଏଭନ’ର CFO ଥିଲେ । ସେହିପରି Procter & Gamble ରେ ଗୁସ୍ତାଭୋଙ୍କ ୨୦ ବର୍ଷର ଅଭିଜ୍ଞତା ମଧ୍ୟ ରହିଛି ।
